ଆଜି ହେଉଛି ଶେଷ ଦିନ, ସାନ୍ତାଳୀ ସମ୍ପ୍ରଦାୟର ମହାପର୍ବ 'ଦାମୋଦର ମେଳା'
ଅର୍ଗସ ବ୍ୟୁରୋ : ଆଜି ହେଉଛି ଶେଷ ଦିନ । ଆଦିବାସୀ ତଥା ସାନ୍ତାଳୀ ସମ୍ପ୍ରଦାୟର ମହାପର୍ବ 'ଦାମୋଦର ମେଳା' ବା ଦାମୋଦର ପର୍ବ ଶେଷ ଦିନ । ଏଠାରେ ସାମୁହିକ 'ଅସ୍ଥି ବିସର୍ଜନ' ପାଇଁ ଝାଡଖଣ୍ଡ, ପଶ୍ଚିମବଙ୍ଗ ସମେତ ଓଡିଶାର ବିଭିନ୍ନ ପ୍ରାନ୍ତରରୁ ସାନ୍ତାଳ ସମ୍ପ୍ରଦାୟର ଲକ୍ଷାଧିକ ଲୋକଙ୍କ ସମାଗମ ହୋଇଥାନ୍ତି । ରାଜକିୟ ଢଙ୍ଗରେ ରଙ୍ଗବେରଙ୍ଗର ନୂତନ ବସ୍ତ୍ର ପରିଧାନ କରି ମାଦଳ ଓ ଧୁମ୍ସା ସାଙ୍ଗକୁ ବଇଂଶିର ଶୁରେ ଶୁରେ ଗାଁ ମୁଖିଆଙ୍କ ନେତୃତ୍ୱରେ ସାନ୍ତାଳୀ ସଂପ୍ରଦାୟର ଲୋକମାନେ ଦଳଦଳ ହୋଇ ମାଡି ଆସୁଛନ୍ତି । ବୁଢାବଳଙ୍ଗ, ଜରାଳି ଓ ସରାଳି ତିନୋଟି ନଦୀର ସଂଗମ ସ୍ଥଳ ହେଉଛି ଏହି ସୁନାମୁହିଁ ଘାଟ । କୌତୁକିୟା ପୋଷାକ ପରିଧାନ ସହ ପାରମ୍ପାରିକ ବେଶଭୂଷାରେ ନୃତ୍ୟ ପରିବେଷଣ କରୁଥିବା ଯୋଗୁଁ ଏହି ସ୍ଥାନଟି ଏବେ ଉତ୍ସବ ମୁଖର ହୋଇ ଉଠିଛି ।
କାହିଁ କେଉଁ ଅମଳରୁ ମକର ସଂକ୍ରାନ୍ତିର ୨ ଦିନ ପରଠାରୁ ଏଠାରେ ସାନ୍ତାଳ ସମ୍ପ୍ରଦାୟର ସାମୁହିକ ଅସ୍ଥି ବସର୍ଜନ କାର୍ଯ୍ୟ ହୋଇ ଆସୁଅଛି । ସାନ୍ତାଳ ସମ୍ପ୍ରଦାୟରେ ପରିବାରର ବର୍ଷକ ମଧ୍ୟରେ ମୃତ୍ୟୁ ବରଣ କରିଥିବା ବ୍ୟକ୍ତିଙ୍କ ଅସ୍ଥିକୁ ସଂରକ୍ଷିତ କରି ରଖାଯାଥାଏ । ଆଉ ମକର ପର୍ବ ପରେ ଏହି ଘାଟରେ ପାରମ୍ପାରିକ ରିତିନିତିରେ ଅସ୍ଥି ବିସର୍ଜନ କରିଥାନ୍ତି । ସାନ୍ତାଳ ସଂମ୍ପ୍ରଦାୟ ଦାମଦୋର ମେଳାରେ କେବଳ ଯେ ଅସ୍ଥି ବିସର୍ଜନ କରନ୍ତି ତାହା ନୁହେଁ । ସେମାନେ ମୃତ ଲୋକଙ୍କ ଉଦ୍ଦେଶ୍ୟରେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଅର୍ଥାତ୍ ଲୁଗା ପଟା, ବାସନ କୁସନ, ଛେଳି କୁକୁଡାକୁ ଏଠାକୁ ଆସୁଥିବା ଅନ୍ୟ ପରିବାର ସହ ଅଦଳ ବଦଳ କରିଥାନ୍ତି ।
ଅଧିକ ପଢନ୍ତୁ ଓଡ଼ିଶା ଖବର
ଖାଲି ଏତିକି ନୁହଁ ଗରୀବ ଲୋକଙ୍କୁ ଟଙ୍କା ପଇସା, ଚାଉଳ ଆଦି ଦାନ ମଧ୍ୟ କରିଥାନ୍ତି । ଏହା ଦେଖିବା ପାଇଁ ମଧ୍ୟ ବିଭିନ୍ନ ଜାଗାରୁ ଆଦିବାସୀ ମହିଳା ଓ ପୁରୁଷ ମାନେ କାମଧନ୍ଦା ଛାଡି ଏମିତିକି ଚାକାରିରୁ ଛୁଟି ନେଇ ମଧ୍ୟ ଏହି ଦାମୋଦର ଘାଟକୁ ଛୁଟି ଆସିଥାନ୍ତି । ତିନିଦିନ ଧରି ଚାଲୁଥିବା ଏହି ଦାମଦୋର ମେଳା ସୋମବାର ଠାରୁ ଆରମ୍ଭ ହୋଇ ଥିବା ବେଳେ ଆସନ୍ତା ୧୯ତାରିଖ ଏହାର ଅନ୍ତିମ ଦିନ । ପ୍ରତିଦିନ ଏଠାରେ ଲକ୍ଷାଧିକ ଲୋକଙ୍କ ସମାଗମ ଦେଖିବାପଇଁ ମିଳିଥାଏ ।
