Bus Accident / ଗଛରେ ପିଟିହେଲା ୪୦ ଯାତ୍ରୀଙ୍କୁ ନେଇ ଭୁବନେଶ୍ଵର ଯାଉଥିବା ବସ୍

ନୟାଗଡ଼: ଭୀଷଣ ବସ୍ ଦୁର୍ଘଟଣା । ଜାତୀୟ ରାଜପଥ କଡ଼ରେ ଥିବା ଗଛରେ ପିଟି ହେଲା ବସ୍ । ଚାଲିଗଲା ବସ୍ ଡ୍ରାଇଭରଙ୍କ ଜୀବନ । ୪୦ରୁ ଅଧିକ ଆହତ, ୨ ଯାତ୍ରୀ ଗୁରୁତର । ଶୁକ୍ରବାର ଅପରାହ୍ଣରେ ନୟାଗଡ଼ ଜିଲ୍ଲା ଇଟାମାଟି ଥାନା ଅନ୍ତର୍ଗତ ବାଉଁଶିଆପଡ଼ା ନିକଟରେ ବଡ଼ ଧରଣର ବସ୍ ଦୁର୍ଘଟଣା ଘଟିଛି ।

ଗଛକୁ ଧକ୍କା ଦେଇ ଦୁର୍ଘଟଣାଗ୍ରସ୍ତ ହୋଇଛି ଅନ୍ନପୂର୍ଣ୍ଣା ନାମକ ଏକ ଘରୋଇ ବସ୍ । ସୂଚନା ଅନୁସାରେ, ଘରୋଇ ବସ୍‌ଟି ନୟାଗଡ଼ରୁ ୪୦ରୁ ଅଧିକ ଯାତ୍ରୀଙ୍କୁ ଭୁବନେଶ୍ୱର ଅଭିମୁଖେ ବାହାରିଥିଲା । ବାଉଁଶିଆପଡ଼ା ନିକଟରେ ହଠାତ୍ ଭାରସାମ୍ୟ ହରାଇ ରାସ୍ତାକଡ଼ରେ ଥିବା ଗଛରେ ପିଟି ହୋଇଥିଲା ବସ୍‌ଟି ।

ଏଥିସହ ପଢ଼ନ୍ତୁ: ଦୁର୍ଘଟଣା କ୍ଷେତ୍ରରେ ଛାତ୍ରଛାତ୍ରୀଙ୍କୁ ମିଳିବ ଆର୍ଥିକ ସହାୟତା; ବିଦ୍ୟାଳୟ ଓ ଗଣଶିକ୍ଷା ବିଭାଗର ବିଜ୍ଞପ୍ତି 

ଦୁର୍ଘଟଣା ପରେ ବସ୍‌ ଭିତରେ ଥିବା ଯାତ୍ରୀଙ୍କ ମଧ୍ୟରେ ଆତଙ୍କ ଖେଳି ଯାଇଥିଲା । ଯାତ୍ରୀମାନେ ଜୀବନ ବିକଳରେ ଚିତ୍କାର କରିଥିଲେ । ସ୍ଥାନୀୟ ଲୋକେ ଓ ସେହି ରାସ୍ତାରେ ଯାଉଥିବା ଯାତ୍ରୀ ଦୁର୍ଘଟଣା ନେଇ ପୋଲିସ ଓ ଅଗ୍ନିସମ ବାହିନୀକୁ ସୂଚନା ଦେଇଛନ୍ତି ।

ସମସ୍ତଙ୍କୁ ବସ୍‌ରୁ ଉଦ୍ଧାର କରାଯାଇ ନୟାଗଡ଼ ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଯାଇଛି । ଆହତମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଅତ୍ୟନ୍ତ ଗୁରୁତର ଥିବାରୁ ପ୍ରାଥମିକ ଚିକିତ୍ସା ପରେ ଭୁବନେଶ୍ଵର ସ୍ଥାନାନ୍ତର କରାଯାଇଛି । ଏହି ଭୀଷଣ ଦୁର୍ଘଟଣାରେ ବସ୍ ଡ୍ରାଇଭରଙ୍କ ମୃତ୍ୟୁ ହୋଇଥିବା ସୂଚନା ରହିଛି ।

ବସ୍‌ର ସମ୍ମୁଖ ଭାଗ ଗଛରେ ପିଟି ହୋଇ କ୍ଷତିଗ୍ରସ୍ତ ହୋଇଛି । ବସ୍ ଷ୍ଟିୟରିଂ ଡ୍ରାଇଭରଙ୍କ ସିଟ୍‌ ଉପରକୁ ଚାଲି ଆସିବା ଦର୍ଶାଉଛି, ଦୁର୍ଘଟଣା କେତେ ଯେ ଭୟାବହ ଥିଲା । ଡ୍ରାଇଭର୍, ବସ୍‌ର ଷ୍ଟିୟରିଂରେ ଚାପି ହୋଇ ଯାଥିଲେ । ବସ୍‌ର ଆକ୍ସିଲେଟର୍ ପାଖରେ ଡ୍ରାଇଭରଙ୍କ ଚପଲ ପଡ଼ିଥିବା ଦେଖିବାକୁ ମିଳିଛି । ଦୁର୍ଘଟଣା ପରେ ଇଟାମାଟି ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।

ଏଥିସହ ପଢ଼ନ୍ତୁ: ସ୍ୱାମୀ ଲକ୍ଷ୍ମଣାନନ୍ଦ ସରସ୍ବତୀଙ୍କ ହତ୍ୟା ପଛରେ ଷଡ଼ଯନ୍ତ୍ର ? ବଡ଼ ବୟାନ ଦେଲେ ଆଇନ ମନ୍ତ୍ରୀ 

ସେହି ରାସ୍ତା ଦେଇ ଭୁବନେଶ୍ଵରରୁ ନୟାଗଡ଼ ଫେରୁଥିଲେ ବିଧାୟକ ଅରୁଣ ସାହୁ । ସେ ଆହତଙ୍କୁ ଉଦ୍ଧାର କରିଥିଲେ । ଅରୁଣ ସାହୁ କହିଛନ୍ତି, "ଗଛଟି ବସ୍ ଭିତରକୁ ପ୍ରାୟ ୪ରୁ ୫ ଫୁଟ୍ ପଶି ଯାଇଛି । ସବୁ ଯାତ୍ରୀ କାନ୍ଦବୋବାଳି କରୁଥିଲେ । ଏମରଜେନ୍ସି ଡୋର୍ ଖୋଲି ଯାତ୍ରୀଙ୍କୁ ଉଦ୍ଧାର କଲୁ । ଅନେକ ଯାତ୍ରୀଙ୍କ ଗୋଡ଼ରେ ରଡ୍ ପଶି ଯାଇଥିଲା । ବସ୍‌ଟି ଦ୍ରୁତଗତିରେ ଯାଉଥିବାରୁ ଦୁର୍ଘଟଣା ଘଟିଛି ।"