ଅର୍ଗସ ବ୍ୟୁରୋ : ଥରେ କି ଦୁଇ ଥର ନୁହଁ...ବାରମ୍ବାର ତ୍ରୁଟି । ଇଂରାଜୀ, ଗଣିତ ପରେ ସଂସ୍କୃତରେ ବି ପ୍ରଶ୍ନପତ୍ର ଭାଇରାଲ ଅଭିଯୋଗ । ଅଭିଭାବକ ଓ ଶିକ୍ଷକ କହିଲେ ପିଲାଙ୍କର ବଢୁଛି ମାନସିକ ଚାପ । ନୂଆ ଟେକ୍ନୋଲୋଜି ବ୍ୟବହାର ସତ୍ତ୍ବେ ଫେଲ୍‌ ମାରିଲା କି ବୋର୍ଡର ଯୋଜନା ? ଆଜି ସକାଳେ ପରୀକ୍ଷାର କିଛି ସମୟ ପରେ ସଂସ୍କୃତ ପ୍ରଶ୍ନପତ୍ରର A ସେଟ୍‌ ପ୍ରଶ୍ନପତ୍ର ଭାଇରାଲ୍ ହେବା ନେଇ ଖବର ଆସିଥିଲା । ମୋବାଇଲରୁ ମୋବାଇଲ subjective  ପ୍ରଶ୍ନପତ୍ରର ଫଟୋ  ଘୁରି ବୁଲିଥିଲା । ତେବେ ପରୀକ୍ଷା ଶେଷ ପରେ ସେଟ୍-Aର ପ୍ରଶ୍ନ ଭାଇରାଲ୍ ପ୍ରଶ୍ନପତ୍ର ସହ ମେଳ ଖାଉଛି ବୋଲି କହିଛନ୍ତି ପରୀକ୍ଷାର୍ଥୀ । 

ସେପଟେ ପ୍ରଶ୍ନପତ୍ର ଭାଇରାଲ ଅଭିଯୋଗକୁ ପୁଣି ଥରେ ଖଣ୍ଡନ କରିଛନ୍ତି ବୋର୍ଡ କର୍ତ୍ତୃପକ୍ଷ । ପରୀକ୍ଷା ଶେଷ ହେବାର କିଛି ସମୟ ପରେ ବୋର୍ଡ ପକ୍ଷରୁ ଏକ ପ୍ରେସ ବିବୃତି ଜାରି କରି କୁହାଯାଇଛି, ତୃତୀୟ ଭାଷା ପରୀକ୍ଷା ସୂଚାର ରୂପେ ଶେଷ ହୋଇଛି । କୌଣସି ଜିଲ୍ଲା ଶିକ୍ଷା ଅଧିକାରୀ ଓ କୌଣସି ପ୍ରାଧିକୃତ ଅଧିକାରୀଙ୍କ ଠାରୁ ଅନିୟମିତତାର ଅଭିଯୋଗ ଆସିନାହିଁ । କୌଣସି ତ୍ରୁଟି ବିଚ୍ୟୁତି ମଧ୍ୟ ପରିଲିକ୍ଷିତ ହୋଇନାହିଁ । ସମସ୍ତ ପରୀକ୍ଷା କେନ୍ଦ୍ର ରେ ଶୃଙ୍ଖଳିତ ଭାବେ ପରୀକ୍ଷା ଶେଷ ହୋଇଛି । ପ୍ରଶ୍ନପତ୍ର ଭାଇରାଲ ପରେ କେବଳ ପରୀକ୍ଷାର୍ଥୀ ନୁହନ୍ତି, ଅଭିଭାବକ ବି ଚିନ୍ତାରେ ।

ଅଧିକ ପଢନ୍ତୁ ଓଡ଼ିଶା ଖବର
 
ମାଟ୍ରିକ ପରୀକ୍ଷାକୁ ଶୃଙ୍ଖଳିତ କରିବାକୁ ଏଥର AI ବ୍ୟବସ୍ଥା ସହ ସିସିଟିଭି ଲାଇଭ କ୍ୟାମେରା ବ୍ୟବହାର କରାଯାଉଛି । ଏତେ କଟକଣା ପରେ ବି ପ୍ରଶ୍ନପତ୍ର କେମିତି ଆସୁଛି ବାହାରକୁ । ପରୀକ୍ଷା ହଲ୍‌ରେ ହିଁ ପ୍ରଶ୍ନପତ୍ର ଖୋଲାଯିବାର ନିୟମ ଅଛି । ତେବେ ପରୀକ୍ଷା ପୂର୍ବରୁ କେମିତି ପ୍ରଶ୍ନପତ୍ର ଲିକ ହେଲା ତାକୁ ନେଇ ଉଠିଛି ବଡ଼ ପ୍ରଶ୍ନ ।