ଭୁବନେଶ୍ଵର: ରଜରେ ରେକର୍ଡ ପର୍ଯ୍ୟଟକ ବୁଲିଲେ ନନ୍ଦନକାନନ । ପହିଲି ରଜରେ ନନ୍ଦନକାନନ ପ୍ରାଣୀ ଉଦ୍ୟାନ ଓ ରାଜ୍ୟ ଉଦ୍ଭିଦ ଉଦ୍ୟାନକୁ ୨୯ ହଜାର ୩୮୦ ପର୍ଯ୍ୟଟକଙ୍କ ଆଗମନ ହୋଇଛି । ଯାହା ନନ୍ଦନକାନନର ପୁରୁଣା ପର୍ଯ୍ୟଟକଙ୍କ ରେକର୍ଡ ଭାଙ୍ଗିଛି ।

ରବିବାର ପ୍ରଥମ ରଜ ପଡ଼ିଥିବା ବେଳେ ଭିଡ଼କୁ ଦୃଷ୍ଟିରେ ରଖି ନନ୍ଦନକାନନ କର୍ତ୍ତୃପକ୍ଷ ସ୍ଵତନ୍ତ୍ର ବ୍ୟବସ୍ଥା ଗ୍ରହଣ କରିଥିଲେ । ପହିଲି ରଜରେ ନନ୍ଦନକାନନରେ ପର୍ଯ୍ୟଟକଙ୍କ ଭିଡ଼ ଦେଖିବାକୁ ମିଳିଛି । ପ୍ରଥମ ରଜରେ ମୋଟ ୨୯ ହଜାର ୩୮୦ ଜଣ ପର୍ଯ୍ୟଟକ ନନ୍ଦନକାନନ ବୁଲି ଦେଖିଛନ୍ତି ।

ଏଥିସହ ପଢ଼ନ୍ତୁ: କିଲର୍ ଟ୍ରକ; ପହିଲି ରଜରେ ଚାଲିଗଲା ୫ ଜଣଙ୍କ ଜୀବନ 

ମୋଟ ୨୯ ହଜାର ୩୮୦ ପର୍ଯ୍ୟଟକ ନନ୍ଦନକାନନ ପ୍ରଥମ ରଜରେ ଆସିଛନ୍ତି । ସେଥିମଧ୍ୟରୁ ୨୭ ହଜାର ୧୯୨ ଜଣ ପର୍ଯ୍ୟଟକ ନନ୍ଦନକାନ ପ୍ରାଣୀ ଉଦ୍ୟାନ ବୁଲି ଦେଖିଛନ୍ତି । ୨ ହଜାର ୧୮୮ ଜଣ ରାଜ୍ୟ ଉଦ୍ଭିଦ ବିଜ୍ଞାନ ପରିଦର୍ଶନ କରିଛନ୍ତି ।

ଗତବର୍ଷଠୁ ଅଧିକ ପର୍ଯ୍ୟଟକ

ଗତବର୍ଷ ରଜ ଅପେକ୍ଷା ଚଳିତବର୍ଷ ରଜରେ ନନ୍ଦନକାନନକୁ ଅଧିକ ସଂଖ୍ୟାରେ ପର୍ଯ୍ୟଟକ ଆସିଛନ୍ତି । ଗତବର୍ଷ ଅପେକ୍ଷା ଏ ବର୍ଷ ପର୍ଯ୍ୟଟକଙ୍କ ସଂଖ୍ୟା ପ୍ରାୟ ସାଢ଼େ ୪ ହଜାର ବୃଦ୍ଧି ପାଇଛି । ଗତବର୍ଷ ରଜରେ ନନ୍ଦନକାନନକୁ ୨୪ ହଜାର ୮୫୬ ଜଣ ପର୍ଯ୍ୟଟକ ଆସିଥିଲେ ।

ପହିଲି ରଜରେ ପର୍ଯ୍ୟଟକଙ୍କ ଭିଡ଼କୁ ଦୃଷ୍ଟିରେ ରଖି କର୍ତ୍ତୃପକ୍ଷ ସୁରକ୍ଷା ବ୍ୟବସ୍ଥାକୁ ଧ୍ୟାନ ଦେଇଛନ୍ତି । ୧୦୪ ଜଣ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି । ଓଆଇଏସ୍ଏଫ୍ ସହ ପୂର୍ବତନ ସେନା ଯବାନଙ୍କୁ ପର୍ଯ୍ୟଟକଙ୍କ ସୁରକ୍ଷା ଓ ସହାୟତା ପାଇଁ ମୁତୟନ କରାଯାଇଛି ।

ଏଥିସହ ପଢ଼ନ୍ତୁ: ସୁଲଭ ମୂଲ୍ୟରେ ଭଡ଼ାଘର ଦେବେ ସରକାର ! ଆସୁଛି ନୂଆ ପଲିସି 

ଏବେ ରାଜ୍ୟରେ ଖରା ଲାଗି ରହିଥିବାରୁ କର୍ତ୍ତୃପକ୍ଷ ପ୍ରାଣୀ ଉଦ୍ୟାନ ଭିତରେ ପିଇବା ପାଣିର ବ୍ୟବସ୍ଥା କରିଛନ୍ତି । ନନ୍ଦନକାନନ ମଧ୍ୟରେ ମୋଟ ୩୧ଟି ସ୍ଥାନରେ ପିଇବା ପାଣି ବ୍ୟବସ୍ଥା ହୋଇଛି । ଯେଉଁଥିରୁ ୧୩ଟି ସ୍ଥାୟୀ ପଏଣ୍ଟ ଥିବାବେଳେ ୧୮ଟି ଅସ୍ଥାୟୀ ପଏଣ୍ଟ କରାଯାଇଛି ।

ସୋମବାର ଖୋଲା, ମଙ୍ଗଳବାର ବନ୍ଦ

ରଜରେ ପର୍ଯ୍ୟଟକଙ୍କ ଭିଡ଼କୁ ଦୃଷ୍ଟିରେ ରଖି କର୍ତ୍ତୃପକ୍ଷ ସୋମବାର ନନ୍ଦନକାନନ ଖୋଲା ରଖିବାକୁ ନିଷ୍ପତ୍ତି ନେଇଛନ୍ତି । ସାଧାରଣତଃ ସୋମବାର ନନ୍ଦନକାନନ ବନ୍ଦ ରହିଥାଏ । କିନ୍ତୁ ଜୁନ୍ ୧୫ ସୋମବାର ଦ୍ଵିତୀୟ ରଜ ପାଇଁ ନନ୍ଦନକାନନ ପ୍ରାଣୀ ଉଦ୍ୟାନ ସହ ରାଜ୍ୟ ଉଦ୍ଭିଦ ଖୋଲା ରହିବ । ମଙ୍ଗଳବାର ଜୁନ୍ ୧୬ରେ ବନ୍ଦ ରହିବ ନନ୍ଦନକାନନ ।