Odisha Assembly / ଆସନ୍ତାକାଲିଠାରୁ ବିଧାନସଭାର ମୌସୁମୀ ଅଧିବେଶନ; ଆସିବ ୬ଟି ବିଲ୍

ଭୁବନେଶ୍ଵର: ଆସନ୍ତାକାଲି (ସେପ୍ଟେମ୍ବର ୨୨) ଠାରୁ ବସିବ ବିଧାନସଭାର ମୌସୁମୀ ଅଧିବେଶନ । ୯ଟି କାର୍ଯ୍ୟଦିବସ ରହିଥିବାବେଳେ ଆସିପାରେ ୬ଟି ବିଲ୍ । ତା' ପୂର୍ବରୁ ବାଚସ୍ପତିଙ୍କ ଅଧ୍ୟକ୍ଷତାରେ ବସିଛି ସର୍ବଦଳୀୟ ବୈଠକ। ଗୃହର ସୁପରିଚାଳନା ନେଇ ହୋଇଛି ଆଲୋଚନା । ଅନ୍ୟପଟେ, ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବାକୁ ବିରୋଧୀଙ୍କ ରଣନୀତି। MMDR ବିଲ୍‌କୁ ନେଇ ମୋସନ୍ ଆଣିବାକୁ ବିଜେଡିର ଦାବି । ତେବେ ଏହାକୁ ସାମ୍ନା କରିବାକୁ ପ୍ରସ୍ତୁତ ଶାସକ ଦଳ । ମୌସୁମୀ ଅଧିବେଶନ ପୂର୍ବରୁ ତେଜିଲା ରାଜନୈତିକ ତାତି ।

• ବସିଲା ସର୍ବଦଳୀୟ ବୈଠକ

ସର୍ବଦଳୀୟ ବୈଠକରେ ଗୃହ ସୁରୁଖୁରୁ ଚଲେଇବା ନେଇ ଆଜି ବିରୋଧୀ ଏବଂ ଶାସକ ଦଳ ସହ ଆଲୋଚନା କରିଛନ୍ତି ବାଚସ୍ପତି । ବାଚସ୍ପତି ସୁରମା ପାଢ଼ୀଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଯୋଗ ଦେଇଥିଲେ ମୁଖ୍ୟମନ୍ତ୍ରୀ ମୋହନ ମାଝୀ, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂ ଦେଓ, ଉପବାଚସ୍ପତି ଭବାନୀ ଶଙ୍କର ଭୋଇଙ୍କ ସମେତ ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ, ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ ଏବଂ କଂଗ୍ରେସ ବିଧାୟକ ଦଳ ଉପନେତା ଅଶୋକ ଦାସ । ଗୃହରେ ଯେପରି ସୁସ୍ଥ ଆଲୋଚନା ଓ ସୁପରିଚାଳନା ହୋଇପାରିବ, ସେନେଇ ବୈଠକରେ ଆଲୋଚନା ହୋଇଛି । ସେପଟେ ବିଧାୟକ ଦଳ ବୈଠକ କରି ଶାସକ ଦଳ କରିଛି କାଉଣ୍ଟର ଷ୍ଟାଟେଜି ।

• ଅଙ୍କ କଷିଲେ ଶାସକ-ବିରୋଧୀ

ଅନ୍ୟପଟେ ମୌସୁମୀ ଅଧିବେଶନରେ ସରକାରଙ୍କୁ ଘେରିବାକୁ ବିରୋଧୀଙ୍କ ପ୍ରସ୍ତୁତି । MMDR ବିଲ୍‌କୁ ନେଇ ମୋସନ୍ ଆଣିବାକୁ ଦାବି କରିଛି ବିଜେଡି । ଏହାସହ ଶଙ୍ଖ ଭବନରେ ବିରୋଧି ଦଳ ନେତାଙ୍କ ଅଧ୍ୟକ୍ଷତାରେ ସରକାରଙ୍କୁ ଘେରିବାକୁ ରଣନୀତି ପ୍ରସ୍ତୁତ କରିଛି ବିରୋଧୀ ବିଜେଡି । MMDR, ବହି ତ୍ରୁଟି, ଦରଦାମ ଭଳି ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବ ବିଜେଡି । ସେହିଭଳି କଂଗ୍ରେସ ମଧ୍ୟ ସରକାରଙ୍କୁ ଘେରିବାକୁ ଆସନ୍ତାକାଲି ବୈଠକ କରି ରଣନୀତି ପ୍ରସ୍ତୁତି କରିଛି । ଏସବୁ ଭିତରେ ବିରୋଧୀଙ୍କ ପ୍ରଶ୍ନ ଓ ଦାବିକୁ ନେଇ ଶାସକ ଦଳ ମଧ୍ୟ ପ୍ରସ୍ତୁତ ହୋଇଛି । ଗୃହରେ ଆଲୋଚନା ଓ ବିତର୍କ ମଧ୍ୟରେ କିପରି ମୌସୁମୀ ଅଧିବେଶନ ସୁରୁଖୁରୁରେ ଚାଲିବ, ତାହା ଉପରେ ରହିବ ସମସ୍ତଙ୍କ ନଜର ।

ପଢନ୍ତୁ ଏହି ଖବର: ରାହୁଲ୍ ଗାନ୍ଧୀଙ୍କ ଉପରେ ବର୍ଷିଲେ ଧର୍ମେନ୍ଦ୍ର ପ୍ରଧାନ; ତଥ୍ୟ ଦେଇ ଖୋଲିଦେଲେ ମୁଖା

ଏବେ ଦେଖିବାକୁ ବାକି, ଗୃହରେ କେତେ ସରଗରମ ହେଉଛି ମୌସୁମୀ ଅଧିବେଶନ । ସେପଟେ ବିଧାନସଭାର ସୁରକ୍ଷାକୁ କରାଯାଇଛି କଡାକଡି । ଏଥିପାଇଁ ମୃତୟନ ହେବ ୩୦ ପ୍ଲାଟୁନ ଫୋର୍ସ । ତ୍ରିସ୍ତରୀୟ ସୁରକ୍ଷା ବଳୟ ଭିତରେ ରହିବ ବିଧାନସଭା ।