Odisha Assembly Today / ଆଜିଠୁ ବିଧାନସଭା ମୌସୁମୀ ଅଧିବେଶନ; ଗୁରୁତ୍ୱପୂର୍ଣ୍ଣ ବିଭାଗରେ ହେବ ପ୍ରଶ୍ନୋତ୍ତର କାର୍ଯ୍ୟକ୍ରମ

ଭୁବନେଶ୍ଵର: ଆଜିଠାରୁ ଆରମ୍ଭ ହେଉଛି ସପ୍ତଦଶ ବିଧାନସଭାର ସପ୍ତମ ଅଧିବେଶନ । ମୌସୁମୀ ଅଧିବେଶନର ପ୍ରଥମ ଦିନରେ ଦିବଙ୍ଗତ ସଦସ୍ୟଙ୍କ ଉଦ୍ଦେଶ୍ୟରେ ଆସିବ ଶୋକ ପ୍ରସ୍ତାବ । ତା’ପୂର୍ବରୁ ବାଚସ୍ପତିଙ୍କ ଅଧ୍ୟକ୍ଷତାରେ ବସିଛି ସର୍ବଦଳୀୟ ବୈଠକ । ଗୃହର ସୁପରିଚାଳନା ନେଇ ଆଲୋଚନା ହୋଇଛି । ଅନ୍ୟପଟେ ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବାକୁ ବିରୋଧୀଙ୍କ ରଣନୀତି । MMDR ବିଲ୍‌କୁ ନେଇ ମୋସନ୍ ଆଣିବାକୁ ବିଜେଡିର ଦାବି । ତେବେ ଏହାକୁ ସାମ୍ନା କରିବାକୁ ପ୍ରସ୍ତୁତ ଶାସକ ଦଳ । ମୌସୁମୀ ଅଧିବେଶନ ପୂର୍ବରୁ ତେଜିଲା ରାଜନୈତିକ ତାତି ।

• ସରିଛି ସର୍ବଦଳୀୟ ବୈଠକ

ବାଚସ୍ପତିଙ୍କ ଅଧ୍ୟକ୍ଷତାରେ ଗତକାଲି ବସିଥିବା ସର୍ବଦଳୀୟ ବୈଠକ ରେ ମୁଖ୍ୟମନ୍ତ୍ରୀଙ୍କ ସହ ସଂସଦୀୟ ବ୍ୟାପାର ମନ୍ତ୍ରୀ, ସରକାରୀ ଦଳ ମୁଖ୍ୟ ସଚେତକ, ବିରୋଧୀ ଦଳ ଉପନେତା, ବିରୋଧୀ ଦଳ ମୁଖ୍ୟ ସଚେତକ ଓ କଂଗ୍ରେସ ବିଧାୟକ ଦଳ ଉପ ନେତା ଯୋଗ ଦେଇଥିଲେ । ଅପରାହ୍ନରେ ବିଜେପି, ବିଜେଡି ବିଧାୟକ ଦଳର ବୈଠକ ଅନୁଷ୍ଠିତ ହୋଇଯାଇଛି । ବିଧାନସଭା ମୌସୁମୀ ଅଧିବେଶନକୁ ସୁରୁଖୁରୁରେ ଚଳାଇବା ପାଇଁ ସବୁ ଦଳର ସହଯୋଗ ଲୋଡ଼ିଛନ୍ତି ବାଚସ୍ପତି ସୁରମା ପାଢୀ ।

• ବିଭିନ୍ନ ଗୁରୁତ୍ଵପୂର୍ଣ୍ଣ ବିଭାଗରେ ହେବ ଆଲୋଚନା

ଶୋକ ପ୍ରସ୍ତାବ ପରେ ପ୍ରଶ୍ନକାଳରେ ପଞ୍ଚାୟତିରଜ ପାନୀୟଜଳ, ଜଙ୍ଗଲ ଓ ପରିବେଶ, ଗୃହ ନିର୍ମାଣ ଓ ନଗର ଉନ୍ନୟନ, ଶ୍ରମ ଭଳି ଗୁରୁତ୍ୱପୂର୍ଣ୍ଣ ବିଭାଗର ପ୍ରଶ୍ନୋତ୍ତର କାର୍ଯ୍ୟକ୍ରମ ରହିଛି । ସେପଟେ ବିରୋଧୀ ଏମଏମଡିଆର ସଂଶୋଧନ, ବହି ତ୍ରୁଟି, ଦରଦାମ ବୃଦ୍ଧି, ଆଇନ୍ ଶୃଙ୍ଖଳାକୁ ମୁଖ୍ୟ ମୁଦ୍ଦା କରିବେ । ଶଙ୍ଖ ଭବନରେ ବିରୋଧି ଦଳ ନେତାଙ୍କ ଅଧ୍ୟକ୍ଷତାରେ ସରକାରଙ୍କୁ ଘେରିବାକୁ ରଣନୀତି ପ୍ରସ୍ତୁତ କରିଛି ବିରୋଧୀ ବିଜେଡି । ସେହିଭଳି କଂଗ୍ରେସ ମଧ୍ୟ ସରକାରଙ୍କୁ ଘେରିବାକୁ ବୈଠକ କରି ରଣନୀତି ପ୍ରସ୍ତୁତି କରିଛି । ସରକାରୀ ଦଳ ବି ଜବାବ ଦେବାକୁ ରଣନୀତି ପ୍ରସ୍ତୁତ କରିଛି । ତେବେ ପ୍ରଥମ ଦିନ ଗୃହ ସୁରୁଖୁରୁ ହୋଇପାରୁଛି ନା ନାହିଁ ତା ଉପରେ ନଜର ।

ପଢନ୍ତୁ ଏହି ଖବର: SIR ପରେ ଓଡ଼ିଶାର ଚୂଡ଼ାନ୍ତ ଭୋଟର ତାଲିକା ପ୍ରକାଶ; ଆପଣଙ୍କ ନାଁ ଅଛି ତ ?

ସର୍ବଦଳୀୟ ବୈଠକରେ ସୁପରିଚାଳନାର ମନ୍ତ୍ର, ଅଧିବେଶନରେ ବିରୋଧୀଙ୍କ ରଣହୁଙ୍କାର । ଏବେ ଦେଖିବାକୁ ବାକି, ଗୃହରେ କେତେ ସରଗରମ ହେଉଛି ମୌସୁମୀ ଅଧିବେଶନ । ସେପଟେ ବିଧାନସଭାର ସୁରକ୍ଷାକୁ କରାଯାଇଛି କଡାକଡି । ଏଥିପାଇଁ ମୃତୟନ ହେବ ୩୦ ପ୍ଲାଟୁନ ଫୋର୍ସ । ତ୍ରିସ୍ତରୀୟ ସୁରକ୍ଷା ବଳୟ ଭିତରେ ରହିବ ବିଧାନସଭା ।