Mahanadi Water Dispute / ଖୁବଶୀଘ୍ର ମହାନଦୀ ଜଳ ବିବାଦର ସମାଧାନ; ସଙ୍କେତ ଦେଲେ ଛତିଶଗଡ ମୁଖ୍ୟମନ୍ତ୍ରୀ

ଭୁବନେଶ୍ଵର: ଟ୍ରିପଲ୍ ଇଂଜିନ ସରକାରରେ ମହାନଦୀ ବିବାଦର ସମାଧାନ । ଆଗରୁ ମୋହନ କହୁଥିଲେ, ଆଜି ବିଷ୍ଣୁ କହିଲେ । ଆପୋଷ ବୁଝାମଣାରେ ବାହାରିବ ମହାନଦୀ ଜଳ ବିବାଦ ସମାଧାନର ବାଟ । ଦୁଇ ଦିନିଆ ଓଡ଼ିଶା ଗସ୍ତରେ ଆସି ଏଭଳି କିଛି ବୟାନ ଦେଇଛନ୍ତି ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏ । ମହାନଦୀ ଜଳ ସମସ୍ୟା ଆଉ ବିବାଦ ହୋଇ ରହି ନ ଥିବା ବେଳେ ଦିଲ୍ଲୀରେ CWCର ନିଷ୍ପତ୍ତି ମାନିବାକୁ ଉଭୟ ରାଜ୍ୟ ରାଜି ହୋଇଥିବା କହିଛନ୍ତି ଛତିଶଗଡ ମୁଖ୍ୟମନ୍ତ୍ରୀ ।

• ଦୀର୍ଘ ଦିନରୁ ଦୁଇ ରାଜ୍ୟ ଭିତରେ ଚାଲିଛି ଟଣାଓଟରା

ଓଡ଼ିଶାର ଲାଇଫ ଲାଇନ ମହାନଦୀକୁ ନେଇ ଦୀର୍ଘ ବର୍ଷରୁ ଚାଲିଛି ଆଇନ ଗତ ଲଢେଇ । ୨୦୧୬ରେ ଛତିଶଗଡ଼ର ଉପରମୁଣ୍ଡରେ ପ୍ରକଳ୍ପ ନିର୍ମାଣ ନେଇ ଉଠିଥିଲା ବିବାଦ । ହେଲେ କେନ୍ଦ୍ର ସରକାର ବାରମ୍ବାର ଆପୋଷ ଆଲୋଚନା ପାଇଁ କହିଥିଲେ ବି ନବୀନ ସରକାର ଶୁଣିଲେନି । ଓଲଟା ମହାନଦୀକୁ ନେଇ ରାଜନିତୀ କଲେ । ବିଜେଡି ସରକାରଙ୍କ ଜିଦ୍ ଯୋଗୁଁ ୨୦୧୮ରେ ଗଠନ ହେଲା ମହାନଦୀ ୱାଟର୍ ଡିସ୍ପ୍ୟୁଟ୍ସ ଟ୍ରିବ୍ୟୁନାଲ । ଏହାରି ଭିତରେ ଉଭୟ ରାଜ୍ୟର ସରକାର ବଦଳି ଟ୍ରିପଲ ଇଂଜିନ ସରକାର ଆସିଛି । ଓଡ଼ିଶା ସରକାର ଆପୋଷ ବୁଝାମଣାରେ ସମାଧାନ ପାଇଁ ଅଣ୍ଟା ଭିଡ଼ିଥିବା ବେଳେ ସେପ୍ଟେମ୍ବର ୨୮ରେ ମହାନଦୀ ଜଳ ବିବାଦ ମାମଲାର ପରବର୍ତ୍ତୀ ଟ୍ରିବ୍ୟୁନାଲ ଶୁଣାଣି ହେବ ।

• ଛତିଶଗଡ ସିଏମଙ୍କ ବୟାନ ପରେ ଶାସକ ବିରୋଧୀ ମୁଁହାମୁହିଁ

ସେପଟେ ଉଭୟ ରାଜ୍ୟ ମୁଖିଆଙ୍କ ଆଲୋଚନାକୁ ନେଇ ବିରୋଧୀ ସରକାରକୁ ଘେରିଥିବା ବେଳେ ବିଜେପି ରଖିଛି କଡା ଜବାବ । ୨୦୨୬ ଜୁଲାଇ ୩୦ରେ କେନ୍ଦ୍ରୀୟ ଜଳଶକ୍ତି ମନ୍ତ୍ରୀ ସି.ଆର୍. ପାଟିଲଙ୍କ ଅଧ୍ୟକ୍ଷତାରେ ଓଡ଼ିଶା ଓ ଛତିଶଗଡ଼ ମୁଖ୍ୟମନ୍ତ୍ରୀଙ୍କ ବୈଠକ ହୋଇଥିଲା । କେନ୍ଦ୍ରର ସୂଚନା ଅନୁସାରେ, ଉଭୟ ରାଜ୍ୟ ଆଲୋଚନା, ବୈଷୟିକ ସହଯୋଗ ଓ ସମନ୍ୱୟ ମାଧ୍ୟମରେ ସମାଧାନ ଦିଗରେ ଆଗକୁ ବଢ଼ିବା ନେଇ ଇଚ୍ଛା ପ୍ରକାଶ କରିଥିଲେ । ଆଗକୁ କେବେ ମାମଲାର ଅନ୍ତ ଘଟୁଛି ତାହା ଉପରେ ନଜର ।

ପଢନ୍ତୁ ଏହି ଖବର: ଟ୍ରିପଲ୍ ଇଞ୍ଜିନ୍ ସରକାରରେ ବାହାରିଲା ସମାଧାନର ବାଟ

କିଛି ଦିନ ପୂର୍ବରୁ ଆଇନ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନ କହିଥିଲେ ଯେ ମହାନଦୀ ଜଳ ବିବାଦ ସମସ୍ୟା ସମାଧାନ ଦିଗରେ କୌଣସି ପ୍ରକାର ଛଳନା କିମ୍ବା କପଟତା କରାଯାଉନାହିଁ ବରଂ ଏହାକୁ ଦୁଇଟି ସ୍ତରରେ ସଫଳତାର ସହ ଆଗକୁ ନିଆଯାଉଛି  । ଆଇନଗତ ଦୃଷ୍ଟିକୋଣରୁ ଯାହା ଆବଶ୍ୟକ ତାହା କରାଯାଉଥିବା ବେଳେ ବର୍ତ୍ତମାନର ଟ୍ରିବ୍ୟୁନାଲରେ ଆମ ପକ୍ଷର ଓଜନ ଅଧିକ ରହିଛି ବୋଲି କୁହାଯାଇଛି । ବହୁତ ଶୀଘ୍ର ଏହାର ସଠିକ୍ ସମାଧାନ ହେବ ବୋଲି ସେ କହିଥିଲେ ।