Irrigation Project / ଚାଷୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ବଡ଼ ଭେଟି; ମେଗା ଲିଫ୍ଟ ଇରିଗେସନ୍ ପ୍ରକଳ୍ପ କ୍ଲଷ୍ଟର-୩୮ର କରିବେ ଉଦଘାଟନ

କେନ୍ଦୁଝର: ଜିଲ୍ଲାର ବିକାଶ ଯାତ୍ରାରେ ଯୋଡ଼ି ହେବାକୁ ଯାଉଛି ଆଉ ଏକ ନୂଆ ଅଧ୍ୟାୟ । ଗ୍ରାମୀଣ ବିକାଶ, କୃଷି ପାଇଁ ଜଳସେଚନ, ଉନ୍ନତ ସ୍ୱାସ୍ଥ୍ୟସେବା ଏବଂ ବ୍ୟାଙ୍କିଙ୍ଗ୍ ସୁବିଧାର ସମ୍ପ୍ରସାରଣ ଦିଗରେ ଜିଲ୍ଲାବାସୀଙ୍କୁ ମିଳିବ ଅନେକ ନୂଆ ସୁଯୋଗ । ଏହି ଅବସରରେ ଆଜି (ଶନିବାର) ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକାଧିକ ବିକାଶମୂଳକ ପ୍ରକଳ୍ପର ଶୁଭାରମ୍ଭ ଓ ଉଦ୍‌ଘାଟନ କରିବେ ।

ଏଥିମଧ୍ୟରେ ପ୍ରମୁଖ ଆକର୍ଷଣ ହେଉଛି ପ୍ରାୟ ୧୧୮.୫୪ କୋଟି ଟଙ୍କା ବ୍ୟୟ ଅଟକଳରେ ରାଇକଳା, ସତୀକୁଦର ଓ ଜାରକାଣୀଠାରେ କାର୍ଯ୍ୟକାରୀ ହେବାକୁ ଥିବା ମେଗା ଲିଫ୍ଟ ଇରିଗେସନ୍ ପ୍ରକଳ୍ପ କ୍ଲଷ୍ଟର-୩୮ । ଏହି ପ୍ରକଳ୍ପ ଦ୍ୱାରା ୪,୭୮୨.୨୩ ହେକ୍ଟର ଚାଷଜମିକୁ ଜଳସେଚନ ସୁବିଧା ମିଳିବ । ଏଥିସହ କେନ୍ଦୁଝର ବ୍ଲକ୍‌ର ବିଭିନ୍ନ ଗ୍ରାମ ସମେତ ମୟୂରଭଞ୍ଜ ଜିଲ୍ଲାର ଜାରକାଣୀ ଅଞ୍ଚଳର ପ୍ରାୟ ୨୭ ହଜାର ୭୫୪ ଜଣ ଚାଷୀ ଉପକୃତ ହେବେ ।

ଏହି ଜଳସେଚନ ପ୍ରକଳ୍ପ କୃଷକମାନଙ୍କୁ ମୌସୁମୀ ବର୍ଷା ଉପରେ ନିର୍ଭରଶୀଳତାରୁ ମୁକ୍ତ କରିବା ସହ ବହୁବିଧ ଫସଲ ଚାଷ ପାଇଁ ନୂଆ ସମ୍ଭାବନା ସୃଷ୍ଟି କରିବ । ଫଳରେ କୃଷି ଉତ୍ପାଦନ ବୃଦ୍ଧି ସହ ଚାଷୀ ପରିବାରଙ୍କ ଆର୍ଥିକ ସ୍ଥିତିରେ ମଧ୍ୟ ଉନ୍ନତି ଆସିବା ଆଶା କରାଯାଉଛି ।

• ଝୁମ୍ପୁରାରେ ନୂଆ ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରର ହେବ ଉଦଘାଟନ

ଅନ୍ୟପକ୍ଷରେ ମୁଖ୍ୟମନ୍ତ୍ରୀ କାର୍ଯ୍ୟକ୍ରମରେ ଯୋଗଦେବା ପୂର୍ବରୁ ଝୁମ୍ପୁରାଠାରେ ୧୭.୯୭ କୋଟି ଟଙ୍କା ବ୍ୟୟରେ ନବନିର୍ମିତ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଗୃହର ଉଦ୍‌ଘାଟନ କରିବେ । ଏହି ନୂତନ ସ୍ୱାସ୍ଥ୍ୟ ଭିତ୍ତିଭୂମି ଦ୍ୱାରା ଅଞ୍ଚଳର ଗ୍ରାମୀଣ ଓ ଆଦିବାସୀ ଜନସାଧାରଣଙ୍କୁ ଉନ୍ନତମାନର ସ୍ୱାସ୍ଥ୍ୟସେବା ନିଜ ଅଞ୍ଚଳରେ ମିଳିପାରିବ ।

• ରାଇକଳାକୁ ମିଳିବ SBIର ନୂଆ ଶାଖା

ସେହିପରି ରାଇକଳାଠାରେ ଭାରତୀୟ ଷ୍ଟେଟ୍ ବ୍ୟାଙ୍କର ନୂତନ ଶାଖା ଉଦ୍‌ଘାଟନ ମଧ୍ୟ ଏହି ଅଞ୍ଚଳ ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ। ଏହାଦ୍ୱାରା ଗ୍ରାମାଞ୍ଚଳର ଲୋକଙ୍କୁ ହାତପାହାନ୍ତାରେ ବ୍ୟାଙ୍କିଙ୍ଗ୍ ସେବା ମିଳିବା ସହ ଆର୍ଥିକ ଅନ୍ତର୍ଭୁକ୍ତିକରଣକୁ ଅଧିକ ପ୍ରୋତ୍ସାହନ ମିଳିବ । ବିଶେଷକରି ଚାଷୀ, ସ୍ୱୟଂ ସହାୟକ ଗୋଷ୍ଠୀ ଏବଂ କ୍ଷୁଦ୍ର ଉଦ୍ୟୋଗୀମାନେ ବ୍ୟାଙ୍କ ଋଣ, ସଞ୍ଚୟ ଓ ଅନ୍ୟାନ୍ୟ ଆର୍ଥିକ ସେବା ସହଜରେ ପାଇପାରିବେ ।

ପଢନ୍ତୁ ଏହି ଖବର: ୧୨୯୧ କୋଟି ଟଙ୍କାର ୩୩୦ଟି ପ୍ରକଳ୍ପର ଶିଳାନ୍ୟାସ ଓ ଉଦ୍‌ଘାଟନ କଲେ ମୁଖ୍ୟମନ୍ତ୍ରୀ

ଜଳସେଚନଠାରୁ ଆରମ୍ଭ କରି ସ୍ୱାସ୍ଥ୍ୟ ଓ ଆର୍ଥିକ ସେବା ପର୍ଯ୍ୟନ୍ତ, ଏହି ସମସ୍ତ ପ୍ରକଳ୍ପ କେନ୍ଦୁଝରର ଗ୍ରାମୀଣ ଜୀବନଧାରାରେ ନୂଆ ପରିବର୍ତ୍ତନ ଆଣିବା ସହ ଜିଲ୍ଲାର ସାମଗ୍ରିକ ବିକାଶକୁ ଆହୁରି ଆଗକୁ ନେବାରେ ସହାୟକ ହେବ ।