Videos
|
Odisha

Mahapanchuka Puri / ମହାପଞ୍ଚୁକର ମହାପୁଣ୍ୟ; ଭକ୍ତିରେ ଭିଜୁଛି ଶ୍ରୀକ୍ଷେତ୍ର, ହୋଇପାରିଲାନି ବାଙ୍କଚୂଡ଼ ବେଶ

Debashree Debasmita Sahoo
Browse all articles by Debashree Debasmita Sahoo
·21 mins ago·2 min read
ମହାପଞ୍ଚୁକର ମହାପୁଣ୍ୟ; ଭକ୍ତିରେ ଭିଜୁଛି ଶ୍ରୀକ୍ଷେତ୍ର, ହୋଇପାରିଲାନି ବାଙ୍କଚୂଡ଼ ବେଶ
Mahapanchuka Puri Jagannath Temple

Key Points

ପଞ୍ଚୁକରେ ଶ୍ରୀକ୍ଷେତ୍ରରେ ପ୍ରବଳ ଭିଡ଼
ଜୟ ଜଗନ୍ନାଥ ଧ୍ୱନିରେ କମ୍ପୁଛି ବଡ଼ଦାଣ୍ଡ
ପୁରୀ: ଭକ୍ତିରେ ଭିଜୁଛି ଶ୍ରୀକ୍ଷେତ୍ର । ଜୟ ଜଗନ୍ନାଥ ଧ୍ୱନିରେ କମ୍ପୁଛି ବଡ଼ଦାଣ୍ଡ । ଚକାଆଖିକୁ ଚାହିଁ ରାତି ପାହିଯାଉଛି, ହେଲେ ଭକ୍ତଙ୍କ ଆଖିରୁ ହଟୁନି କାଳିଆ ଠାକୁରଙ୍କ ମନୋହର ରୂପ । ଆଜି ତ୍ରିବିକ୍ରମ ବେଶରେ ଦର୍ଶନ ଦେଉଛନ୍ତି ବିଶ୍ୱନିୟନ୍ତା । ଭାବ ଓ ଭକ୍ତିର ଏହି ଅପୂର୍ବ ମିଳନ ଭିତରେ ଦିନକ ପରେ କାର୍ତ୍ତିକ ପୂର୍ଣ୍ଣିମା । ତେବେ ଶ୍ରଦ୍ଧାଳୁଙ୍କ ସୁରକ୍ଷା ଓ ଶୃଙ୍ଖଳିତ ଦର୍ଶନ ପାଇଁ କରାଯାଇଛି କଡ଼ା ସୁରକ୍ଷା ବ୍ୟବସ୍ଥା ।

  • ରାତିସାରା ମହାପ୍ରଭୁ ଅନିଦ୍ରା
ଗତକାଲି ପବିତ୍ର ଏକାଦଶୀ ତିଥିରେ ଦୁଇଟି ବଡ଼ସିଂହାର ସହ ସମ୍ପନ୍ନ ହୋଇଥିଲା ସ୍ୱତନ୍ତ୍ର ହରି ଉତ୍ଥାପନ ନୀତି । ଆଉ ରାତିସାରା ଭକ୍ତଙ୍କ ଅସମ୍ଭାଳ ଭିଡ଼ ଯୋଗୁଁ ମହାପ୍ରଭୁଙ୍କ ପହୁଡ଼ ନୀତି ହୋଇନଥିଲା । ରାତିସାରା କାଳିଆ ସାଆନ୍ତଙ୍କ ଦର୍ଶନରେ ନିମଗ୍ନ ରହିଥିଲେ ହଜାର ହଜାର ଶ୍ରଦ୍ଧାଳୁ । ଏପଟେ ସକାଳୁ ଅବକାଶ ନୀତି ପରେ ମହାପ୍ରଭୁଙ୍କ ମନୋହର ତ୍ରିବିକ୍ରମ ବେଶ । ସ୍ୱର୍ଣ୍ଣ ଅଳଙ୍କାର, ମାଳି ଓ ଶ୍ରୀମସ୍ତକରେ ଚୂଳରେ ସଜ୍ଜିତ ହୋଇଛନ୍ତି ମହାପ୍ରଭୁ । ପୁଷ୍ପାଳକ ସେବକଙ୍କ ହାତରେ ଅପୂର୍ବ ଶୋଭା ପାଉଛି ଏହି ଦିବ୍ୟ ବେଶ ।

  • ହୋଇପାରିନି ବାଙ୍କଚୂଡ଼ ବେଶ
ଗତକାଲି ହରି ଉତ୍ଥାପନ ନୀତି ପରେ ଆଜି ଶ୍ରୀମନ୍ଦିରରେ ଅନୁଷ୍ଠିତ ହୋଇଛି ଗରୁଡ଼ ଉତ୍ଥାପନ ନୀତି । ଦ୍ୱାଦଶୀ ତିଥି କ୍ଷୟ ଯୋଗୁଁ ଦ୍ୱାଦଶୀର ଗରୁଡ଼ ଉତ୍ଥାପନ ନୀତି ଏବଂ ତ୍ରୟୋଦଶୀର ତ୍ରିବିକ୍ରମ ବେଶ ଗୋଟିଏ ଦିନରେ ଅନୁଷ୍ଠିତ ହୋଇଛି । ତେବେ ଚଳିତବର୍ଷ ପଞ୍ଚୁକ ଚାରିଦିନିଆ ହୋଇଥିବାରୁ ଦ୍ୱାଦଶୀ ତିଥି କ୍ଷୟ ଯୋଗୁଁ ପାରମ୍ପରିକ ବାଙ୍କଚୂଡ଼ ବେଶ ହୋଇପାରିନାହିଁ । ସେହିପରି ଆସନ୍ତାକାଲି ମହାପ୍ରଭୁଙ୍କ ଲକ୍ଷ୍ମୀନୃସିଂହ ବେଶ । ଆଉ ତା' ପରଦିନ ପବିତ୍ର କାର୍ତ୍ତିକ ପୂର୍ଣ୍ଣିମା । ଭିଡ଼ ନିୟନ୍ତ୍ରଣ ପାଇଁ ବ୍ୟାରିକେଡ୍ ମାର୍କେଟ ଛକ ପର୍ଯ୍ୟନ୍ତ ଲମ୍ବିଥିବା ବେଳେ କାର୍ତ୍ତିକ ପୂର୍ଣ୍ଣିମାରେ ୪୦ ପ୍ଲାଟୁନରୁ ଅଧିକ ପୋଲିସ ଫୋର୍ସ ହେବେ ମୁତୟନ ।

ପଢନ୍ତୁ ଏହି ଖବର: ମହାପ୍ରଭୁ ଶ୍ରୀଜଗନ୍ନାଥଙ୍କ ନାମରେ ସଂଶୋଧନ ହେଲା ୨୯ଟି ପ୍ଲଟ୍‌ର ରେକର୍ଡ ଅଫ୍ ରାଇଟ୍ସ



Argus News App

📱 Get Argus News App

✨
📰 60 Word News🎬 Argus Podcast📺 Live TV and Breaking News🔔 Free Notification Alerts
Download Free: