Crime In Odisha / ଦୁଷ୍କର୍ମ ଅଭିଯୁକ୍ତ ଶ୍ରୀଧର ପଣ୍ଡା ବିରୋଧରେ ଲାଗିଲା BNSର ସଙ୍ଗୀନ ଦଫା

ଭୁବନେଶ୍ୱର: ନୟାପଲ୍ଲୀ ଥାନା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଥିବା ବନ୍ଧୁକ ମୁନରେ ଯୁବତୀଙ୍କୁ ଦୁଷ୍କର୍ମ ଘଟଣାରେ ପୋଲିସ କାର୍ଯ୍ୟାନୁଷ୍ଠାନକୁ ଜୋରଦାର କରିଛି । ମୁଖ୍ୟ ଅଭିଯୁକ୍ତ ଶ୍ରୀଧର ପଣ୍ଡା ବିରୋଧରେ ଏକାଧିକ ସଙ୍ଗୀନ ଓ ସାଂଘାତିକ ଦଫା ଲଗାଯାଇଥିବା ବେଳେ ଖୁବଶୀଘ୍ର ଚାର୍ଜସିଟ୍ ଦାଖଲ ପାଇଁ ପ୍ରସ୍ତୁତି ଚାଲିଛି ।

ଦୁଷ୍କର୍ମ ଅଭିଯୁକ୍ତ ଶ୍ରୀଧର ପଣ୍ଡା ବିରୋଧରେ ଲାଗିଲା ସଙ୍ଗୀନ ଓ ସାଂଘାତିକ ଦଫା । BNSର ଧାରା ୬୪(୧) ଅର୍ଥାତ୍ ଦୁଷ୍କର୍ମ କରିବା, ୩୩୨(ବି) ଘରେ ପଶି କ୍ରାଇମ୍ କରିବା ଏବଂ ୩୫୧(୩) ଅନୁଯାୟୀ ଜୀବନରୁ ମାରିଦେବାକୁ ଧମକ ଦେବା ଭଳି ସଙ୍ଗୀନ ଦଫା ଲଗାଇଛି ନୟାପଲ୍ଲୀ ଥାନା ପୋଲିସ ।

ଏଥିସହ ପଢ଼ନ୍ତୁ: ହୋଟେଲ ସମ୍ମୁଖରେ ମାତାଲ ଯୁବକ ଯୁବତୀଙ୍କ ଉନ୍ମତ୍ତକାଣ୍ଡ, ଘଣ୍ଟାଏ କାଳ ନିଶାସକ୍ତ ଅବସ୍ଥାରେ କଲେ ହାଇଡ୍ରାମା 

ଅଭିଯୁକ୍ତ ବିରୋଧରେ ଦୃଢ଼ ତଥ୍ୟ ଓ ପ୍ରମାଣ ଯୋଗାଡ଼ କରିବା ସହ ସାଇଣ୍ଟିଫିକ୍ ଟିମ୍ ଜରିଆରେ ତଦନ୍ତ ଜାରି ରଖିଛି ତଦନ୍ତକାରୀ ଟିମ୍ । ଖୁବଶୀଘ୍ର କୋର୍ଟରେ ଚାର୍ଜସିଟ୍ ଦାଖଲ କରିବାକୁ ପୋଲିସ ଯୋଜନା ରଖିଛି ।

ସେପଟେ ଜେଲରେ ଅଭିଯୁକ୍ତର ହେବ ଟି.ଆଇ ପରେଡ୍ । ପୀଡ଼ିତା ବା ସାକ୍ଷୀ ଅଭିଯୁକ୍ତକୁ ଚିହ୍ନଟ କରିବେ । ଅଭିଯୁକ୍ତର ପରିଚୟ ନିଶ୍ଚିତ କରିବା ପାଇଁ TI ପରେଡ୍ ହୁଏ । ଜେଲ୍‌ରେ ମାଜିଷ୍ଟ୍ରେଟ୍‌ଙ୍କ ତତ୍ତ୍ଵାବଧାନରେ ଏହି ପ୍ରକ୍ରିୟା କରାଯାଏ । ଅଭିଯୁକ୍ତଙ୍କ ସହ ସମାନ ଦେଖାଯାଉଥିବା ଅନ୍ୟ କିଛି ବ୍ୟକ୍ତିଙ୍କୁ ମିଶାଇ ଏହି ପରେଡ୍ କରାଯାଏ ।

ପରେ ଘଟଣାର ସାକ୍ଷୀଙ୍କୁ ଅଲଗା ଭାବେ ଅଣାଯାଇ ପରେଡ୍‌ରେ ଥିବା ଲୋକଙ୍କ ମଧ୍ୟରୁ ଅଭିଯୁକ୍ତଙ୍କୁ ଚିହ୍ନଟ କରିବାକୁ କୁହାଯାଏ । ସାକ୍ଷୀ ଚିହ୍ନଟ କଲେ ମାଜିଷ୍ଟ୍ରେଟ୍ ସେହି ପରିଚୟକୁ ରେକର୍ଡ କରନ୍ତି । ତେବେ ଟି.ଆଇ. ପରେଡ୍‌ କେବଳ ତଦନ୍ତ ସମୟରେ ପରିଚୟ ଯାଞ୍ଚର ଏକ ପ୍ରକ୍ରିୟା ଅଟେ, ଏହା ସିଧାସଳଖ ଅଭିଯୁକ୍ତ ଦୋଷୀ ବୋଲି ପ୍ରମାଣ କରେ ନାହିଁ ।

ଏଥିସହ ପଢ଼ନ୍ତୁ: ଚୋରି କରିବାକୁ ଯାଇ ଖେଳନା ବନ୍ଧୁକ ଦେଖାଇ କରିଥିଲା ଦୁଷ୍କର୍ମ; ଏବେ ପୋଲିସ ଗୁଳିରେ ହେଲା ଘାଇଲା

ଗତ ୩୦ ତାରିଖରେ ଅଭିଯୁକ୍ତ ଶ୍ରୀଧର ନୟାପଲ୍ଲୀ ଅଞ୍ଚଳରେ ଜଣେ ଯୁବତୀଙ୍କ ଘରେ ପଶି ବନ୍ଧୁକ ଦେଖାଇ ଭୟଭୀତ କରାଇ ଦୁଷ୍କର୍ମ କରିଥିଲା । ଘଟଣାର ମାତ୍ର ୪୮ ଘଣ୍ଟା ମଧ୍ୟରେ ପୋଲିସ ଅଭିଯୁକ୍ତକୁ ଏନକାଉଣ୍ଟର କରିଥିଲା । ବର୍ତ୍ତମାନ ଅଭିଯୁକ୍ତ ସୁସ୍ଥ ହେବା ପରେ ତାକୁ କୋର୍ଟ ଚାଲାଣ କରିଛି ପୋଲିସ ।

ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ଥାନା ଅଞ୍ଚଳର ୨୪ ବର୍ଷୀୟ ସନ୍ତୋଷ ଓରଫ ଶ୍ରୀଧର ପଣ୍ଡା । ରହୁଥିଲା ମଞ୍ଚେଶ୍ୱର ଥାନା ଅଧୀନ ଚକେଇସିଆଣିରେ । ପୋଲିସ ରେକର୍ଡ କହୁଛି, ସନ୍ତୋଷ ଜଣେ ପେଶାଦାର ଅପରାଧୀ । ସେ ପୂର୍ବରୁ ମଧ୍ୟ ଏକାଧିକ ଚୋରି ଓ ଲୁଟ୍ ମାମଲାରେ ଜେଲ୍ ଯାଇସାରିଛି ।