Odisha News / ପ୍ରାଇଡ୍ ମିସ୍ ଇଣ୍ଡିଆ ମୁକୁଟ ଜିତିଲେ ଓଡ଼ିଆ ଝିଅ ଶ୍ରେୟା, ଭୁବନେଶ୍ୱରରେ ଗ୍ରାଣ୍ଡ ୱେଲକମ୍

ଭୁବନେଶ୍ବର,୧୨/୧୦: ସ୍ବପ୍ନ ଦେଖିବା  ସହଜ, କିନ୍ତୁ ସେହି ସ୍ୱପ୍ନକୁ ସତ କରିବା ପାଇଁ ଦରକାର ଅକ୍ଲାନ୍ତ ପରିଶ୍ରମ, ଧୈର୍ଯ୍ୟ ଓ ଦୃଢ଼ ଆତ୍ମବିଶ୍ୱାସ। ଏହାକୁ ପ୍ରମାଣ କରି ଗ୍ଲାମର ଦୁନିଆରେ ନିଜର ପରିଚୟ ତିଆରି କରିଛନ୍ତି ଓଡ଼ିଆ ଝିଅ ଶ୍ରେୟା ପଣ୍ଡା। ପ୍ରାଇଡ୍ ମିସ୍ ଇଣ୍ଡିଆ ୨୦୨୬ର ବିଜେତା ହୋଇ ସେ ଓଡ଼ିଶା ପାଇଁ ଗୌରବ ଆଣିଛନ୍ତି। ନିଜ ସହରକୁ ଫେରିବା ପରେ ଭୁବନେଶ୍ୱରରେ ତାଙ୍କୁ ମିଳିଛି ଭବ୍ୟ ସ୍ୱାଗତ।

ଶହେରୁ ଅଧିକ ପ୍ରତିଯୋଗୀଙ୍କୁ ପଛରେ ପକାଇ ଜିତିଲେ ମୁକୁଟ

ଦିଲ୍ଲୀରେ ଆୟୋଜିତ ଏହି ସୌନ୍ଦର୍ଯ୍ୟ ପ୍ରତିଯୋଗିତାରେ ଶହେରୁ ଅଧିକ ପ୍ରତିଯୋଗୀଙ୍କୁ ପଛରେ ପକାଇ ପ୍ରଥମ ସ୍ଥାନ ହାସଲ କରିଥିଲେ ଶ୍ରେୟା। ଚାରି ଦିନ ଧରି ଚାଲିଥିବା ଏହି ପ୍ରତିଯୋଗିତାରେ ନିଜର ପ୍ରତିଭା, ଆତ୍ମବିଶ୍ୱାସ ଓ ବ୍ୟକ୍ତିତ୍ୱର ପରିଚୟ ଦେଇ ସେ ବିଜୟୀ ହୋଇଥିଲେ। ଏହି ସଫଳତା ପଛରେ ରହିଛି ତାଙ୍କର ଦୀର୍ଘ ଦିନର ପରିଶ୍ରମ ଓ ଅନେକ ଆହ୍ୱାନର ସାମ୍ନା କରିବାର ଅନୁଭବ। ଗ୍ଲାମର ଦୁନିଆରେ ନିଜକୁ ପ୍ରମାଣ କରିବାର ଯାତ୍ରା ତାଙ୍କ ପାଇଁ ସହଜ ନଥିଲା।

ପଢନ୍ତୁ ଏହି ଖବର: ବିମାନରେ ଧୋନିଙ୍କୁ ଭେଟିଲେ ଏୟାର ହୋଷ୍ଟେସ୍, କ୍ୟାପେଟନ କୁଲ କହିଲେ ଏହି କଥା...

ସଂଘର୍ଷର କାହାଣୀ କହିଲେ ଶ୍ରେୟା

ଭୁବନେଶ୍ୱରର ଏକ ହୋଟେଲରେ ଆୟୋଜିତ ସ୍ୱାଗତ ସମାରୋହରେ ଶ୍ରେୟାଙ୍କୁ ଫୁଲମାଳ ଓ କରତାଳି ମାଧ୍ୟମରେ ସ୍ୱାଗତ କରାଯାଇଥିଲା। ଏହି ଅବସରରେ ସାମ୍ବାଦିକ ସମ୍ମିଳନୀରେ ସେ ନିଜ ସଫଳତା ପଛର ସଂଘର୍ଷ ବିଷୟରେ କହିଥିଲେ। ତାଙ୍କ କହିବା ଅନୁଯାୟୀ, ଲୋକଙ୍କ କଥା, ଟ୍ରେନିଂର ଚାପ ଏବଂ ନିଜକୁ ପ୍ରମାଣ କରିବାର ଆହ୍ୱାନ ତାଙ୍କ ଯାତ୍ରାକୁ କଷ୍ଟକର କରିଥିଲା। କିନ୍ତୁ ଏହି ସମୟରେ ପରିବାର, ବିଶେଷକରି ମାଆ ଓ ବାପା ତାଙ୍କୁ ସବୁବେଳେ ସମର୍ଥନ ଦେଇଥିଲେ। ପରିବାରର ଏହି ସହଯୋଗ ତାଙ୍କୁ ଆଗକୁ ବଢ଼ିବାକୁ ସାହସ ଦେଇଥିଲା।

ଏଥି ସହ ପଢନ୍ତୁ:  ଦଶହରା ପାଇଁ ସଜେଇ ହେଲାଣି ସହରର ଗଳିକନ୍ଦି; ଏଥର ରାଜଧାନୀରେ ନୂଆ ଥିମର ତୋରଣ

ମୁକୁଟକୁ ନେଇ କ'ଣ କହିଲେ ଶ୍ରେୟା?

ନିଜର ଏହି ବିଜୟକୁ ଓଡ଼ିଶାର ଝିଅମାନଙ୍କୁ ସମର୍ପିତ କରି ଶ୍ରେୟା କହିଛନ୍ତି, “ଏଇ ମୁକୁଟ କେବଳ ମୋର ନୁହେଁ, ଏହା ପ୍ରତ୍ୟେକ ଓଡ଼ିଆ ଝିଅର ମୁକୁଟ, ଯିଏ ବଡ଼ ସ୍ୱପ୍ନ ଦେଖିବାକୁ ଡରେ ନାହିଁ।” 
ଶ୍ରେୟାଙ୍କ ଏହି ସଫଳତା ଓଡ଼ିଶାର ଯୁବପିଢ଼ି, ବିଶେଷକରି ନିଜ ସ୍ୱପ୍ନ ପୂରଣ କରିବାକୁ ଚାହୁଁଥିବା ଝିଅମାନଙ୍କ ପାଇଁ ପ୍ରେରଣା ହୋଇପାରେ। ଆଗକୁ ମିସ୍ ଇଣ୍ଡିପେଣ୍ଡେଣ୍ଟ ଇଣ୍ଡିଆ ୨୦୨୭ ପ୍ରତିଯୋଗିତାରେ ସେ ଓଡ଼ିଶାକୁ ପ୍ରତିନିଧିତ୍ୱ କରିବେ ବୋଲି ସୂଚନା ଦେଇଛନ୍ତି। ଏବେ ଶ୍ରେୟାଙ୍କ ଆଗାମୀ ଯାତ୍ରା ଉପରେ ରହିଛି ସମସ୍ତଙ୍କ ନଜର। ତାଙ୍କର ଏହି ସଫଳତା ଓଡ଼ିଶାର ଗ୍ଲାମର ଜଗତରେ ଏକ ନୂଆ ଆଶା ସୃଷ୍ଟି କରିଛି।