Minor Girl Rescue / ଗୁହାଳ ଘରୁ ହାତଗୋଡ଼ ବନ୍ଧା ଅବସ୍ଥାରେ ନାବାଳିକା ଉଦ୍ଧାର

ଗୁହାଳ ଘରୁ ହାତଗୋଡ଼ ବନ୍ଧା ଅବସ୍ଥାରେ ନାବାଳିକା ଠାବ । ସ୍ଥାନୀୟ ଲୋକେ ଏପରି ଅବସ୍ଥାରେ ନାବାଳିକାକୁ ଉଦ୍ଧାର କରିଛନ୍ତି । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଗଜପତି ଜିଲ୍ଲା ରା.ଉଦୟଗିରି ଥାନା ଅଞ୍ଚଳରେ । ବିଦ୍ୟାଳୟକୁ ଚପଲ ଆଣିବାକୁ ଯାଇ ଆଉ ଫେରିନଥିଲା ନାବାଳିକା । ବହୁ ସମୟ ପରେ ନାବାଳିକାକୁ ଗୁହାଳ ମାଲିକ ଏପରି ଅବସ୍ଥାରେ ଉଦ୍ଧାର କରି ଘରେ ଖବର ଦେଇଥିଲେ ।

ନାବାଳିକା ଜଣକ ବିଦ୍ୟାଳୟକୁ ଚପଲ ଆଣିବାକୁ ଯିବା ବେଳେ ତାକୁ ଜୋରଜବରଦସ୍ତ ଉଠାଇ ନେଇଥିଲା ଉକ୍ତ ଗ୍ରାମର ଜଣେ ବୃଦ୍ଧ । ଏହାପରେ ନାବାଳିକାକୁ ଏକ ଗୁହାଳ ଘରେ ହାତଗୋଡ଼ ବାନ୍ଧି ଏକ ଝରକା ପାଖରେ ବାନ୍ଧି ରଖିଥିଲା । ପୋଲିସର କହିବାନୁସାରେ, ବୃଦ୍ଧ ଜଣକ ସେଠାରେ ପୂର୍ବରୁ ରହିଥିଲା ଏବଂ ନାବାଳିକାକୁ ଏକା ଦେଖି କୌଶଳ କ୍ରମେ ସେଠାରୁ ଉଠାଇ ଆଣିଥିଲା । ଏହାପରେ ବିଦ୍ୟାଳୟ ନିକଟରେ ଥିବା ଏକ ଗୁହାଳ ଘରେ ହାତଗୋଡ଼ ବାନ୍ଧି ରଖିଥିଲା ।

ପ୍ରତ୍ୟକ୍ଷଦର୍ଶୀ କହିଛନ୍ତି ଯେ ଉକ୍ତ ଗୁହାଳ ଘରକୁ ଗାଈକୁ ପେଜ ଦେବା ପାଁଇ ଗୁହାଳର ମାଲିକ ଯିବାବେଳେ ନାବାଳିକା ହାତଗୋଡ଼ ବନ୍ଧା ହୋଇଥିବା ଦେଖିଥିଲେ । ପ୍ରଥମେ ତ ସେ ଡରିଯାଇଥିଲେ ଓ ପରେ ନାବାଳିକାକୁ ଉଦ୍ଧାର କରିବା ସହିତ ସ୍ଥାନୀୟ ଲୋକଙ୍କୁ ଖବର ଦେଇଥିଲେ ।

ଏ ସମ୍ପର୍କରେ ନାବାଳିକାର ପିତା କହିଛନ୍ତି ଯେ ଉକ୍ତ ଗାଁର ଖ୍ରୀଷ୍ଟିଆନ ସାହିର ଜଣେ ବୃଦ୍ଧ ତାଙ୍କ ଝିଅକୁ ଜୋରଜବରଦସ୍ତ ଉଠାଇ ନେଇଥିଲା । ଏହାପରେ ତାର ପାଟି, ଅଣ୍ଟା, ହାତଗୋଡ଼କୁ ବାନ୍ଧି ଦେଇଥିଲା । ଗୁହାଳ ଘର ନିକଟରୁ ଦୌଡ଼ି ପଳାଉଥିବା ସମୟରେ କିଛି ଲୋକ ଦେଖିଥିବା ମଧ୍ୟ କହିଛନ୍ତି । ପରିବାର ଲୋକଙ୍କଠାରୁ ଖବର ପାଇବା ପରେ ବୃଦ୍ଧ ନିକଟକୁ ଯାଇ ପଚରାଉଚରା କରିଥିଲେ ନାବାଳିକାର ପିତା । ହେଲେ ବୃଦ୍ଧ ଜଣକ ସତ ମାନିନଥିଲା । ତେବେ ଅଭିଯୁକ୍ତ ଜଣକ ପୂର୍ବରୁ ଆଖପାଖ ଗାଁର ଝିଅମାନଙ୍କୁ ଡ଼ରାଇ ଧମକାଇବା ସହ ଏପରି କାମ କରିଥିବା ନାବାଳିକାର ବାପା ଅଭିଯୋଗ କରିଛନ୍ତି । 

ଏହି ଘଟଣାରେ ନାବାଳିକାର ବାପା ରା.ଉଦୟଗିରି ଥାନାରେ ଅଭିଯୋଗ କରିଥିଲେ । ପୋଲିସ ତଦନ୍ତ କରି ୬୨ ବର୍ଷୀୟ ବୃଦ୍ଧକୁ ଥାନାକୁ ଉଠାଇ ଆଣିଛି । ତେବେ ବୃଦ୍ଧ ଜଣକ କାହିଁକି ଏଭଳି କାମ କରିଛି ତାହା ତଦନ୍ତ ପରେ ଜଣାପଡ଼ିବ ବୋଲି ଥାନା ଅଧିକାରୀ ସୂଚନା ଦେଇଛନ୍ତି । 


ଅଧିକ ଖବର ପଢନ୍ତୁ...