Odisha No Gift Policy / ସରକାରୀ ଅର୍ଥରେ ଗିଫ୍ଟ କିଣା ମନା, ‘ନୋ ଗିଫ୍ଟ ପଲିସି’ ଲାଗୁ କଲେ ରାଜ୍ୟ ସରକାର

ପର୍ବପର୍ବାଣୀରେ ସରକାରୀ ଅର୍ଥରେ ଉପହାର କିଣାକୁ ନେଇ କଟକଣା ଜାରି କରିଛନ୍ତି ରାଜ୍ୟ ସରକାର । କେନ୍ଦ୍ର ସରକାରଙ୍କ ‘ନୋ ଗିଫ୍ଟ ପଲିସି’କୁ ଅନୁସରଣ କରି ଏଣିକି ରାଜ୍ୟର ସମସ୍ତ ସରକାରୀ ବିଭାଗ ଓ କାର୍ଯ୍ୟାଳୟରେ ସରକାରୀ ପାଣ୍ଠିରୁ ଉପହାର କିଣା ଉପରେ ରୋକ୍ ଲଗାଯାଇଛି ।

ଦୀପାବଳି ସମେତ ବର୍ଷର ସମସ୍ତ ପର୍ବପର୍ବାଣୀ ଅବସରରେ ଉପହାର କିମ୍ବା ଅନ୍ୟାନ୍ୟ ସାମଗ୍ରୀ କିଣିବା ବାବଦରେ ସରକାରୀ ଅର୍ଥ ଖର୍ଚ୍ଚ କରିବାକୁ ଆଉ ଅନୁମତି ମିଳିବ ନାହିଁ । ଏନେଇ ରାଜ୍ୟ ସରକାର ତୁରନ୍ତ କଟକଣା ଲାଗୁ କରିଛନ୍ତି ।

ସୂଚନା ଅନୁଯାୟୀ, କେନ୍ଦ୍ର ସରକାର ଗତବର୍ଷ ଜାରି କରିଥିବା ନିର୍ଦ୍ଦେଶନାମାକୁ ଆଧାର କରି ରାଜ୍ୟ ସରକାର ନିଜର ସମସ୍ତ କାର୍ଯ୍ୟାଳୟ ପାଇଁ ଏହି ‘ନୋ ଗିଫ୍ଟ ପଲିସି’ ଲାଗୁ କରିଛନ୍ତି । ଏହାଦ୍ୱାରା ପର୍ବପର୍ବାଣୀ ନାଁରେ ସରକାରୀ ରାଜକୋଷରୁ ହେଉଥିବା ଅନାବଶ୍ୟକ ଖର୍ଚ୍ଚ ଉପରେ ଅଙ୍କୁଶ ଲାଗିବ ।

ସରକାରଙ୍କ ଏହି ନିଷ୍ପତ୍ତି ଫଳରେ ଏଣିକି କୌଣସି ବିଭାଗ କିମ୍ବା ସରକାରୀ ଅଫିସ୍ ପର୍ବପର୍ବାଣୀ ଅବସରରେ ଉପହାର କିଣିବା ପାଇଁ ସରକାରୀ ପାଣ୍ଠି ବ୍ୟବହାର କରିପାରିବେ ନାହିଁ । ସରକାରୀ ଖର୍ଚ୍ଚରେ ଶୃଙ୍ଖଳା ଆଣିବା ଏବଂ ଅନାବଶ୍ୟକ ବ୍ୟୟକୁ ରୋକିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ।