ଭୁବନେଶ୍ଵର: ୪ ଦିନର କାର୍ଯ୍ୟବନ୍ଦ ପରେ ଆନ୍ଦୋଳନ ଓହରିଲେ ଡାକ୍ତର । ସ୍ଥଗିତ ରହିଲା ଡାକ୍ତରଙ୍କ ଆନ୍ଦୋଳନ । OMSA ସହ ବୈଠକ ପରେ ଡାକ୍ତର ଆନ୍ଦୋଳନ ସ୍ଥଗିତ ରଖିଥିବା ନେଇ ସୂଚନା ଦେଇଛନ୍ତି ସ୍ଵାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ । ଆସନ୍ତା ୨୨ ତାରିଖରେ ବସିବ OMSA ସହ ପରବର୍ତ୍ତୀ ବୈଠକ ।

ବୈଠକ ପରେ ସ୍ଵାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ କହିଛନ୍ତି, "OMSA ସହ ସ୍ଵାସ୍ଥ୍ୟ ବିଭାଗର ଆଲୋଚନା ଫଳପ୍ରଦ ହୋଇଛି । ସେମାନେ ରଖିଥିବା ୧୦ ଦଫା ଦାବି ଉପରେ ପୁଙ୍ଖାନୁପୁଙ୍ଖ ଆଲୋଚନା ହୋଇଛି । ସେମାନଙ୍କ ଦାବିକୁ ପୁଣି ଥରେ ତର୍ଜମା କରାଯିବ । ଦାବିକୁ କିଭଳି ଆଗାମୀ ଦିନରେ ସମୟ ଅନୁସାରେ କାର୍ଯ୍ୟକାରୀ କରାଯିବ । ସେଥିପାଇଁ ଏକ ଉଚ୍ଚସ୍ତରୀୟ କମିଟି ଗଠନ କରାଯାଇଛି । କମିଟି ପାଇଁ ଆଜି ବିଜ୍ଞପ୍ତି ପ୍ରକାଶ ପାଇବ । କମିଟି OMSA ଦାବି ଉପରେ ଆଲୋଚନା କରିବ ।"

ଏଥିସହ ପଢ଼ନ୍ତୁ: ଭୁବନେଶ୍ୱରରେ ହେବ ଇଷ୍ଟର୍ଣ୍ଣ ଜୋନାଲ କାଉନସିଲ ଷ୍ଟାଣ୍ଡିଂ କମିଟି ବୈଠକ 

ଆଗାମୀ ଦିନରେ ରାଜ୍ୟର ସ୍ଵାସ୍ଥ୍ୟସେବା ଉପରେ ବାଘ୍ଯାତ ଆସିବ ନାହିଁ । OMSA ଏନେଇ ଆଶ୍ଵାସନା ଦେଇଛି । ସେମାନେ ରୋଗୀ ସେବାକୁ ପ୍ରାଥମିକତା ଦେବେ । ଲୋକଙ୍କ ସେବାରେ ନିୟୋଜିତ ହେବେ । ସରକାର ସେମାନଙ୍କ ଦାବିକୁ ସମ୍ମାନ ଦେବେ ବୋଲି କହିଛନ୍ତି ସ୍ଵାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ ।

ସ୍ଵାସ୍ଥ୍ୟ ବିଭାଗ ସହ ବୈଠକ ପରେ ପ୍ରତିକ୍ରିୟା ରଖିଛନ୍ତି OMSA ସଭାପତି ଡକ୍ଟର କିଶୋର ଚନ୍ଦ୍ର ମିଶ୍ର । ସେ କହିଛନ୍ତି, "ସ୍ଵାସ୍ଥ୍ୟ ବିଭାଗ ସହ ଆଲୋଚନା ଫଳପ୍ରଦ ରହିଛି । ଉଚ୍ଚସ୍ତରୀୟ କମିଟି ଗଠନ କରାଯାଇ ଆମ ସମସ୍ୟାର ତର୍ଜମା କରାଯିବ । କମିଟି ଆଗରେ ଆମେ ଯୁକ୍ତି ରଖିବୁ । ଆଶା କରୁଛୁ, ଗୁରୁତ୍ଵପୂର୍ଣ୍ଣ ଦାବି ଗୁଡ଼ିକର ସମାଧାନ ହୋଇ ପାରିବ ।"

ଏଥିସହ ପଢ଼ନ୍ତୁ: ରାଜଧାନୀରେ ମୁକୁଳା ଡ୍ରେନ୍‌ରେ ଭାସିଗଲେ ଯୁବକ; ୧୧ ବର୍ଷରେ ଗଲାଣି ୭ ଜୀବନ 

ସେହିଭଳି ଚିକିତ୍ସା ସେବାକୁ ନେଇ ଥିବା ସମସ୍ୟାର ସମାଧାନ ବିଭାଗ ଖୁବ୍‌ଶୀଘ୍ର କରିବେ । ଆନ୍ଦୋଳନରତ ଡାକ୍ତର ଆଜିଠୁ କାର୍ଯ୍ୟରେ ଯୋଗ ଦେବେ । ଆନ୍ଦୋଳନ ସ୍ଥଗିତ ରହିଥିବା ନିଶ୍ଚିତ କରିଛନ୍ତି OMSA ସଭାପତି ଡକ୍ଟର କିଶୋର ଚନ୍ଦ୍ର ମିଶ୍ର । ଆସନ୍ତା ୨୨ ତାରିଖରେ ଉଚ୍ଚସ୍ତରୀୟ କମିଟି ସହ ବୈଠକ ବସିବ । ଯେଉଁଥିରେ OMSA ପ୍ରେଜେଣ୍ଟେସନ୍ ରଖିବ ବୋଲି ସୂଚନା ଦେଇଛନ୍ତି ଡକ୍ଟର କିଶୋର ଚନ୍ଦ୍ର ମିଶ୍ର ।