ସାରା ରାଜ୍ୟରେ ବୋମା ଗୁଜବ I ରାଜ୍ୟର ବିଭିନ୍ନ ସରକାରୀ ଅନୁଷ୍ଠାନକୁ ବହୁବାର ଇ-ମେଲରେ ମିଳୁଛି ଧମକ I ଯାହାକୁ ନେଇ ଚିନ୍ତାରେ ରାଜ୍ୟ ସାଇବର ସେଲ୍‌ I ସେପଟେ ଗତ ବୁଧବାର ଭୁବନେଶ୍ଵର ପାସପୋର୍ଟ ଅଫିସକୁ ବମ୍‌ରେ ଉଡ଼ାଇ ଦେବା ପାଇଁ ଧମକ ମିଳିବା ପରେ ସକ୍ରିୟ ହୋଇଛି ରାଜ୍ୟ ପୋଲିସ । କିନ୍ତୁ କେଉଁଠୁ ଆସୁଛି ଏଭଳି ଆତଙ୍କ ସୃଷ୍ଟି କରୁଥିବା ମେଲ୍‌ ତା'ର ମିଳୁନି କିଛି ସୁରାଗ I

ସାଇବର କ୍ରିମିନାଲଙ୍କ ଟାର୍ଗେଟରୁ ବର୍ତ୍ତିଲାନି ନ୍ୟାୟାଳୟ । ଚାରିଆଡେ କୋକୁଆ ଭୟ । ଅଜଣା ମେଲ୍ ପଠାଇ ପୋଲିସକୁ ଘାଇଲା କରୁଛନ୍ତି ଦୁର୍ବୃତ୍ତ । ସମୟ ଦିନ ୨ଟା, ଭୁବନେଶ୍ୱର ପାସପୋର୍ଟ ଅଫିସରେ ଦେଖିବାକୁ ମିଳିଲା ଧାଁ ଦୌଡ଼ ସହିତ କୋକୁଆ ଭୟ । ବିଲ୍ଡିଂ ଭିତରେ କୁଆଡେ ବୋମା ଅଛି ! ଆଉ ଏଭଳି ଖବର ପାଇବା ପରେ ବମ୍‌ ସ୍କ୍ୱାର୍ଡଠାରୁ ଆରମ୍ଭ କରି ଡଗ୍ ସ୍କ୍ୱାର୍ଡ, ସଭିଙ୍କ ଭିତରେ ଦେଖାଗଲା ତତ୍ପରତା ।

ଗତ କିଛି ମାସ ଧରି ରାଜ୍ୟରେ ଥିବା ଏକାଧିକ କୋର୍ଟ, ବିମାନବନ୍ଦର ଓ ପାସପୋର୍ଟ ଅଫିସରେ ଦେଖିବାକୁ ମିଳିଛି ଏଭଳି କିଛି ଦୃଶ୍ୟ । ତେବେ ଭୁବନେଶ୍ୱର ପାସପୋର୍ଟ ଅଫିସକୁ ବୋମାରେ ଉଡାଇ ଦେବାକୁ ନେଇ ଧମକ ମିଳିବା ପରେ ପୋଲିସ ଆରମ୍ଭ କରିଥିଲା ଛାନଭିନ୍‌ । ନୟାପଲ୍ଲୀ ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୂର୍ଣ୍ଣ ବିଲଡିଂକୁ ତନତନ କରି ଯାଞ୍ଚ କରିଥିଲା । ହେଲେ ଆସିଥିବା ମେଲ୍ ଆଇଡିର ନଥିଲା କିଛି ସତ୍ୟତା, ଯାହାକୁ ନେଇ ଚିନ୍ତାରେ ପୋଲିସ । କିଏ ଆଉ କାହିଁକି ଏଭଳି ବାରବାର ଧମକପୂର୍ଣ୍ଣ ମେଲ୍ କରୁଛି, ତାକୁ ନେଇ ଖୋଳତାଡ଼ ଜାରି ରହିଛି ।

ସେମିତି କିଛି ମାସ ଧରି ଲଗାତାର ସାରା ରାଜ୍ୟକୁ ମିଳୁଛି ଧମକପୂର୍ଣ୍ଣ ମେଲ୍ । ଜାନୁଆରୀ ୨୦୨୬ ମସିହାରେ ରାଜ୍ୟର ବିଭିନ୍ନ କୋର୍ଟକୁ ମଧ୍ୟ ମିଳିଥିଲା ବମ୍ ଧମକ । ହାଇକୋର୍ଟଠାରୁ ଆରମ୍ଭ କରି ସମ୍ବଲପୁର ଓ ଦେବଗଡ଼ କୋର୍ଟକୁ ଉଡ଼ାଇ ଦେବା ପାଇଁ ଆସିଥିଲା ମେଲ୍ । ଯାଞ୍ଚ ପରେ ଏହା ଫେକ୍ ବୋଲି ଜଣାପଡିଥିଲେ ବି କିଛି ସମୟ ପାଇଁ ଆତଙ୍କ ଖେଳିଯାଇଥିଲା ।

ହେଲେ ପ୍ରଶ୍ନ ଉଠୁଛି, କିଏ ସେହି ମେଲ୍ ଧାରୀ ? ଯିଏ ବାରମ୍ବାର ଏଭଳି ମେଲ୍ କରିବା ପରେ ବି ତା' ପାଖରେ ପହଞ୍ଚି ପାରୁନି ରାଜ୍ୟ ପୋଲିସ । ଅନ୍ଧାରରେ ବାଡ଼ି ବୁଲାଉଛି କି ପୋଲିସ ? ବୁଧବାର ପାସପୋର୍ଟ ଅଫିସକୁ ଆସିଥିବା ମେଲ୍ ସତେ ଯେମିତି ପୋଲିସକୁ ଏକ ଖୋଲା ଚ୍ୟାଲେଞ୍ଜ । ସେପଟେ ସାଇବର ଏକ୍ସପର୍ଟଙ୍କ କହିବା କଥା, ବିଭିନ୍ନ ଫେକ୍ ଆଇଡି ଓ ଭିନ୍ନ ଭିନ୍ନ ଆଇପି (IP) ଠିକଣା ବ୍ୟବହାର କରି ଏହି ଠକମାନେ ପୋଲିସକୁ ଚକମା ଦେଉଛନ୍ତି ।

ଏଥିସହ ପଢ଼ନ୍ତୁ: ଭୁବନେଶ୍ୱର କୋର୍ଟକୁ ବୋମା ଧମକ, ପହଞ୍ଚିଲା ବମ୍ ସ୍କ୍ୱାଡ୍ ଓ ସନ୍ଧାନୀ କୁକୁର