Orphan Students Education / ସରକାରଙ୍କ ଗ୍ରୀନ ପାସେଜ୍ ସ୍କିମ; ଉଚ୍ଚ ଶିକ୍ଷାରୁ ବଞ୍ଚିତ ହେବେନି ଅନାଥ ଛାତ୍ରଛାତ୍ରୀ

ଭୁବନେଶ୍ଵର: ବାପା-ମାଆ ନାହାନ୍ତି, ଆର୍ଥିକ ସମ୍ବଳ ନାହିଁ । ହେଲେ ଶିକ୍ଷାର ସ୍ୱପ୍ନ ଅଟକିବନି । ଅବିଭାବକଙ୍କ ଅନୁପସ୍ଥିତି, ଆର୍ଥିକ ଅନଟନ ଅଟକାପାରିବନି ପାଠପଢ଼ା । ଏଥିପାଇଁ ରାଜ୍ୟ ସରକାର ଆଣିଛନ୍ତି ‘ଗ୍ରୀନ୍ ପାସେଜ୍ ସ୍କିମ୍’ । ଉଚ୍ଚ ଶିକ୍ଷା ବିଭାଗର ଏହି ଯୋଜନା ଏବେ ସରକାରୀ ବୈଷୟିକ ବିଶ୍ବବିଦ୍ୟାଳୟ ଏବଂ କଲେଜରେ ଲାଗୁ ହେବା ନେଇ ବିଜ୍ଞପ୍ତି ଜାରି ହୋଇଛି । ଏହାର ମୂଳ ଲକ୍ଷ୍ୟ ହେଉଛି ଅନାଥ ଓ ଅସହାୟ ପିଲାଙ୍କୁ ଉଚ୍ଚଶିକ୍ଷାର ସୁଯୋଗ ଦେବା ।

• କିଏ ପାଇବେ ସୁବିଧା ?

ଏହି ସ୍କିମ ପାଇଁ କିଏ ହେବେ ଯୋଗ୍ୟ ତାକୁ ନେଇ ଅନେକଙ୍କ ମନରେ ପ୍ରଶ୍ନ ରହିଛି । ତେବେ ବିଭାଗର ବିଜ୍ଞପ୍ତି ଅନୁସାରେ ବାୟୋଲଜିକାଲ୍ କିମ୍ବା ଆଡପ୍ଟିଭ୍ ପ୍ୟାରେଣ୍ଟ ନଥିବା ପିଲା, ଉଭୟ ବାପା-ମାଆଙ୍କୁ ହରାଇଥିବା ଛାତ୍ର କିମ୍ବା ଏକମାତ୍ର ରୋଜଗାରକ୍ଷମ ଅଭିଭାବକଙ୍କୁ ହରାଇଥିବା ପିଲା ଏହି ସୁବିଧା ପାଇପାରିବେ । ସେହିଭଳି ଅନାଥ ଆଶ୍ରମରେ ରହୁଥିବା ପିଲାମାନେ ମଧ୍ୟ ଏହାର ସୁବିଧା ପାଇବେ । ତେବେ ବାର୍ଷିକ ଆୟ ୮ ଲକ୍ଷରୁ ଅଧିକ ହୋଇନଥିବା ଆବଶ୍ୟକ ।

• କେଉଁ ପାଠ୍ୟକ୍ରମ ପାଇଁ ଗ୍ରୀନ୍ ପାସେଜ୍‌ ସ୍କିମ ?

ଗ୍ରୀନ୍ ପାସେଜ୍‌ର ଲାଭ କେବଳ ଗୋଟିଏ ଷ୍ଟ୍ରିମ୍‌ରେ ସୀମିତ ନୁହେଁ । ଦ୍ୱାଦଶ ପରେ ଅତି କମ୍‌ରେ ଗୋଟିଏ ବର୍ଷର ଉଚ୍ଚ ଶିକ୍ଷା ପାଠ୍ୟକ୍ରମ ଯେମିତିକି ସାଧାରଣ, ପ୍ରଫେସନାଲ୍ କିମ୍ବା ଟେକ୍ନିକାଲ୍ ଶିକ୍ଷା ପାଇଁ ସ୍କିମ୍‌ର ବ୍ୟବସ୍ଥା ରହିଛି । ଏହା ସହ ବୈଷିୟିକ ଶିକ୍ଷା ଅଧୀନରେ ITI, ପଲିଟେକ୍ନିକ୍ ଓ ଡିପ୍ଲୋମା ଭଳି କୋର୍ସ ପାଇଁ ମଧ୍ୟ ଗ୍ରୀନ ପାସେଜ୍ ବ୍ୟବସ୍ଥା ରହିଛି । ଏହି ସ୍କିମରେ ଆଡମିସନ୍ ଫି’, ଟ୍ୟୁସନ୍ ଫି’, ପରୀକ୍ଷା ଫି’, ଲାବ୍ରୋଟାରୀ ଫି ଓ ଲାଇବ୍ରେରୀ ଫି’ ସହ ଅନ୍ୟାନ୍ୟ ଅନୁଷ୍ଠାନିକ ଶୁଳ୍କରେ ମଧ୍ୟ ଛାଡ଼ ମିଳିପାରିବ।

• ମାଗଣା ହଷ୍ଟେଲ ଓ ଖାଇବା ପିଇବା ସୁବିଧା

ଯୋଗ୍ୟ ଛାତ୍ରଛାତ୍ରୀଙ୍କୁ ମାଗଣା ହଷ୍ଟେଲ୍ ଓ ଖାଦ୍ୟର ସୁବିଧା ମଧ୍ୟ ଦିଆଯାଏ । ହେଲେ ହଷ୍ଟେଲ୍ ଆଡମିଶନ୍ ଓ ଅନ୍ୟାନ୍ୟ ଇନଷ୍ଟିଚ୍ୟୁସନାଲ୍ ଚାର୍ଜ୍ ଏହି ସୁବିଧାରେ ସାମିଲ ନୁହେଁ । ତେବେ ଛାତ୍ରଛାତ୍ରୀମାନେ ସରକାରୀ ଉଚ୍ଚ ଶିକ୍ଷା ଅନୁଷ୍ଟାନରେ ନାମ ଲେଖାଇବା ପରେ ଆବଶ୍ୟକ ପ୍ରମାଣପତ୍ର ଦେଲେ ଫି’ ଛାଡ଼ ମିଳିବ । ସେହିଭଳି ସରକାରୀ ଅନୁଦାନ ପ୍ରାପ୍ତ ଶିକ୍ଷାନୁଷ୍ଠାନରେ ମଧ୍ୟ ଛାତ୍ରଛାତ୍ରୀଙ୍କୁ ଫି’ ଛାଡ଼ ମିଳିବ । ପରେ ସେହି ଖର୍ଚ୍ଚ ସରକାର ସେହି ଅନୁଷ୍ଠାନକୁ ଦେବେ।

ପଢନ୍ତୁ ଏହି ଖବର: ରାଜ୍ୟ କ୍ୟାବିନେଟ୍‌ରେ ୧୦ ବିଭାଗର ୧୩ ପ୍ରସ୍ତାବକୁ ମଞ୍ଜୁରୀ; କଲେଜରେ ଦିନକୁ ୧GB ମାଗଣା ଡାଟା

ଅର୍ଥ ଅଭାବରୁ, ଘରର ରୋଜଗାରିଆ ଲୋକ ଚାଲିଗଲେ ଅବା ପିଲାଟି ବାପା ମାଆଙ୍କୁ ହରାଇଲେ ଯେପରି ତା ପାଠ ପଢାରେ ଡୋରି ବାନ୍ଧି ନ ହୋଇଯାଏ ସେଥିପାଇଁ ସରକାରଙ୍କ ଏହି ସ୍କିମ । ସରକାରଙ୍କ ଏହି ଜନମଙ୍ଗଳକାରୀ ଯୋଜନାର ଫାଇଦା ଅନେକ ଅସହାୟ ଛାତ୍ରଛାତ୍ରୀ ନେଇପାରିବେ ।