ଅର୍ଗସ ବ୍ୟୁରୋ : ଧର୍ମ ର ମାସ କାର୍ତ୍ତିକ l କାର୍ତ୍ତିକ ପୂର୍ଣ୍ଣମୀରେ ଭୋର ଭୋରୁ ଓଡ଼ିଆ ମାନେ ପରମ୍ପରା ଅନୁଯାୟୀ ଡ଼ଙ୍ଗା ଭସାଇ ଆସୁଛନ୍ତି । ସାଧବ ପୁଅ ମାନେ ସୁଦୂର ଦରିଆ ପାର ହୋଇ ଜାଭା ସୁମାତ୍ରାକୁ ବଣିଜ ନିମନ୍ତେ ବାହାର ଦେଶକୁ ଯାଉଥିଲେ । ସାଧବ ବୋହୁ ମାନେ ଠିକ ଏହିଦିନରେ ତାଙ୍କୁ ବନ୍ଦାପନା କରି ବିଦାୟ ଦେଉଥିଲେ । ଏହି ସଂସ୍କୃତି ଓ ପରମ୍ପରାକୁ ବଜାୟ ରଖିବା ପାଇଁ କାର୍ତ୍ତିକ ପୂର୍ଣ୍ଣମୀରେ ପ୍ରତ୍ୟେକ ଓଡିଆ ମାନେ ନଦୀ ପୋଖରୀରେ ଡ଼ଙ୍ଗା ଭସାଇଥାନ୍ତି।

ଭଦ୍ରକ ଜିଲ୍ଲା ବନ୍ତ ବ୍ଲକର ବସନ୍ତିଆ,ଦେବତାଗଡ଼ିଆ,ସରମରା,ବିଟିପୁର ସମେତ ବିଭିନ୍ନ ପଞ୍ଚାୟତରେ ମାଳି ପରିବାର ରହିଛନ୍ତି । ଏମାନେ ପୂର୍ବ ପୁରୁଷରୁ ତାଙ୍କର କୌଳିକ ବୃତ୍ତି ଠାକୁରଙ୍କ ଫୁଲ ହାର,ବାହାଘର ମୁକୁଟ,ଆଦି ବିଭିନ୍ନ ଉପକରଣ ସୋଲରେ ତିଆରି କରିଥାନ୍ତି l ବିଶେଷ କରି ପ୍ରତି ବର୍ଷ କାର୍ତ୍ତିକ ପୂର୍ଣ୍ଣିମା ପୂର୍ବରୁ ଘରେ ଘରେ ଡ଼ଙ୍ଗା ତିଆରି କରିବାରେ ବ୍ୟସ୍ତ ରୁହନ୍ତି ଏମାନେ l ପୋଖରୀ ମଝିରୁ ସୋଲ ଆଣି ସେଥିରୁ ଡ଼ଙ୍ଗା ପ୍ରସ୍ତୁତ କରିଥାନ୍ତି ମାତ୍ର ଏବେ ଆଉ ସେତେଟା ସୋଲ ନମିଳିବାରୁ ବଜାରରେ ମିଳୁଥିବା ଥର୍ମକୁଲର ସୋଲରେ ବିଭିନ୍ନ ପ୍ରକାରର ରଙ୍ଗ ବେରଙ୍ଗର ଡ଼ଙ୍ଗା ତିଆରି କରୁଛନ୍ତି ଏହି ଡ଼ଙ୍ଗା କାରିଗର l ୧୦ ଟଙ୍କା ଠାରୁ ଆରମ୍ଭ କରି ୫୦୦ ଟଙ୍କା ପର୍ଯ୍ୟନ୍ତ ଗୋଟିଏ ଡ଼ଙ୍ଗାର ମୂଲ୍ୟରେ ବିକ୍ରୀ କରିଥାନ୍ତି । ପ୍ରତ୍ୟେକ ପରିବାର ପ୍ରତିବର୍ଷ ଡ଼ଙ୍ଗା ତିଆରି କରି ୨ହଜାରରୁ ୩ହଜାର ଟଙ୍କା ଲାଭ କରିଥାନ୍ତି l

ଯେତିକି ପରିଶ୍ରମ କରାଯାଇ ଡ଼ଙ୍ଗା ତିଆରି କରାଯାଉଛି ସେତିକି ମୂଲ୍ୟ ପାଉନଥିବା କହିଛନ୍ତି ଡ଼ଙ୍ଗା କାରିଗର ମାନେ l କେବଳ ବୃତ୍ତିକୁ ବଞ୍ଚାଇ ରଖିବା ପାଇଁ ସେମାନେ ନିଜର କୌଳିକ ବୃତ୍ତିକୁ ଛାଡ଼ି ପାରିନାହାନ୍ତି। ରାଜ୍ୟ ସରକାରଙ୍କ ପକ୍ଷରୁ କୌଣସି ସହାୟତା ମଧ୍ୟ ନାହିଁ ଏମାନଙ୍କ ପ୍ରତି l ଯଦି ସରକାର ଆଗାମୀ ଦିନରେ ଏହି ମାଳି ପରିବାରଙ୍କୁ ସହାୟତା ଯୋଗାଇ ଦିଅନ୍ତେ ତେବେ ଏମାନେ ନିଜର କୌଳିକ ବୃତ୍ତିକୁ ଉଜ୍ଜୀବିତ ରଖି ପାରନ୍ତେ ବୋଲି ମତ ପ୍ରକାଶ ପାଇଛି l

ଅଧିକ ପଢନ୍ତୁ ଓଡିଶା ଖବର...

Argus News | argus news | Odisha Latest News, Breaking News, Trending News, Live TV