ପୂର୍ବତନ ମନ୍ତ୍ରୀ ତଥା ସୁକିନ୍ଦା ପୂର୍ବତନ ବିଧାୟକ ପ୍ରୀତି ରଞ୍ଜନ ଘଡ଼େଇ ଓରଫ ଡାନିଙ୍କ ଖରିଆର୍ ସ୍ଥିତ ଭଡ଼ା ଘରେ ରେଡ୍ କରିଛି ନୂଆପଡ଼ା ପୋଲିସ । ଉପନିର୍ବାଚନରେ ଖର୍ଚ୍ଚ ପାଇଁ ନବୀନଙ୍କ ଗସ୍ତ ପୂର୍ବରୁ ବିଜେଡିର ୫ କୋଟି ହୱାଲା ଟଙ୍କା ଆସିଥିବା ଗୁଇନ୍ଦା ସୂଚନା ମିଳିବା ପରେ ଡାନିଙ୍କ ସମେତ ଏକାଧିକ ବିଜେଡି ନେତାଙ୍କ ଘରେ ପୋଲିସ ଚଢ଼ାଉ କରିଛି । ବିଜେଡିର ନିର୍ବାଚନ ପ୍ରଚାରରେ ଅଛନ୍ତି ପ୍ରୀତିରଞ୍ଜନ। ରେଡ୍‌ ବେଳେ କେୟାରଟେକର ଓ ପୋଲିସ ମଧ୍ୟରେ ଧସ୍ତାଧସ୍ତି ହୋଇଥିଲା। ଚଢ଼ାଉକୁ ବେଆଇନ କହିବା ଭୟରେ ଏପରି କରାଯାଉଥିବା କହିଛି ବିଜେଡି । ଯାହାର ଜବାବ ରଖିଛି ବିଜେପି ।

ନଭେମ୍ବର ୩ରେ ନୂଆପଡ଼ା ଆସି କାଣ୍ଡତିରା ପଂଚାୟତରେ ଜନସଭା କରିବେ ବିଜେଡି ସୁପ୍ରିମୋ। ନବୀନଙ୍କ ଗସ୍ତ ପୂର୍ବରୁ ଏହି କାଣ୍ଡତିରା ପଂଚାୟତରେ ମିଶ୍ରଣ ପର୍ବ କରିଛି ବିଜେପି । ପଦ୍ମ ଧରିଛନ୍ତି ଜଣେ ସରପଞ୍ଚ ଓ ୧୧ ଜଣ ୱାର୍ଡସଭ୍ୟ । ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାଏକଙ୍କ ସହ ବିଧାୟକ ବାବୁ ସିଂ ଓ ଅନ୍ୟ ବିଜେପି ନେତାଙ୍କ ଉପସ୍ଥିତିରେ ବିଜେପିରେ ଯୋଗ ଦେଇଛନ୍ତି ଶହ ଶହ ବିଜେଡି କର୍ମୀ ।

ଏଥିସହ ପଢ଼ନ୍ତୁ: ପ୍ରୀତିରଞ୍ଜନ ଘଡେଇଙ୍କ ଘରେ ଚଢାଉ, ରେଡ୍‌ ବେଳେ କେୟାରଟେକର ଓ ପୋଲିସ ମଧ୍ୟରେ ଧସ୍ତାଧସ୍ତି

ଅନ୍ୟପଟେ ଜିଲ୍ଲାପାଳ ଓ SPଙ୍କୁ ବିରୋଧ କରିବା ସହ ସରକାରୀ ଅଧିକାରୀମାନେ ସରକାରୀ କଳର ଅପବ୍ୟବହାର କରୁଥିବା ଅଭିଯୋଗରେ ବିଜେଡି ପକ୍ଷରୁ ନୂଆପଡ଼ା ଜିଲ୍ଲାପାଳଙ୍କ ଅଫିସ୍ ଘେରାଉ କରାଯାଇଛି । କାଉଣ୍ଟରରେ ବିଜେପି କହିଛି ସରକାରରେ ଥିବା ବେଳେ ବିଜେଡିର ନିଜ ପୁରୁଣା କାମ କଥା ମାନେ ପଡୁଛି । ତଥ୍ୟ ଥିଲେ ନିର୍ବାଚନ କମିଶନଙ୍କ ପାଖକୁ ଯାଉ ଶଙ୍ଖ ଦଳ।

ସେପଟେ ନୂଆପଡ଼ା ଉପ-ନିର୍ବାଚନରେ ଜମୁଛି ପ୍ରଚାର । ପ୍ରଚାର ପାଇଁ ପରସ୍ପରକୁ ଟକ୍କର ଦେଉଛନ୍ତି ଦଳୀୟ ପ୍ରାର୍ଥୀ । ବିଜେପି ପକ୍ଷରୁ ବିଧାୟକ, ମନ୍ତ୍ରୀ, ସାଂସଦ ମାନେ ବିଭିନ୍ନ ସ୍ଥାନରେ ନିର୍ବାଚନୀ ସଭା କରୁଥିବା ବେଳେ ମିଶ୍ରଣ ପର୍ବ ଓ ଡୋର ଟୁ ଡୋର କ୍ୟାମ୍ପେନିଂ କରୁଛନ୍ତି । ବିଜେପିର ବିଧାୟକ ପ୍ରାର୍ଥୀ ଜୟ ଢୋଲକିଆ ଘରକୁ ଘର ବୁଲି ନିଜ ପାଇଁ ଭୋଟ ମାଗିଛନ୍ତି ।

ସେହିପରି କଂଗ୍ରେସର ବିଧାୟକ ପ୍ରାର୍ଥୀ ଘାସିରାମ ମାଝୀ ଧାନ ବିଲରେ ଧାନ କାଟୁଥିବାର ଚିତ୍ର ଦେଖିବାକୁ ମିଳିଛି । କ୍ଷେତରେ ପହଞ୍ଚି ପୁସିଙ୍ଗ କାର୍ଡ ଦେଇ ଚାଷୀ ମାନଙ୍କୁ ଭୋଟ ଦେବା ପାଇଁ ଅନୁରୋଧ କରିଛନ୍ତି ଘାସିରାମ । ସେପଟେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ଧରି ବିଜେଡିର ବହୁ ହେଭିୱେଟ ନେତା ବିଜେଡି ପାଇଁ ଭୋଟ ମାଗୁଛନ୍ତି ।

ଅଧିକ ପଢ଼ନ୍ତୁ ରାଜନୀତି ଖବର: