ମୃତ କୃଷକଙ୍କ ଖେତରେ ନିଜେ ବୋରୱେଲ ଖୋଳିଲେ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର
ଅର୍ଗସ ବ୍ୟୁରୋ : ନୟାଗଡ଼ ଜିଲ୍ଲା ରଣପୁର ବିଧାନସଭାର ଚାନ୍ଦପୁର ଥାନା ଅଧୀନସ୍ଥ ଓସ୍ତପଡ଼ା ଗ୍ରାମର କୃଷକ ଗୋବିନ୍ଦ ସାହୁ ଋଣ ଭାର ଯୋଗୁଁ ଗତ ନଭେମ୍ବର ମାସ ୪ ତାରିଖ ଆତ୍ମହତ୍ୟା କରିଥିଲେ । ସେ ଚାଷ କାମ ପାଇଁ ଋଣ ନେଇଥିଲେ କିନ୍ତୁ ମୌସୁମୀ ବର୍ଷା ଆବଶ୍ୟକ ପରିମାଣରେ ନ ହେବା କାରଣରୁ ସେ ଫସଲ ଅମଳ କରି ନ ପାରି ଋଣ ପରିଶୋଧ କରିବାରେ ଅସମର୍ଥ ହୋଇଥିଲେ ।
ସେହି ଅଞ୍ଚଳରେ ଚାଷୀମାନେ ବହୁ ଅର୍ଥ ବ୍ୟୟ କରି କ୍ଷେତକୁ ପାଣି ମଡ଼ାଉଥିବା ବେଳେ ଅର୍ଥାଭାବ ଯୋଗୁଁ ଗୋବିନ୍ଦ ତାଙ୍କ ଜମିକୁ ପାଣି ମଡ଼ାଇବାରେ ଅସମର୍ଥ ହୋଇଥିଲେ । ତେଣୁ ସେ ଏକ ମାସ ଧରି ଚିନ୍ତାଗ୍ରସ୍ତ ଥିଲେ । ଆଖି ଆଗରେ ଚାଷ ଜମି ଫାଟି ଆଁ କରି ଧାନକ୍ଷେତ ଉଜୁଡି ଯାଇଥିବାରୁ ଋଣ କିପରି ଶୁଝିବେ ଓ ପରିବାର ପ୍ରତିପୋଷଣ କରିବା ଅସମ୍ଭବ ହୋଇ ପଡ଼ିବା ଅନୁଭବ କରି ସେ ଆତ୍ମହତ୍ୟା କରିଥିବା ଅଭିଯୋଗ ହୋଇଥିଲା । ସ୍ଥାନୀୟ ପ୍ରଶାସନିକ ଅଧିକାରୀ କିମ୍ବା ଜଳସେଚନ ବିଭାଗ ଅଧିକାରୀମାନେ ଏହାର ନିରାକରଣ ପାଇଁ କୌଣସି ପଦକ୍ଷେପ ଗ୍ରହଣ କରୁ ନଥିବାରୁ ଏହି ଅଞ୍ଚଳରେ ହତାଶା ଭାବ ଦେଖାଦେଇଛି ।
ଅଧିକ ପଢନ୍ତୁ ଓଡ଼ିଶା ଖବର
📱 Get Argus News App
✨କୃଷକ ଗୋବିନ୍ଦ ସାହୁଙ୍କ ଆତ୍ମହତ୍ୟା ସମ୍ଵନ୍ଧରେ ସ୍ଥାନୀୟ କାର୍ଯ୍ୟକର୍ତ୍ତାଙ୍କ ମାଧ୍ୟମରେ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର ଖବର ପାଇଲା ପରେ ସେ ନିଜେ ଯାଇ ଗୋବିନ୍ଦ ସାହୁଙ୍କ ପରିବାର ସହ ସାକ୍ଷାତ କରି ସମବେଦନା ଜଣାଇଥିଲେ ଓ ତାଙ୍କ ଧାନକ୍ଷେତରେ ବୋରୱେଲ ଖୋଳିବା ପାଇଁ ପ୍ରତିଶୃତି ଦେଇଥିଲେ । ଆଜି ସମ୍ବିତ ପାତ୍ର ନିଜ ପ୍ରତିଶୃତି ପାଳନ କରି ସ୍ୱର୍ଗୀୟ ଗୋବିନ୍ଦ ସାହୁଙ୍କୁ ଶ୍ରଦ୍ଧାଞ୍ଜଳୀ ଦେଇ ତାଙ୍କ ଖେତରେ ବୋରୱେଲ ଖୋଳିଛନ୍ତି ।
ଏହି ସମୟରେ ଗୋବିନ୍ଦ ସାହୁଙ୍କ ପରିବାର ସହ ରଣପୁର ବିଧାନସଭାର ଭାରତୀୟ ଜନତା ପାର୍ଟିର ନେତ୍ରୀ ସୁରମା ପାଢ଼ୀ ଓ ନୟାଗଡ଼ ଜିଲ୍ଲା ବିଜେପି ସଭାପତି ତାପସ ମାର୍ଥା ଓ କର୍ମୀମାନେ ତଥା ଯୋଗଦେଇଥିଲେ । ସ୍ୱର୍ଗୀୟ କୃଷକ ଗୋବିନ୍ଦ ସାହୁଙ୍କ ଧାନକ୍ଷେତରେ ବୋରୱେଲ ଖୋଳିଥିବାରୁ ସ୍ଥାନୀୟ ଚାଷୀ ଖୁସିବ୍ୟକ୍ତ କରିଛନ୍ତି ଓ ସମ୍ବିତ ପାତ୍ରଙ୍କୁ ଧନ୍ୟବାଦ ଦେଇଛନ୍ତି । ଏହି ବୋରୱେଲ ଯୋଗୁଁ ଚାଷୀ ମାନଙ୍କର ଆଉ ଖରାଦିନେ ପାଣିର ଅଭାବ ରହିବ ନାହିଁ । ବୋରୱେଲରୁ ପାଇପ ଯୋଗେ ଚାଷୀ ମାନେ ପାଣି ନେଇ ଚାଷ କରିପାରିବେ ଓ ପାଣି ଅଭାବରୁ କୌଣସି ଚାଷୀ ଆତ୍ମହତ୍ୟା କରିବେ ନାହିଁ ବୋଲି ସମ୍ବିତ ପାତ୍ର ନିଜ ପ୍ରତିକ୍ରିୟାରେ କହିଛନ୍ତି । ସମ୍ବିତ ପାତ୍ରଙ୍କ ଉଦ୍ୟମରେ ବୋରୱେଲ ଖୋଲାଯିବା ଖବର ସ୍ଥାନୀୟ ଅଞ୍ଚଳରେ ପ୍ରଚାରିତ ହେବା ଅଞ୍ଚଳବାସୀ ସମ୍ବିତ ପାତ୍ରଙ୍କୁ ଧନ୍ୟବାଦ୍ ଜଣାଇଛନ୍ତି ।