Odisha Cyclone Update / ଓଡ଼ିଶାରେ ସମ୍ଭାବ୍ୟ ବାତ୍ୟାକୁ ନେଇ ବଡ଼ ଅପଡେଟ୍; କାଲି ସନ୍ଧ୍ୟାରେ ଜଣାପଡ଼ିବ

ଭୁବନେଶ୍ଵର: ଦିନ ଗଡ଼ିବା ସହ ଓଡ଼ିଶାବାସୀଙ୍କ ମନରେ ଶଙ୍କା ବଢ଼ୁଛି । ବଙ୍ଗୋପସାଗରରେ ସୃଷ୍ଟି ହେବ କି ବାତ୍ୟା ? ଓଡ଼ିଶା ଉପକୂଳ ଦେଇ ଅତିକ୍ରମ କରିବ କି? ଏଭଳି କିଛି ଚର୍ଚ୍ଚା ଆରମ୍ଭ ହୋଇଯାଇଛି । ବିଭିନ୍ନ ଏଜେନ୍ସି ମଧ୍ୟ ଏଭଳି କିଛି ଆକଳନ କରୁଥିବା ବେଳେ ଆସନ୍ତାକାଲି ସନ୍ଧ୍ୟାରେ ଲଘୁଚାପ ଉତ୍ତର ଆଣ୍ଡାମାନ ସାଗରରେ ସୃଷ୍ଟି ହେବ । ଯାହା ଅଧିକ ଶକ୍ତିଶାଳୀ ହୋଇ ଘନୀଭୂତ ହେବ ଓ ତୀବ୍ର ଅବପାତରେ ପରିଣତ ହେବ ବୋଲି ସ୍ପଷ୍ଟ କରିଛି ପାଣିପାଗ ବିଭାଗ ।

ଏପଟେ ECMWF ଓ GFS ମଡେଲର ଆକଳନ ଅନୁସାରେ ଲଘୁଚାପ ସୃଷ୍ଟି ହେବା ପରେ ଏହା ଧୀରେ ଧୀରେ ଶକ୍ତିଶାଳୀ ହୋଇପାରେ । ଅବପାତ ହେବାର ସମ୍ଭାବନା ବଢ଼ୁଛି ଏବଂ ପରେ ଗଭୀର ଅବପାତ ହେବାର ମଧ୍ୟ ସମ୍ଭାବନା ରହିଛି । ଆହୁରି ଶକ୍ତିଶାଳୀ ହୋଇ ବାତ୍ୟା ହେବାର ସମ୍ଭାବନାକୁ ଏବେ ବାଦ୍ ଦିଆଯାଇପାରୁ ନାହିଁ ।

• ରାଜ୍ୟରେ ୨୨ରୁ ବଢିବ ବର୍ଷା

ଆସନ୍ତା ୩ ଦିନ ଅର୍ଥାତ୍ ସେପ୍ଟେମ୍ବର ୨୨ ତାରିଖଠାରୁ ଓଡ଼ିଶାରେ ବଢ଼ିବ ବର୍ଷା । ଆଞ୍ଚଳିକ ପାଣିପାଗ ବିଭାଗ ଦକ୍ଷିଣ ଓଡ଼ିଶାର ସମସ୍ତ ଜିଲ୍ଲାକୁ ପ୍ରବଳରୁ ଅତି ପ୍ରବଳ ବର୍ଷା ନେଇ ଅରେଞ୍ଜ ଆଲର୍ଟ ଜାରି କରିଛି । ଯଦି ଲଘୁଚାପର ଗତିପଥ ଉତ୍ତର ଆଡ଼କୁ ବଦଳେ ତେବେ ଉପକୂଳ, ଉତ୍ତର ଉପକୂଳ ଓ ଏହାକୁ ଲାଗିଥିବା ଆଭ୍ୟନ୍ତରୀଣ ଜିଲ୍ଲାଗୁଡ଼ିକରେ ଅଧିକ ବର୍ଷାର ସମ୍ଭାବନା ବଢ଼ିବ । ରାଜ୍ୟର ୨୦ଟି ଜିଲ୍ଲାରେ ବର୍ଷାର ପ୍ରଭାବ ରହିବ । ଏଥିଲାଗି ଏହି ୨୦ ଜିଲ୍ଲାର ଜିଲ୍ଲାପାଳଙ୍କୁ ସତର୍କ ରହିବାକୁ କୁହାଯାଇଛି ।

• ବିପର୍ଯ୍ୟୟ ପରିଚାଳନା ବିଭାଗର ସମୀକ୍ଷା ବୈଠକ

ସମ୍ଭାବ୍ୟ ବାତ୍ୟା ପୂର୍ବରୁ ରାଜ୍ୟ ବିପର୍ଯ୍ୟୟ ପରିଚାଳନା ବିଭାଗ ସମୀକ୍ଷ ବୈଠକ କରିଛି । ବୈଠକରେ ବିପର୍ଯୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଉପସ୍ଥିତ ଥିଲେ । ସେ କହିଛନ୍ତି, "ଆମେ IMD ସାଙ୍ଗରେ ଲଗାତାର ସମ୍ପର୍କରେ ଅଛୁ । ଯେଉଁ ସାଇକ୍ଲୋନିକ୍ ଷ୍ଟର୍ମ ବାବଦରେ ଚର୍ଚ୍ଚା ହେଉଛି, ତାହା ଏବେ ଥାଇଲାଣ୍ଡରେ ରହିଛି । ଆସନ୍ତାକାଲି ଆଣ୍ଡାମାନରେ ପହଁଞ୍ଚିବ । ଦିନେ ଦୁଇ ଦିନ ପରେ ସାଇକ୍ଲୋନିକ୍ ଷ୍ଟର୍ମ ରୂପରେ ପରିଣତ ହୋଇପାରେ । ତେଣୁ ଏବେଠୁ ସମ୍ପୂର୍ଣ୍ଣ ଆକଳନ କରିବା ସମ୍ଭବ ନୁହେଁ । କାଲି ସନ୍ଧ୍ୟା ପରେ ଏହାର ଗତି ବାବଦରେ ସ୍ପଷ୍ଟୀକରଣ ଆସିବ । ୟେଲୋ ଜୋନରେ ଥିବା ୨୦ ଜିଲ୍ଲାର ଜିଲ୍ଲାପାଳଙ୍କୁ ସଜାଗ ରଖାଯାଇଛି । ବାକି ଅନ୍ୟ ଜିଲ୍ଲାମାନଙ୍କୁ ମଧ୍ୟ ସଜାଗ ରହିବାକୁ କୁହାଯାଇଛି । ୨୩ ତାରିଖ ବେଳକୁ ହୁଏତ ସାଇକ୍ଲୋନିକ୍ ସର୍କୁଲେସନ୍ ଲଘୁଚାପ ରୂପରେ ରୂପାନ୍ତରିତ ହୋଇପାରେ । କେହି ବିଚଳିତ ହୁଅନ୍ତୁ ନାହିଁ ।"

ପଢନ୍ତୁ ଏହି ଖବର: ଅକ୍ଟୋବର ନୁହେଁ, ସେପ୍ଟେମ୍ବରରେ ଆସିପାରେ ବାତ୍ୟା, ଭୟ ବଢ଼ାଇଲା ପାଣିପାଗ ବିଜ୍ଞାନୀଙ୍କ ଆକଳନ

• କାଲି ସନ୍ଧ୍ୟାରେ ସ୍ପଷ୍ଟ ହେବ ଚିତ୍ର

ଏହି ପ୍ରଣାଳୀଟି ବାତ୍ୟାର ରୂପ ନେବ କି ନାହିଁ ଏବଂ ଏହାର ଗତିପଥ କେଉଁଆଡ଼େ ରହିବ, ସେ ନେଇ ବର୍ତ୍ତମାନ କୌଣସି ସ୍ପଷ୍ଟତା ନାହିଁ । ତେବେ ଅପେକ୍ଷା ଆସନ୍ତାକାଲି ସଂଧ୍ୟାକୁ । ଆସନ୍ତାକାଲି ସନ୍ଧ୍ୟାରେ ବାତ୍ୟାକୁ ନେଇ ଚିତ୍ର ସ୍ପଷ୍ଟ ହେବ । ଲଘୁଚାପ କ୍ଷେତ୍ର ସୃଷ୍ଟି ହେବା ପୂର୍ବରୁ ଆତଙ୍କିତ ନ ହେବାକୁ ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶିକା ମନୋରଞ୍ଜନ ମହାନ୍ତି ପରାମର୍ଶ ଦେଇଛନ୍ତି ।