Cargo Ship Missing / ମଝି ସମୁଦ୍ରରେ ନିଖୋଜ ହୋଇଗଲା ମାଲବାହୀ ଜାହାଜ, ୨୪ କ୍ରୁ' ସଦସ୍ୟଙ୍କୁ ନେଇ ବଢ଼ିଲା ଚିନ୍ତା

ପାରାଦୀପରୁ ସିଙ୍ଗାପୁର ଯାଉଥିଲା ମାଲବାହୀ ଜାହାଜ, ମଝି ସମୁଦ୍ରରେ ନିଖୋଜ । ପାରାଦୀପରୁ ଲୁହାପଥର ବୋଝେଇ କରି ସିଙ୍ଗାପୁର ଯାଉଥିବା ଜାହାଜ ‘ଓସେନ୍‌ ୱିନର୍‌’ ସମୁଦ୍ରରେ ନିଖୋଜ ହୋଇଯାଇଛି । ଜାହାଜ ସହ ଯୋଗାଯୋଗ ସମ୍ଭବ ହୋଇପାରୁନଥିବା ବେଳେ ଏହା କୌଣସି ପ୍ରକାର ଦୁର୍ଘଟଣାର ଶିକାର ହୋଇ ବୁଡ଼ି ଯାଇଥିବା ସନ୍ଦେହ କରାଯାଉଛି ।

ସୂଚନା ଅନୁସାରେ, ପାଖାପାଖି ୭୫ ହଜାର ମେଟ୍ରିକ ଟନ୍‌ କ୍ଷମତା ବିଶିଷ୍ଟ ଏହି ଜାହାଜ ୨୦ ତାରିଖ ରାତି ପ୍ରାୟ ସାଢ଼େ ଦଶଟା ବେଳେ ପାରାଦୀପ ବନ୍ଦରରୁ ଲୁହାପଥର ବୋଝେଇ କରି ଚୀନ ଅଭିମୁଖେ ବାହାରି ଥିଲା । ପାନାମା ପତାକା ଥିବା ଏହି ଜାହାଜରେ ୨୦ ଜଣ ଚୀନ୍‌ ନାଗରିକ, ଜଣେ ବାଂଲାଦେଶୀ ଓ ୩ ଜଣ ମିଆଁମାର ନାଗରିକ ଏଭଳି ମୋଟ ୨୪ ଜଣ କର୍ମଚାରୀ ଥିବା କୁହାଯାଉଛି ।

ଅଧିକ ପଢ଼ନ୍ତୁ: ବୈତରଣୀ ଉପରେ ସରକାରଙ୍କ ସ୍ପେଶାଲ ଫୋକସ୍, ନଦୀ ବନ୍ଧ ହେବ ଚଉଡ଼ା ଓ ଉଚ୍ଚା

ଜାହାଜଟି ପାରାଦୀପରୁ ୨୪୦ ନଟିକାଲ୍‌ ମାଇଲ୍‌ ତଥା ପାଖାପାଖି ୩୭୦ କିଲୋମିଟର ଅତିକ୍ରମ କରିବା ପରେ ଗତ ଶୁକ୍ରବାର ରାତି ୧୨ଟା ୧୮ ପରଠାରୁ ଜାହାଜ ସହ ଆଉ ଯୋଗାଯୋଗ ସମ୍ଭବ ହୋଇ ପାରି ନଥିଲା । ଆଣ୍ଡାମାନ ନିକୋବର ଦୀପପୁଞ୍ଜ ପାଖାପାଖି କୌଣସି ସ୍ଥାନରେ ଏହା ଦୁର୍ଘଟଣାର ଶିକାର ହୋଇଥିବା ସନ୍ଦେହ କରାଯାଉଛି ।

ଅଗଷ୍ଟ ୫ ତାରିଖରେ ଏହି ଜାହାଜଟି ପାରାଦୀପ ବନ୍ଦରକୁ ଆସିଥିଲା । କିନ୍ତୁ ବର୍ଥରେ ସ୍ଥାନ ନ ଥିବାରୁ ଅଗଷ୍ଟ ୧୫ ତାରିଖ ପର୍ଯ୍ୟନ୍ତ ସମୁଦ୍ର ଭିତରେ ଜାହାଜକୁ ଅପେକ୍ଷା କରିବାକୁ ପଡ଼ିଥିଲା । ଅଗଷ୍ଟ ୨୦ ତାରିଖରେ ଲୁହାପଥର ବୋଝେଇ କରି ଜାହାଜଟି ପାରାଦୀପ ବନ୍ଦର ଛାଡ଼ିଥିଲା ।