ଭୁବନେଶ୍ଵର: ଯୁଦ୍ଧ ହେଲେ କେବଳ ଦୋଷୀ ନୁହେଁ ନିର୍ଦ୍ଦୋଷ ବି ଭୋଗନ୍ତି ଯନ୍ତ୍ରଣା । ମଧ୍ୟପ୍ରାଚ୍ୟରେ ଯୁଦ୍ଧର ଘନଘଟା ଭିତରେ ଏବେ ସେମିତି ଅକଳରେ ପଡ଼ିଛନ୍ତି ପ୍ରବାସୀ ଭାରତୀୟ । ଦୁବାଇ, UAE, କତାର ଭଳି ଦେଶରେ ଥିବା ପ୍ରବାସୀମାନେ ନିଜ ଜୀବନ ନେଇ ଆତଙ୍କିତ । ପ୍ରବାସୀଙ୍କ ଭିତରେ ଥିବା ଓଡ଼ିଆମାନେ ନିଜ ପରିବାର ଲୋକଙ୍କ ପାଖକୁ ବାର୍ତ୍ତା ମାଧ୍ୟମରେ ଉଦ୍ଧାର ପାଇଁ କରିଛନ୍ତି ଆକୁଳ ନିବେଦନ ।

ସାରା ବିଶ୍ଵରେ ପଡ଼ିଲାଣି ଆମେରିକା, ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ମହାଯୁଦ୍ଧର ପ୍ରଭାବ। କେଉଁଠି ପରୋକ୍ଷ ତ ପ୍ରତ୍ୟକ୍ଷ ଭାବେ ପ୍ରଭାବିତ ହେଉଛନ୍ତି ଲୋକେ । ଆମେରିକା ଓ ଇସ୍ରାଏଲକୁ କଡ଼ା ଜବାବ ଦେବାକୁ ଓ ନିଜ ଦେଶର ସୁପ୍ରିମ ଲିଡର ଖାମନେଇଙ୍କ ମୃତ୍ୟୁର ପ୍ରତିଶୋଧ ନେବାକୁ ଯାଇ ୟୁଏଇ, ଓମାନ, ଦୁବାଇ ଭଳି ଦେଶକୁ ଟାର୍ଗେଟ୍ କରୁଛି ଇରାନ ।

ଏଥିସହ ପଢ଼ନ୍ତୁ: ଯୁଦ୍ଧ ଭିତରେ ଆମେରିକାର ୩ଟି F-15 ଯୁଦ୍ଧ ବିମାନ ଖସାଇଲା କୁଏତ

ରବିବାର ଅପରାହ୍ଣରୁ ଦୁବାଇ ନିକଟ ଅଞ୍ଚଳରେ ଡ୍ରୋନ୍, ମିସାଇଲ୍ ମାଡ଼ ହେଉଛି । ଭାଙ୍ଗୁଛି ଅଟ୍ଟାଳିକା, ଆକାଶରେ ଦେଖା ଯାଉଛି କେବଳ ନିଆଁ ଆଉ ଧୂଆଁ । ଏମିତି ସ୍ଥିତିକୁ ନେଇ ଦୁବାଇରେ ରହୁଥିବା ଓଡ଼ିଆଙ୍କ ଭିତରେ ଛନକା ପଶିଛି ।

ଦୁବାଇରେ ରହୁଥିବା ଗଜପତି ଜିଲ୍ଲା ଗୋଷାଣି ବ୍ଲକ୍ ବ୍ରାହ୍ମଣସୀତାପୁର ଗାଁର ରାଜକିଶୋର ପଣ୍ଡା ପୁଅ ସୁଧୀର ପଣ୍ଡାଙ୍କ ପରିବାରରେ ଆଶଙ୍କା । ସୁଧୀର ସ୍ଥିତି ନେଇ ଘରକୁ ଫୋନ୍ କରି ଜଣାଇବା ପରେ ତାଙ୍କୁ ଉଦ୍ଧାର କରିବାକୁ ସରକାରଙ୍କୁ ଅନୁରୋଧ କରିଛନ୍ତି ପରିଜନ ।

ଏଥିସହ ପଢ଼ନ୍ତୁ: ଟ୍ରମ୍ପଙ୍କ ଦାବି 'ମୋତେ ମାରିବାକୁ ଦୁଇଥର ଷଡ଼ଯନ୍ତ୍ର କରିଥିଲେ ଖାମେନେଇ, ମୁଁ କରିଦେଲି ସଫା'

କତାରରେ ଫସିଛନ୍ତି କଟକର ଯୁବକ ପ୍ରତୀକ ଦେବ ଦାସ । ବେଙ୍ଗାଲୁରୁର ଏକ ଆଇଟି କମ୍ପାନୀରେ କାମ କରୁଥିବା ପ୍ରତୀକ ରୋମାନିଆ ଯାଉଥିବାବେଳେ ଯୁଦ୍ଧ ହେବାରୁ କତାର ରାଜଧାନୀ ଦୋହାରେ ଫସି ରହିଛନ୍ତି ।

ଗଞ୍ଜାମ ଖଲ୍ଲିକୋଟ ବ୍ଲକର ବିଭିନ୍ନ ଗାଁର ହଜାର ହଜାର ଲୋକ ମଧ୍ୟପ୍ରାଚ୍ୟର ବିଭିନ୍ନ ଦେଶରେ କାମ କରୁଛନ୍ତି । ଏବେ ଯୁଦ୍ଧ ସ୍ଥିତି ଭିତରେ ଆତଙ୍କିତ ସେମାନଙ୍କ ପରିଜନ । ସେହିପରି ଦୁବାଇ ଏୟାରପୋର୍ଟରେ ଫସିଛନ୍ତି ପ୍ରବାସୀ ଓଡ଼ିଆ ଦେବାଶିଷ ଦାସ । ଯୁଦ୍ଧ ଦେଶରେ ଫସିଥିବା ପ୍ରବାସୀ ଭାରତୀୟଙ୍କୁ ଉଦ୍ଧାର ପାଇଁ ଭାରତ ସରକାର ଅଭିଯାନ ଆରମ୍ଭ କରିଛନ୍ତି ।