Odisha Andhra Police Clash / ଚଳିବନି ଆନ୍ଧ୍ରର ଦାଦାଗିରି; ମିଳିବନି ଭୋଟ୍; ନିର୍ବାଚନ ଦିନ ନେତା ଅଧିକାରୀ କୋଟିଆ ଜଗିବେ

କୋରାପୁଟ/ଭୁବନେଶ୍ଵର: କୋଟିଆ ସୀମା ନେରିଡିୱାଲସାରେ ଚାପା ଉତ୍ତେଜନା । ଓଡ଼ିଶା-ଆନ୍ଧ୍ର ପୋଲିସ ମୁହାଁମୁହିଁ । କୋଟିଆରେ ଆନ୍ଧ୍ର ପକ୍ଷରୁ ନିର୍ବାଚନୀ କାର୍ଯ୍ୟକଳାପକୁ ନେଇ ଦେଖାଦେଇଛି ଉତ୍ତେଜନା । ଏହାକୁ ନେଇ ଓଡ଼ିଶା ଓ ଆନ୍ଧ୍ର ପୋଲିସ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି । ସୀମାନ୍ତ ଅଞ୍ଚଳରେ ପରିସ୍ଥିତି ତିକ୍ତ ହୋଇଥିବା ବେଳେ ଉଭୟ ପକ୍ଷର ପୋଲିସ ଉପସ୍ଥିତିକୁ ନେଇ ଚର୍ଚ୍ଚା ବଢ଼ିଛି । ତା' ସହିତ ଓଡ଼ିଶା ପୋଲିସ ଦ୍ଵାରା ନେରିଡିୱାଲସାଠାରେ କରାଯାଇଥିବା ପୋଲିସ ବାରିକେଟକୁ ଭାଙ୍ଗିଲେ ଆନ୍ଧ୍ର ପୋଲିସ । ଯାହା ଦ୍ଵାରା ଉତ୍ତେଜନା ପରିସ୍ଥିତି ଦେଖାଦେଇଛି । ସେପଟେ କୋଟିଆରେ ଆନ୍ଧ୍ର ନିର୍ବାଚନ କରାଇ ଦିଆଯିବନି । ନିର୍ବାଚନ ଦିନ ସମସ୍ତ ଦଳର ନେତା ଓ ଅଧିକାରୀ କୋଟିଆ ଜଗିବେ ବୋଲି କହିଛନ୍ତି ରାଜସ୍ଵ ମନ୍ତ୍ରୀ ସୁରେଶ ପୂଜାରୀ ।

ନଭେମ୍ବର ୫ ତାରିଖରେ କୋଟିଆରେ ପଞ୍ଚାୟତ ନିର୍ବାଚନ କରିବାକୁ ଯାଉଛି ଆନ୍ଧ୍ର । ବାରମ୍ବାର ତାଗିଦ ସତ୍ତ୍ଵେ କୋଟିଆ ଉପରେ ନିଜର ଅଧିକାର ଜାହିର କରିବାକୁ ଆନ୍ଧ୍ର ପକ୍ଷରୁ ଅପଚେଷ୍ଟା ଜାରି ରହିଛି । ଜୋରଜବରଦସ୍ତ ସୀମାନ୍ତ ଅଞ୍ଚଳର ଲୋକଙ୍କୁ ବିଭିନ୍ନ ସରକାରୀ ଯୋଜନାର ପ୍ରଲୋଭନ ଦେଖାଇ ଆନ୍ଧ୍ର ନିର୍ବାଚନ କରିବାକୁ ଷଡ଼ଯନ୍ତ୍ର କରିଛି । ଏପରିକି କୋଟିଆର ଲୋକଙ୍କ ନାଁରେ ଭୋଟର ପରିଚୟପତ୍ର ମଧ୍ୟ କରାଯାଇଛି । ଆଜି ଆନ୍ଧ୍ର ପୋଲିସ କୋଟିଆରେ ପହଞ୍ଚି ଦାଦାଗିରି ଦେଖାଉଥିବାବେଳେ ଓଡ଼ିଶା ପୋଲିସ ବିରୋଧ କରିଥିଲା । ଏହାପରେ ବିବାଦ ଉପୁଜିଛି ।

• "କୋଟିଆ ଜଗିବେ ନେତା ଓ ଅଧିକାରୀ"

କୋଟିଆ ବିବାଦକୁ ନେଇ ରାଜସ୍ଵ ମନ୍ତ୍ରୀ ସୁରେଶ ପୂଜାରୀ ପ୍ରତିକ୍ରିୟା ରଖିଛନ୍ତି । ଆନ୍ଧ୍ର ଯେତେ ଚେଷ୍ଟା କଲେ ବି ଏଥର କୋଟିଆରେ ଆନ୍ଧ୍ରର ପଞ୍ଚାୟତ ନିର୍ବାଚନ କରାଇ ଦିଆଯିବ ନାହିଁ । କୋଟିଆବାସୀ ଏହି ନିର୍ବାଚନକୁ ବିରୋଧ କରୁଛନ୍ତି । କୋରାପୁଟରେ ସମସ୍ତ ଦଳ ଗୋଟିଏ ମଞ୍ଚରେ ଏକାଠି ହୋଇ ବିରୋଧ କରୁଛନ୍ତି । ସ୍ଥାନୀୟ ଲୋକ, ରାଜନୀତି ଦଳ, ସାମାଜିକ ସଂଗଠନ ନିର୍ବାଚନ ଦିନ କୋଟିଆରେ ରହିକି ନିର୍ବାଚନକୁ ପଣ୍ଡ କରିବେ ବୋଲି ମନ୍ତ୍ରୀ କହିଚନ୍ତି ।

ପଢନ୍ତୁ ଏହି ଖବର: କୋଟିଆ ବିବାଦ; ଆନ୍ଧ୍ର ନିର୍ବାଚନ ବନ୍ଦ ପାଇଁ କେନ୍ଦ୍ର ସରକାରଙ୍କ ହସ୍ତକ୍ଷେପ ଲୋଡ଼ିଲେ ଆଇନଜୀବୀ

• "ଆନ୍ଧ୍ର ଚାଉଳ ଗାଡ଼ିକୁ ଲୋକେ ଫେରାଇଦେଲେ"

ମନ୍ତ୍ରୀ ଆହୁରି କହିଛନ୍ତି, "ବରିଷ୍ଠ ଅଧିକାରୀମାନେ ମଧ୍ୟ ଅଛନ୍ତି । ବାତ୍ୟା ବେଳେ ଓଡ଼ିଶା ସରକାରଙ୍କ ପ୍ରଶାସନ କୋଟିଆ ସହିତ ଥିଲା ଲୋକ ମଧ୍ୟ ଏହାକୁ ଉପଲବ୍ଧି କରୁଛନ୍ତି । ଆନ୍ଧ୍ର ପ୍ରଦେଶରୁ ଯେଉଁ ଚାଉଳ ଗାଡି ଆସିଥିଲା ତାକୁ ଲୋକେ ଫେରାଇଦେଲେ । ଚେକ ପୋଷ୍ଟ ହୋଇଛି । ୭ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି । ଆନ୍ଧ୍ର ପ୍ରଶାସନ ଅଧିକାରୀଙ୍କ ଫେରାଇ ଦିଆଯାଇଛି । ଗତ ଥର ନିର୍ବାଚନ ବେଳେ କୋଟିଆ ଭିତରେ ବୁଥ କରିଥିଲେ । ଚଳିତ ବର୍ଷ କୋଟିଆ ବାହାରେ ଆନ୍ଧ୍ର ଭିତରେ ପୋଲିଙ୍ଗ ବୁଥ କରିଛନ୍ତି । ଆମ ପ୍ରଶାସନ ପୁରା ପ୍ରସ୍ତୁତ ଅଛୁ ।"