Mahanadi Flood / ମହାନଦୀରେ ଆସିଛି ମଧ୍ୟମ ଧରଣର ବନ୍ୟା, ତଳିଆ ଅଞ୍ଚଳରେ ପଶିଲା ପାଣି

ମହାନଦୀରେ ମଧ୍ୟମ ଧରଣର ବନ୍ୟା । ମହାନଦୀରେ ମଧ୍ୟମ ଧରଣର ବନ୍ୟା ଆସିବାର ସୂଚନା ପରେ ଗତକାଲି ସନ୍ଧ୍ୟାରୁ କଟକ ବାଙ୍କୀର ତଳିଆ ଅଞ୍ଚଳଗୁଡ଼ିକରେ ବନ୍ୟା ଜଳ ପ୍ରବେଶ କରିବା ଆରମ୍ଭ ହୋଇଛି । ଶାଖା ନଦୀ ହୂଳୁହୁଳା ଉପରେ ୪ ଫୁଟରୁ ଅଧିକ ପାଣି ଚାଲୁଥିବାରୁ ଏହି ଅଞ୍ଚଳର ଯାତାୟାତ ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଛି ।

ବନ୍ୟାଜଳ ଘେରି ରହିବାରୁ ୬ଟି ପଞ୍ଚାୟତ ବାହ୍ୟ ଜଗତଠାରୁ ସମ୍ପୂର୍ଣ୍ଣ ଭାବେ ବିଚ୍ଛିନ୍ନ ହୋଇପଡ଼ିଛି । ପାଥପୁର ପଞ୍ଚାୟତର କଇଁମୁଣ୍ଡି ଗାଁ ରାସ୍ତା ସମେତ ତାଳବସ୍ତ, ବିଲିପଡ଼ା ଏବଂ ସୁକୁଆଖେଳା ଗାଁ ଭିତରେ ମଧ୍ୟ ବନ୍ୟା ପାଣି ପଶିଯାଇଛି । ତାଳବସ୍ତ-ବିଲିପଡ଼ା ରାସ୍ତାରେ ଯାତାୟାତ ଠପ୍ ହୋଇଥିବାରୁ ଲୋକେ ଜଳବନ୍ଦୀ ଅବସ୍ଥାରେ ରହିଛନ୍ତି । ବନ୍ୟା ପରିସ୍ଥିତି ଗମ୍ଭୀର ରହିଥିବାରୁ ପ୍ରଭାବିତ ଅଞ୍ଚଳରେ ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି ।

ଅଧିକ ପଢ଼ନ୍ତୁ: ନଦୀରେ ହଠାତ୍ ଆସିଲା ସୁଅ; ଗଛରେ ୫ ଜଣ, ଫସିଛନ୍ତି ମୋଟ ୧୩ ଚାଷୀ

ସେହିପରି ବୈତରଣୀ ନଦୀରେ ମଧ୍ୟ ବନ୍ୟା ଆସିଛି । ଲଗାଣ ବର୍ଷା କାରଣରୁ ବୈତରଣୀ ନଦୀର ଜଳସ୍ତର କ୍ରମାଗତ ଭାବେ ବୃଦ୍ଧି ପାଉଛି । ଆଖୁଆପଦା ଆନିକଟ ନିକଟରେ ନଦୀର ବିପଦ ସଂକେତ ୧୮.୩୩ ମିଟର ଥିବାବେଳେ, ସକାଳ ୫ଟା ସୁଦ୍ଧା ଜଳସ୍ତର ବୃଦ୍ଧି ପାଇ ୧୮.୬୦ ମିଟରରେ ପହଞ୍ଚିଛି । ଯାହାକି ବିପଦ ସଂକେତଠାରୁ ବହୁ ଉପରେ ରହିଛି । ନଦୀର ବନ୍ୟାଜଳ କୂଳଲଂଘି ଭଦ୍ରକ ଜିଲ୍ଲାର ଭଣ୍ଡାରିପୋଖରୀ ଏବଂ ଧାମନଗର ବ୍ଲକର ବିଭିନ୍ନ ଗ୍ରାମାଞ୍ଚଳ ଭିତରେ ପ୍ରବେଶ କରିଛି, ଯେଉଁ କାରଣରୁ ବହୁ ପରିବାର ଜଳବନ୍ଦୀ ଅବସ୍ଥାରେ ଅଛନ୍ତି । ବନ୍ୟାଜଳ ବିଭିନ୍ନ ରାସ୍ତାଘାଟ ଉପରେ ଚାରିଆଡ଼େ ପ୍ରବାହିତ ହେଉଥିବାରୁ ସେହି ଅଞ୍ଚଳଗୁଡ଼ିକର ଯାତାୟାତ ଏବଂ ବାହ୍ୟ ଯୋଗାଯୋଗ ସମ୍ପୂର୍ଣ୍ଣ ଭାବେ ଠପ୍ ହୋଇପଡ଼ିଛି ।

ସେହିପରି ବ୍ରାହ୍ମଣୀ ନଦୀରେ ବନ୍ୟା । ଜେନାପୁରରେ ବିପଦ ସଂକେତ ଉପରେ ଜଳସ୍ତର ପହଞ୍ଚିଛି । ବ୍ରାହ୍ମଣୀ ନଦୀରେ ଚଳିତ ବର୍ଷର ପ୍ରଥମ ବନ୍ୟାଜଳ ପ୍ରବେଶ କରିଛି । ଜେନାପୁର ଆନିକଟ ନିକଟରେ ବିପଦ ସଂକେତ ୬୭.୦୦ ଫୁଟ ଥିବା ବେଳେ, ବିଳମ୍ବିତ ରାତି ୧୨ ଟା ସୁଦ୍ଧା ଜଳସ୍ତର ବୃଦ୍ଧି ପାଇ ୬୭.୮୦ ଫୁଟରେ ପହଞ୍ଚିଛି । ଯାହା ବିପଦ ସଂକେତଠାରୁ ଉପରେ ପ୍ରବାହିତ ହେଉଛି । ଜଳସ୍ତର ବୃଦ୍ଧି ପାଇବା କାରଣରୁ ବରୀ ଅଞ୍ଚଳର ବାନ୍ଧଧିଅ ନିକଟରେ ବ୍ରାହ୍ମଣୀ ନଦୀବନ୍ଧରେ ଦୁଇଟି ବଡ଼ଧରଣର ଘାଇ ସୃଷ୍ଟି ହୋଇଛି । ନଦୀବନ୍ଧ ଭାଙ୍ଗି ବାନ୍ଧଧିଅ ପଞ୍ଚାୟତର ଏବଂ ଆଖପାଖର ଅନେକ ଗ୍ରାମ ଭିତରେ ବନ୍ୟା ପାଣି ପ୍ରବେଶ କରିଛି ।