Devastating Floods / ଚାଷୀ ମୁଣ୍ଡରେ ଚଡ଼କ; ବନ୍ୟା ପୋଛି ନେଲା ହଜାର ହଜାର ହେକ୍ଟର ଜମିରେ ଧାନ ସହ ପରିବା ଫସଲ

ଭୁବନେଶ୍ଵର: ବନ୍ୟା ଉଜାଡ଼ି ଦେଲା ବର୍ଷକର ଦାନା । ଯେଉଁ ଜମିରେ ଫସଲ ଲହରୀ ଖେଳିବା କଥା ଏବେ ସେସବୁ ବାଲିଚର । ବର୍ଷର ପରିଶ୍ରମ ଉଜୁଡ଼ି ଯାଇଥିବା ଦେଖି ଏବେ ଚିନ୍ତାରେ ଚାଷୀ । ବନ୍ୟା ପୋଛି ନେଇଛି ହଜାର ହଜାର ହେକ୍ଟର ଜମିରେ ଧାନ ସହ ପରିବା ଫସଲ । ପାଣି କମିଲେ ପ୍ରଶାସନ ଆକଳନ କରିବ କ୍ଷୟକ୍ଷତି । ତେବେ ସରକାରୀ ସହାୟତାକୁ ଅପେକ୍ଷା କରିଛନ୍ତି ବିପନ୍ନ ।

ବନ୍ୟା ଧୋଇ ନେଇଛି ଚାଷ । ଯେଉଁ ଜମିରେ ସବୁଜ ଫସଲ ଲହରୀ ଖେଳିବା କଥା, ସେଠାରେ ଏବେ କେବଳ କାଦୁଅ ଓ ନଷ୍ଟ ହୋଇଥିବା ଫସଲର ଚିତ୍ର । ଋଣ କରି ଚାଷ କରିଥିବା ଚାଷୀ ଆଜି ମୁଣ୍ଡରେ ହାତ ଦେଇ ବସିଛି ।

ଏଥିସହ ପଢ଼ନ୍ତୁ: ୫ ନଦୀରେ ୧୦ରୁ ଅଧିକ ଘାଇ; ଉଜୁଡି ଯାଇଛି ଜୀବନ ଜୀବିକା 

ଯାଜପୁର ଜିଲ୍ଲାର ବିଭିନ୍ନ ବ୍ଲକରେ ଚାଷୀ ମୁଣ୍ଡରେ ହାତ ଦେଇ ବସିଛନ୍ତି । କୋରେଇ ବ୍ଲକ ତଣ୍ଡାରା ପଞ୍ଚାୟତ ଦେଇ ପ୍ରବାହିତ ହେଉଛି ଖରାସ୍ରୋତା ନଦୀ । ଏହି ନଦୀରେ ବନ୍ୟା ଯୋଗୁ ତାଣ୍ଡରା ପଂଚାୟତର ହେକ୍ଟର ହେକ୍ଟର ଚାଷ ଜମିରେ ବନ୍ୟା ଜଳ ପଶି ବ୍ୟାପକ ଫସଲ ନଷ୍ଟ ହୋଇଛି ।

ଧର୍ମଶାଳାର ବାଙ୍କସାହି ଘାଇ ଦେଇଛି ଚାଷୀଙ୍କୁ ଦୁର୍ଦ୍ଦଶା । ବରୀ ବ୍ଲକ କିମ୍ଭିରିଆପାଳ ବାଙ୍କସାହିରେ ହୋଇଥିଲା ୧୫୦ ଫୁଟ ଘାଇ ସୃଷ୍ଟି ହୋଇଛି । ଏହି ଘାଇ ଦ୍ୱାରା ଘାଇ ମୁହଁରେ ଥିବା ଚାଷ ଜମି ଏବେ ବାଲିଚର । ବଡ଼ ବଡ଼ ପଥର ମାନ ବିଲରେ ପଡିଛି । ବିଲ ଭିତରେ ଅଣ୍ଟାଏ ଅଣ୍ଟାଏ ପାଣି ଥିବାବେଳେ ବୁଡ଼ି ରହିଛି ଧାନ ଓ ପନିପରିବା ଚାଷ ।

ସେପଟେ ବୈତରଣୀ ବନ୍ୟା ଆଣି ଦେଇଛି ଆନନ୍ଦପୁରବାସୀଙ୍କ ପାଇଁ ଦୁଃଖ । ବନ୍ୟା ଛାଡ଼ିବା ପରେ ଚାଷୀଙ୍କ ଦୁର୍ଦ୍ଦଶା ବଢ଼ି ଯାଇଛି । ବନ୍ୟା ଜଳ ଚାଷଜମିରେ ମାଡ଼ି ଯାଇ ଧାନ ଫସଲ ସମେତ ପରିବା ଚାଷ ମଧ୍ୟ ନଷ୍ଟ ହୋଇଛି ।

ବନ୍ୟାରେ ବେହାଲ୍ କଟକ ଜିଲ୍ଲା ତିଗିରିଆ ବ୍ଲକ । ଗଦାଧରପୁର, ହାଟମାଳ, ବଡ଼ନାଉପୁଟ୍ ପୁରୁଣା ତିଗିରିଆ ଓ ସୋମପଡା ପଞ୍ଚାୟତ ପ୍ରଭାବିତ ହୋଇଥିବା ବେଳେ ବନ୍ୟାଜଳରେ ବୁଡ଼ି ରହିଛି ହେକ୍ଟର ହେକ୍ଟର ଚାଷ ଜମି । ପଚି ସଢ଼ି ନଷ୍ଟ ହୋଇଯାଇଛି ପରିବା, ବନ୍ୟା ପାଣିରେ ଭାସୁଛି ଧାନ ତଳି । କରଜରେ ଟଙ୍କା ଆଣି ଆଖିରୁ ଲୁହ ଗଡାଉଛି ଚାଷୀ ।

ବସ୍ତା ବ୍ଲକର ଦରଡ଼ା ନିକଟରେ ୩୦୦ ଫୁଟର ଘାଇ ସୃଷ୍ଟି ହୋଇଥିବା ଯୋଗୁ ହଜାର ହଜାର ହେକ୍ଟର ଚାଷ ଜମିରେ ବନ୍ୟା ପାଣି ପ୍ରବେଶ କରିଛି । ଫଳରେ ଜମିରେ ଧାନ ତଳି ପଚି ନଷ୍ଟ ହୋଇଯାଇଛି ।

ଏଥିସହ ପଢ଼ନ୍ତୁ: ବନ୍ୟା ସ୍ଥିତି ଅନୁଧ୍ୟାନ ପରେ ମୁଖ୍ୟମନ୍ତ୍ରୀଙ୍କ ବଡ଼ ସୂଚନା, ପାଣି ଛାଡ଼ିବାର ୭୨ ଘଣ୍ଟାରେ ରିପୋର୍ଟ ଦେବେ ଅଧିକାରୀ 

ପୁରୀ ଜିଲ୍ଲା ନିମାପଡାରେ ବି ସମାନ ସ୍ଥିତି । ଧନୁଆଁ ନଦୀ ଅବବାହିକାରେ ଥିବା ଦୁଇଟି ପଂଚାୟତ ତଥା ଶଗଡ଼ା ଓ ବଡ଼ ମାଛପୁର ପଞ୍ଚାୟତର ୧୨ରୁ ଉର୍ଦ୍ଧ ଗାଁରେ ବନ୍ୟାଜଳ ପଶିବା ଦ୍ୱାରା ବିଭିନ୍ନ ଅଞ୍ଚଳ ଜଳମଗ୍ନ ହୋଇଛି । ହଜାର ହଜାର ହେକ୍ଟର ଚାଷ ଜମି ବନ୍ୟା ଜଳରେ ବୁଡ଼ି ରହିଛି । କଣାସରେ ମଧ୍ୟ ବନ୍ୟା ପାଣିରେ ବୁଡିଛି ବର୍ଷକର ରୋଜଗାର । ଦୟା ଏବଂ ରାଜୁଆ ନଦୀର ବନ୍ୟା ପାଣିରେ ବ୍ୟାପକ ପନିପରିବା ସହ ଧାନ ଫସଲ ନଷ୍ଟ ହୋଇଛି ।

ନୂଆପଡ଼ା ଜିଲ୍ଲା ଖଡ଼ିଆଳ ଏବଂ ସିନାପାଲି ବ୍ଲକର ବିଭିନ୍ନ ଗାଁରେ ଚାଷୀର ବର୍ଷକର ପରିଶ୍ରମ ନଷ୍ଟ ହୋଇଛି । ଗଣ୍ଡାବାହାଳି ଗାଁର ମୁଖ୍ୟ ରାସ୍ତା ନିକଟରେ ଥିବା ଏକର ଏକର ଚାଷ ଜମି ବାଲିଚର ଏବଂ ମାଟି ପୋତି ହୋଇ ନଷ୍ଟ ହୋଇଛି ।