Odisha Anti Ragging Rules / ରାଗିଂ ବିରୋଧରେ କଠୋର ହେଲା ଉଚ୍ଚଶିକ୍ଷା ବିଭାଗ, ସମସ୍ତ କଲେଜକୁ ନୂଆ ନିର୍ଦ୍ଦେଶ

ରାଗିଂ ବିରୋଧରେ କଠୋର ହେଲା ଉଚ୍ଚ ଶିକ୍ଷା ବିଭାଗ । ଓଡ଼ିଶାର ସମସ୍ତ ସରକାରୀ ଓ ବେସରକାରୀ ଉଚ୍ଚ ଶିକ୍ଷାନୁଷ୍ଠାନରେ ରାଗିଂ ରୋକିବା ପାଇଁ ଉଚ୍ଚ ଶିକ୍ଷା ବିଭାଗ କଠୋର ପଦକ୍ଷେପ ନେଇଛି । ଏନେଇ ବିଭାଗ ପକ୍ଷରୁ ସମସ୍ତ ବିଶ୍ୱବିଦ୍ୟାଳୟର ରେଜିଷ୍ଟ୍ରାର ଓ ଡିଗ୍ରୀ, ସଂସ୍କୃତ ଓ ଶିକ୍ଷକ ଶିକ୍ଷା କଲେଜର ଅଧ୍ୟକ୍ଷମାନଙ୍କୁ ଏକ ନିର୍ଦ୍ଦେଶନାମା ଜାରି କରାଯାଇଛି ।

ଏହି ନିର୍ଦ୍ଦେଶରେ ନ୍ୟାସନାଲ ହ୍ୟୁମାନ୍‌ ରାଇଟ୍ସ କମିଶନ (NHRC) ଙ୍କ ସୁପାରିଶ ଓ ସୁପ୍ରିମକୋର୍ଟର ରାୟକୁ ଆଧାର କରି ଶିକ୍ଷାନୁଷ୍ଠାନଗୁଡ଼ିକରେ ରାଗିଂ ବିରୋଧୀ ବ୍ୟବସ୍ଥାକୁ ଆହୁରି ସୁଦୃଢ କରିବାକୁ କୁହାଯାଇଛି ।

ନିର୍ଦ୍ଦେଶାନୁସାରେ, ପ୍ରତ୍ୟେକ ଶିକ୍ଷାନୁଷ୍ଠାନରେ ଆଣ୍ଟି-ରାଗିଂ କମିଟି, ଆଣ୍ଟି-ରାଗିଂ ସ୍କ୍ୱାଡ୍ ଓ ମନିଟରିଂ ସେଲକୁ ପୁନର୍ଗଠନ କରି ସକ୍ରିୟ ରଖିବାକୁ କୁହାଯାଇଛି । ବିଶେଷକରି ହୋଷ୍ଟେଲ ଓ କ୍ୟାମ୍ପସର ସମ୍ବେଦନଶୀଳ ଅଞ୍ଚଳରେ ୨୪ ଘଣ୍ଟିଆ ସର୍ଭେଲାନ୍ସ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି । ଏହା ସହ ନିୟମିତ ଓ ଅତର୍କିତ ଯାଞ୍ଚ କରି ତାହାର ରେକର୍ଡ ରଖିବାକୁ କୁହାଯାଇଛି ।

ଅଧିକ ପଢ଼ନ୍ତୁ: ପ୍ୟାଣ୍ଟ ପକେଟ୍‌ରେ ଫାଟିଲା ମୋବାଇଲ୍‌, ଅଳ୍ପକେ ବର୍ତ୍ତିଲେ ଯୁବକ

ଏହି ନିର୍ଦ୍ଦେଶରେ ଏସ୍‌ସି/ଏସ୍‌ଟି ସମୁଦାୟର ପ୍ରତିନିଧିତ୍ୱକୁ ଆଣ୍ଟି-ରାଗିଂ କମିଟିରେ ସୁନିଶ୍ଚିତ କରିବାକୁ ମଧ୍ୟ କୁହାଯାଇଛି । ଏହାର ପାଳନ ହେଉଥିବା ନେଇ ଶିକ୍ଷାନୁଷ୍ଠାନର ମୁଖ୍ୟଙ୍କୁ ପ୍ରମାଣପତ୍ର ଦେବାକୁ ପଡ଼ିବ ।

ଅଭିଯୋଗର ଶୀଘ୍ର ସମାଧାନ ପାଇଁ ତିନି-ସ୍ତରୀୟ ବ୍ୟବସ୍ଥା ମଧ୍ୟ ଲାଗୁ କରାଯାଇଛି । ଏଥିରେ ଇନ୍‌ଷ୍ଟିଟ୍ୟୁସନାଲ ସେଲ, ମନିଟରିଂ ଏଜେନ୍ସି ଓ ଆବଶ୍ୟକତା ଅନୁସାରେ ଜିଲ୍ଲା ସ୍ତରୀୟ କମିଟି ମାଧ୍ୟମରେ ଅଭିଯୋଗର ତଦନ୍ତ ହେବ । ପୀଡ଼ିତ ଛାତ୍ରଛାତ୍ରୀଙ୍କ ମତାମତକୁ ମଧ୍ୟ ଗୁରୁତ୍ୱ ଦିଆଯିବ ।

ଛାତ୍ରଛାତ୍ରୀଙ୍କ ମାନସିକ ସ୍ୱାସ୍ଥ୍ୟକୁ ମଧ୍ୟ ଗୁରୁତ୍ୱ ଦେଇ ଶିକ୍ଷାନୁଷ୍ଠାନଗୁଡ଼ିକୁ କାଉନ୍ସେଲିଂ ଓ ମେଣ୍ଟାଲ ହେଲଥ ସପୋର୍ଟ ସିଷ୍ଟମ ଉପଲବ୍ଧ କରାଇବାକୁ କୁହାଯାଇଛି । ଫ୍ରେସର୍ସମାନଙ୍କ ପାଇଁ ସଚେତନତା କାର୍ଯ୍ୟକ୍ରମ ଓ ଓରିଏଣ୍ଟେସନ ସେସନ ଆୟୋଜନ କରିବାକୁ ମଧ୍ୟ ନିର୍ଦ୍ଦେଶ ରହିଛି ।