Tiger Attack / ସାବଧାନ ମାତିଛି ମହାବଳ; ଦୁଇଟି ଗୋଡ଼କୁ ଛାଡ଼ି ମୁଣ୍ଡ ସହ ଖାଇଗଲା

ହଠାତ ଝାମ୍ପ ମାରିଲା ବେକକୁ ଧରି ଟାଣି ନେଇ ପଳାଇଲା । ଜଙ୍ଗଲ ଭିତରେ ଅତି ଦୟନୀୟ ସ୍ଥିତିରେ ବୃଦ୍ଧଙ୍କୁ ମାରିଲା ମହାବଳ । ବୃଦ୍ଧଙ୍କ ଶରୀରକୁ ଭିଣିଭିଣି କରି ଖାଇଗଲା । ପେଟ ଭରିଗଲା ପରେ କେବଳ ଗୋଡ଼କୁ ଛାଡ଼ି ପଳାଇଛି ବାଘ । ଚାରିଆଡ଼େ ପଡ଼ିଛି ଶରୀର ଦେହାବଶେଷ । ଏମିତି ଜଙ୍ଗଲ ଭିତରେ ଆତଙ୍କ ଖେଳାଇଛି ମହାବଳ ବାଘ । ମଣିଷଖିଆ ବାଘ ଗର୍ଜନ କରି ଜଙ୍ଗଲ ଭିତରେ ବୁଲୁଛି । ଆହୁରି ଗୋଟିଏ ଶିକାର ଖୋଜୁଛି ମହାବଳ । ବୃଦ୍ଧଙ୍କୁ ଗୋଟା ଖାଇଯାଇଛି ମହାବଳ ।

ଏମିତି ଲୋମ ଟାଙ୍କୁରିଗଲା ଭଳି ଦୃଶ୍ୟ ଦେଖିବାକୁ ମିଳିଛି ମୟୂରଭଞ୍ଜ କରଞ୍ଜିଆ ବନଖଣ୍ଡ ଦୁଧିଆଣୀ ରେଞ୍ଜ ପାଖ କୁମୁଡାବାଡ଼ି ଗାଁ ରାଜାମ୍ ସାହି ନିକଟ ଜଙ୍ଗଲରେ । ଆଉ ଏଭଳି ଦୃଶ୍ୟକୁ ଦେଖିଲା ପରେ ଗାଁ ଲୋକେ ଏବେ ଭୟଭୀତ ଅବସ୍ଥାରେ ଅଛନ୍ତି । ଜଙ୍ଗଲ ଭିତରେ ଲୋକମାନେ ବାଘ ଛାଡ଼ି ଯାଇଥିବା ଦୁଇଟି ଗୋଡ଼କୁ ଦେଖି ଡରିଯାଇଛନ୍ତି । ସେହି ଦୃଶ୍ୟ ଏତେ ସମ୍ବେଦନଶୀଳ ଯେ ଯାହାକୁ ଜଣେ ଦେଖିପାରିବା ଅସମ୍ଭବ । ପୂରା ଗାଁ ଜଙ୍ଗଲ ଭିତରେ ଗୋଡ଼କୁ ଦେଖି ଆଶ୍ଚର୍ଯ୍ୟ ହୋଇଯାଇଛନ୍ତି ।

• ଲୁଙ୍ଗିକୁ ଲାଗି ପଡ଼ିଛି ଅଧା ଖିଆ ଗୋଡ଼

ବାଘ ପୂରା ଶରୀରକୁ ଖାଇସାରିଲା ପରେ କେବଳ ୨ଟି ଗୋଡ଼କୁ ଛାଡ଼ି ଚାଲିଯାଇଥିବା ଗାଁ ଲୋକେ ଅଭିଯୋଗ କରିଛନ୍ତି । ମୃତକ ଜଣକ ହେଉଛନ୍ତି ଯଶିପୁର ଥାନା ବସନ୍ତପୁର ଗାଁର ସାଧୁ ନାଏକ । ରବିବାର ସକାଳୁ ଛେଳି ପାଇଁ ଜଙ୍ଗଲକୁ ଡାଳ ଆଣିବାକୁ ଯାଇ ଆଉ ଘରକୁ ଫେରିନଥିଲେ । ସୋମବାର ସକାଳୁ ତାଙ୍କୁ ଖୋଜିବା ପାଇଁ ଜଙ୍ଗଲକୁ ଯାଇଥିବା ବେଳେ ପରିବାର ଲୋକଙ୍କର ଗୋଡ଼ ତଳୁ ମାଟି ଖସି ଯାଇଥିଲା । କାରଣ ଜଙ୍ଗଲ ଭିତରେ ଦୁଇଟି କ୍ଷତାକ୍ତ ଗୋଡ଼ ସହ ତାଙ୍କର ଲୁଙ୍ଗି ଜଙ୍ଗଲରେ ପଡ଼ିଥିବା ଦେଖିବାକୁ ପାଇଥିଲେ ସ୍ଥାନୀୟ ଲୋକେ । ପାରିପାର୍ଶ୍ଵିକ ସ୍ଥିତିକୁ ଦେଖିଲା ପରେ ବାଘ ଖାଇଯାଇଛି ବୋଲି ଗାଁ ଲୋକେ କହିଛନ୍ତି ।

ପଢନ୍ତୁ ଏହି ଖବର: ମଣିଷ-ବାଘ ଲଢ଼େଇ, ଜିତିଲା ମଣିଷ

• ଜଙ୍ଗଲରେ ପହଞ୍ଚି ତଦନ୍ତ କରୁଛି ପୋଲିସ

ସେପଟେ ଘଟଣା ସ୍ଥଳରେ ଯଶିପୁର ପୋଲିସ ଓ ବନବିଭାଗ ପହଁଞ୍ଚି ଅଧିକ ତଦନ୍ତ ଜାରି ରଖିଛି । ବୃଦ୍ଧଙ୍କୁ ବାଘ ଖାଇଛି କି ଅନ୍ୟ କୌଣସି କାରଣରୁ ତାଙ୍କର ମୃତ୍ୟୁ ହୋଇଛି ତାହ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । କାରଣ ବନବିଭାଗବର କହିବା ମୁତାବକ ଏହି ଜଙ୍ଗଲରେ ମଣିଷ ମାନଙ୍କୁ ଖାଇଗଲା ଭଳିଆ ବାଘ ନାହାଁନ୍ତି । ଯଦି ଗାଁ ଲୋକ ଅଭିଯୋଗ କରିଛନ୍ତି ତାହାଲେ ରିପୋର୍ଟ ଆସିଲା ପରେ ସବୁ ଜଣାପଡ଼ିବ ।