Odisha CM message / କ୍ୟାମ୍ପସରେ ଚାଲିଛି ଛାତ୍ର ନେତା ଚୟନ; ଭୋଟ୍ ପଡୁଥିବାବେଳେ ଆସିଲା ମୁଖ୍ୟମନ୍ତ୍ରୀଙ୍କ ବାର୍ତ୍ତା

ଭୁବନେଶ୍ଵର: ଆଜି ଛାତ୍ର ସଂସଦ ନିର୍ବାଚନ । ଦୀର୍ଘ ୮ ବର୍ଷର ବ୍ୟବଧାନ ପରେ ନିର୍ବାଚନ ହେଉଥିବାରୁ ଛାତ୍ରଛାତ୍ରୀଙ୍କ ମଧ୍ୟରେ ଦେଖିବାକୁ ମିଳିଛି ପ୍ରବଳ ଉତ୍ସାହ । ନିଜ ପସନ୍ଦର ପ୍ରାର୍ଥୀଙ୍କୁ ବିଜୟୀ କରିବା ପାଇଁ ଭୋଟ୍ ଦେବାକୁ ଉତ୍ସାହର ସହ ଅପେକ୍ଷା କରିଛନ୍ତି ଭୋଟର୍ । ନିର୍ବାଚନକୁ ଶୃଙ୍ଖଳିତ ଓ ସୁରୁଖୁରୁରେ ସମ୍ପନ୍ନ କରିବା ପାଇଁ ସମସ୍ତ ପ୍ରକାର ବ୍ୟବସ୍ଥା ଗ୍ରହଣ କରାଯାଇଛି । ଛାତ୍ର ସଂସଦ ନିର୍ବାଚନ ପାଇଁ ଆଜି ଭୋଟିଂ ଚାଲିଥିବା ବେଳେ ଛାତ୍ରଛାତ୍ରୀଙ୍କୁ ସନ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।

ନିଜ ଏକ୍ସ ହ୍ୟାଣ୍ଡେଲରେ ଏକ ପୋଷ୍ଟ କରି ମୁଖ୍ୟମନ୍ତ୍ରୀ କହିଛନ୍ତି, "ହିଂସା, ବିଭେଦର ଶିକାର ନହୁଅନ୍ତୁ । ନିର୍ବାଚନ କେବଳ ପ୍ରତିନିଧି ବାଛିବାର ଏକ ପ୍ରକ୍ରିୟା ନୁହେଁ ବରଂ ଗଣତନ୍ତ୍ରର ମୂଳଦୁଆ ଏବଂ ଭବିଷ୍ୟତର ନେତୃତ୍ୱ ଗଠନର ମାଧ୍ୟମ । ଆଜି ଯେଉଁ ମୂଲ୍ୟବୋଧ, ଶୃଙ୍ଖଳା ଓ ଆଦର୍ଶର ଅଭ୍ୟାସ କରିବେ ଆଗାମୀ ଦିନରେ ରାଜ୍ୟ ତଥା ଦେଶକୁ ଏକ ନୂତନ ଦିଗ୍‌ଦର୍ଶନ ଦେବ । କୌଣସି ପ୍ରକାର ହିଂସା, ଗୁଜବ ବା ବିଭେଦର ଶିକାର ନହୁଅନ୍ତୁ । ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ଭାବେ ଏହି ନିର୍ବାଚନରେ ସାମିଲ ହୁଅନ୍ତୁ ।" ସମସ୍ତ ଛାତ୍ରଛାତ୍ରୀ ଓ ପ୍ରାର୍ଥୀଙ୍କୁ ଶୁଭେଚ୍ଛା ଜଣାଇଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।

ମୋର ପ୍ରିୟ ଛାତ୍ରଛାତ୍ରୀ ବନ୍ଧୁଗଣ! ଛାତ୍ର ସଂସଦ ନିର୍ବାଚନ କେବଳ ପ୍ରତିନିଧି ବାଛିବାର ଏକ ପ୍ରକ୍ରିୟା ନୁହେଁ, ବରଂ ଏହା ଗଣତନ୍ତ୍ରର ମୂଳଦୁଆ ଏବଂ ଭବିଷ୍ୟତର ନେତୃତ୍ୱ ଗଠନର ଏକ ମୁଖ୍ୟ ମାଧ୍ୟମ। ଆଜି କ୍ୟାମ୍ପସରେ ଆପଣମାନେ ଯେଉଁ ମୂଲ୍ୟବୋଧ, ଶୃଙ୍ଖଳା ଓ ଆଦର୍ଶର ଅଭ୍ୟାସ କରିବେ, ତାହା ଆଗାମୀ ଦିନରେ ଆମ ରାଜ୍ୟ ତଥା ଦେଶକୁ ଏକ ନୂତନ ଦିଗ୍‌ଦର୍ଶନ ଦେବ। ତେଣୁ କୌଣସି ପ୍ରକାର ହିଂସା, ଗୁଜବ ବା ବିଭେଦର ଶିକାର ନ ହୋଇ ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ଭାବେ ଏହି ନିର୍ବାଚନରେ ସାମିଲ ହୁଅନ୍ତୁ। ସମସ୍ତ ଛାତ୍ର ଛାତ୍ରୀ ଓ ପ୍ରାର୍ଥୀଙ୍କୁ ମୋର ଆନ୍ତରିକ ଶୁଭେଚ୍ଛା।

— Mohan Charan Majhi (@MohanMOdisha) October 15, 2026

• ମୈଦାନରେ ୮୬୬ ସଭାପତି ପ୍ରାର୍ଥୀ

କ୍ୟାମ୍ପସ ନିର୍ବାଚନ ପାଇଁ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ହୋଇସାରିଛି । ସଭାପତି ପଦ ପାଇଁ ମଇଦାନରେ ଅଛନ୍ତି ସର୍ବାଧିକ ୮୬୬ ପ୍ରାର୍ଥୀ । କଲେଜରେ ୮୨୮ ଏବଂ ବିଶ୍ଵବିଦ୍ୟାଳୟ ୩୮ ଜଣ । ସେହିପରି ଉପ ସଭାପତି ପଦ ପାଇଁ ମୋଟ ପ୍ରାର୍ଥୀ ଅଛନ୍ତି ୭୧୬ ଜଣ, ଯେଉଁଥିରୁ କଲେଜରେ ୬୭୯ ଏବଂ ବିଶ୍ଵବିଦ୍ୟାଳୟରେ ୩୭ ଜଣ ସାମିଲ । ସାଧାରଣ ସମ୍ପାଦକ ପାଇଁ ମୋଟ ପ୍ରାର୍ଥୀ ୬୧୬ ଜଣ ଥିବାବେଳେ କଲେଜରୁ ୫୯୩ ଜଣ ଏବଂ ବିଶ୍ଵବିଦ୍ୟାଳୟରୁ ୨୩ ଜଣ ଅଛନ୍ତି । ସେପଟେ କ୍ୟାମ୍ପସଗୁଡ଼ିକରେ କଡ଼ା ସୁରକ୍ଷା ବ୍ୟବସ୍ଥା ହୋଇଛି । ହଷ୍ଟେଲ ଓ କଲେଜ ପରିସର ଖାଲି କରିବାକୁ ନିର୍ଦ୍ଦେଶ ଦିଆଯାଇଛି । ସେପଟେ ହଟାଯାଇଛି ବ୍ୟାନର-ପୋଷ୍ଟର । ଆଜି ସକାଳ ୮ଟାରୁ କ୍ୟାମ୍ପସରେ ଭୋଟିଂ । ଅପରାହ୍ନରେ ବାହାରିବ ରେଜଲ୍ଟ ।

• ଶୈଳବାଳାରେ ଭୋଟରଙ୍କୁ ଫୁଲ ଓ ଚକୋଲେଟ୍

ଭୋଟ ଦେବା ପରେ ଭୋଟରଙ୍କୁ ଦିଆଯାଉଛି ଫୁଲ ଓ ଚକୋଲେଟ୍ । ମତଦାନ ପ୍ରକ୍ରିୟାରେ ସାମିଲ ହୋଇଥିବାରୁ ଦିଆଯାଉଛି କୃତଜ୍ଞତା । ଏଭଳି ଦୃଶ୍ୟ ଦେଖିବାକୁ ମିଳିଛି କଟକ ଶୈଳବାଳା ମହିଳା ସ୍ଵୟଂ ଶାସିତ ମହାବିଦ୍ୟାଳୟରେ । କଲେଜ ଗେଟ୍ ସମ୍ମୁଖରେ ଉପସ୍ଥିତ ଥିବା ପ୍ରାର୍ଥିନୀ ଓ ତାଙ୍କ ସହପାଠିନୀ ହାତରେ ଧରିଛନ୍ତି ଗୋଲାପ ଫୁଲ ଓ ଚକୋଲେଟ୍ । ଭୋଟ ଦେଇକି ଯିବାବେଳେ ଭୋଟରଙ୍କୁ ଦେଉଛନ୍ତି ଫୁଲ ଓ ଚକୋଲେଟ୍ ।

ପଢନ୍ତୁ ଏହି ଖବର: ନିଜ ନିଜ ନେତା ବାଛୁଛନ୍ତି ଛାତ୍ରଛାତ୍ରୀ: ଭୋଟ୍‌ ଦେଉଛି କ୍ୟାମ୍ପସ୍‌

• ସନ୍ଧ୍ୟା ସୁଦ୍ଧା ରେଜଲ୍ଟ

ରାଜ୍ୟର ୩୪୬ଟି ମହାବିଦ୍ୟାଳୟ ଓ ୧୩ଟି ବିଶ୍ୱବିଦ୍ୟାଳୟରେ ସକାଳ ୮ଟାରୁ ମତଦାନ ଆରମ୍ଭ ହୋଇଥିବା ବେଳେ ଏହା ଅପରାହ୍ନ ୨ଟା ପର୍ଯ୍ୟନ୍ତ ଚାଲିବ । ଏହାପରେ ଅପରାହ୍ନ ୨ଟାରୁ ଆରମ୍ଭ ହେବ ଭୋଟ ଗଣତି । ଏହାପରେ ଆଜି ସନ୍ଧ୍ୟା ସୁଦ୍ଧା ସାମ୍ନାକୁ ଆସିବ ନିର୍ବାଚନର ଫଳାଫଳ । ବିଜୟୀ ପ୍ରାର୍ଥୀମାନେ ଆସନ୍ତାକାଲି ଅର୍ଥାତ୍ ୧୬ ତାରିଖରେ ଶପଥ ଗ୍ରହଣ କରିବେ ।