Suresh Pujari On Flood / ଭାଙ୍ଗିଲା ବର୍ଷାର ରେକର୍ଡ; ବନ୍ୟାପାଣିରେ ବୁଡ଼ିଲା ୨୯୯ଟି ଗାଁ, ୧୮ଟି ସହରାଞ୍ଚଳ

ଗଞ୍ଜାମ: ବାତ୍ୟା ‘ଅର୍ଣ୍ଣବ’ ପ୍ରଭାବରେ ଗଞ୍ଜାମ ଜିଲ୍ଲାରେ ବନ୍ୟା ସ୍ଥିତି ଗମ୍ଭୀର ହୋଇପଡ଼ିଛି । ବାତ୍ୟାଟି ଓଡ଼ିଶା ଛାଡ଼ି ଛତିଶଗଡ଼ ଆଡ଼କୁ ଅଗ୍ରସର ହୋଇଥିଲେ ବି ଏହାର ପ୍ରଭାବରେ ଜିଲ୍ଲାରେ ରେକର୍ଡ ପରିମାଣର ବର୍ଷା ହୋଇଛି । ପାତ୍ରପୁର ବ୍ଲକରେ ସର୍ବାଧିକ ୫୪୬ ମିଲିମିଟର ବର୍ଷା ରେକର୍ଡ କରାଯାଇଥିବା ବେଳେ ଏହା ଅତୀତର ସବୁ ରେକର୍ଡ ଭାଙ୍ଗିଛି । ଋଷିକୁଲ୍ୟା ନଦୀର ପାଣି ଅଟକାଇବା ପାଇଁ କୌଣସି ବିକଳ୍ପ ବ୍ୟବସ୍ଥା ନଥିବାରୁ ପୁରୁଷୋତ୍ତମପୁର ଠାରେ ନଦୀର ଜଳସ୍ତର ବିପଦ ସଙ୍କେତ ଉପରେ ପ୍ରବାହିତ ହେଉଛି।

• ବନ୍ୟାରେ ୪୨,୫୦୦ରୁ ଊର୍ଦ୍ଧ୍ୱ ଲୋକ ପ୍ରଭାବିତ

ତେବେ ଅପରାହ୍ନ ୩ଟାରୁ ୪ଟା ପର୍ଯ୍ୟନ୍ତ ଜଳସ୍ତର ବୃଦ୍ଧି ପାଇବା ପରେ ସନ୍ଧ୍ୟା ସୁଦ୍ଧା ଧୀରେ ଧୀରେ କମିବ ବୋଲି ଆଶା କରାଯାଉଛି । ଜିଲ୍ଲାର ୨୨ଟି ବ୍ଲକ, ୨୦୮ଟି ଗ୍ରାମ ପଞ୍ଚାୟତ, ୨୯୯ଟି ଗାଁ ଏବଂ ୧୮ଟି ସହରାଞ୍ଚଳ ଏହି ବନ୍ୟାରେ ପ୍ରଭାବିତ ହୋଇଛନ୍ତି । ମୋଟ ୪୨,୫୦୦ରୁ ଊର୍ଦ୍ଧ୍ୱ ଲୋକ ପ୍ରଭାବିତ ହୋଇଥିବା ବେଳେ ୧୧ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି । ୪ଟି ବ୍ଲକର ୭ଟି ପଞ୍ଚାୟତ ଅଧୀନସ୍ଥ ୨୨ଟି ଗାଁ ସମ୍ପୂର୍ଣ୍ଣ ଜଳବନ୍ଦୀ ହୋଇ ରହିଛି । ବିଶେଷ କରି ସାନଖେମୁଣ୍ଡି, ଧରାକୋଟ, ସୋରଡ଼ା ଏବଂ ପୁରୁଷୋତ୍ତମପୁରର ପାଣ୍ଡିଆ ଅଞ୍ଚଳ ଗୁରୁତର ଭାବେ ପ୍ରଭାବିତ ହୋଇଛି । ଧରାକୋଟ ବ୍ଲକର ଦୁଇଟି ଗାଁରେ ବନ୍ୟାଜଳ ପଶିଯିବାରୁ ଲୋକମାନେ ଘର ଛାତ ଉପରେ ଆଶ୍ରୟ ନେଇଛନ୍ତି।

• ହେଲିକପ୍ଟର ମାଧ୍ୟମରେ ଏୟାରଲିଫ୍ଟିଂ

ଜଳବନ୍ଦୀ ଅଞ୍ଚଳରେ ବୋଟ୍ ପହଞ୍ଚିବା କଷ୍ଟକର ହେଉଥିବାରୁ ହେଲିକପ୍ଟର ମାଧ୍ୟମରେ ଏୟାରଲିଫ୍ଟିଂ ଓ ଉଦ୍ଧାର ପାଇଁ ଉଦ୍ୟମ ଜାରି ରହିଛି । ପ୍ରତିକୂଳ ପାଗ ଓ ଆକାଶରେ ପ୍ରବଳ ବାଦଳ ଯୋଗୁଁ କୋଷ୍ଟଗାର୍ଡ ହେଲିକପ୍ଟର ଚକ୍କର ମାରି ଫେରିଆସିଛି, ଓହ୍ଲାଇବା ସମ୍ଭବ ହୋଇନାହିଁ । ପାଗ ଅନୁକୂଳ ହେବା ମାତ୍ରେ ତୁରନ୍ତ ଏୟାରଲିଫ୍ଟିଂ ଆରମ୍ଭ ହେବ । ଏଥିପାଇଁ ମୁଖ୍ୟମନ୍ତ୍ରୀ କେନ୍ଦ୍ର ସରକାର, ନୌସେନା ଓ ବାୟୁସେନା ସହ ଯୋଗାଯୋଗରେ ଅଛନ୍ତି ।

ପଢନ୍ତୁ ଏହି ଖବର: ଋଷିକୂଲ୍ୟାର ତାଣ୍ଡବ; ବନ୍ୟା ପାଣି ଦେଖିବାକୁ ଯାଇ ପାଣିରେ ବୁଡ଼ି ଯୁବକଙ୍କ ମୃତ୍ୟୁ

ଗୋପାଳପୁରର ଗୋଠପାଟଣାଠାରେ ଏକ ନୋଡାଲ ଅଫିସ ଖୋଲାଯାଇ ଉଦ୍ଧାର କାର୍ଯ୍ୟର ତଦାରଖ କରାଯାଉଛି । ଗ୍ରାଉଣ୍ଡରେ ଉଦ୍ଧାର କାର୍ଯ୍ୟକୁ ଜୋରଦାର କରିବା ପାଇଁ ODRF ଟିମ୍ ସଂଖ୍ୟା ୨୭ରୁ ୫୨କୁ ଏବଂ ଅଗ୍ନିଶମ ଟିମ୍ ସଂଖ୍ୟା ୨୪ରୁ ୩୫କୁ ବୃଦ୍ଧି କରାଯାଇଛି । ଏହାସହ ୧୬ଟି ଅଧିକ ବୋଟ୍, ୨୫ଟି ବେସରକାରୀ ବୋଟ୍ ଏବଂ ବନ୍ୟାପାଣି ନିଷ୍କାସନ ପାଇଁ ୫ଟି ହାଇ-ପାୱାର ପମ୍ପ ଗଞ୍ଜାମ ପଠାଯାଇଛି। ଆଗକୁ ଗଞ୍ଜାମ ଜିଲ୍ଲା ପାଇଁ ବର୍ଷାଜନିତ ବଡ଼ ବିପଦର ଆଶଙ୍କା ନାହିଁ ବୋଲି ସୂଚନା ଦେଇଛନ୍ତି ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ।