ରାଜ୍ୟରେ KGରୁ PG ପର୍ଯ୍ୟନ୍ତ ମାଗଣା ଶିକ୍ଷା ଗ୍ରହଣ ନେଇ ସୃଷ୍ଟି ହୋଇଥିବା ଅନିଶ୍ଚିତତା ଓ ଦ୍ୱନ୍ଦ୍ୱରେ ଶେଷରେ ପୂର୍ଣ୍ଣଚ୍ଛେଦ ପଡ଼ିଛି । ମାଗଣା ନାମଲେଖା ଓ ଫି' ବାବଦକୁ ସ୍ପଷ୍ଟତା ଆଣିବା ପାଇଁ ଉଚ୍ଚଶିକ୍ଷା ବିଭାଗ ପକ୍ଷରୁ ଏକ ସ୍ୱତନ୍ତ୍ର ଏସଓପି ପ୍ରକାଶ କରାଯାଇଛି ।

ଆଜି ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଏହି ବିଷୟରେ ସୂଚନା ଦେଇଛନ୍ତି । କେଉଁମାନେ ଏହି ଯୋଜନାର ଲାଭ ପାଇବେ, ସେନେଇ ସ୍ପଷ୍ଟ ସୂଚନା ଦେଇଛନ୍ତି ଉଚ୍ଚଶିକ୍ଷା ମନ୍ତ୍ରୀ । ଘରୋଇ ଏବଂ ବୃତ୍ତିଗତ ଶିକ୍ଷାନୁଷ୍ଠାନରେ ଲାଗୁ ହେବନି ଫି' ଛାଡ଼ ନିୟମ । କ୍ଲାସ୍‌ରେ ୭୫% ଉପସ୍ଥାନ ବାଧ୍ୟତାମୂଳକ ହେବ ଏବଂ ନିୟମିତ ଆସୁଥିବା ଛାତ୍ରଛାତ୍ରୀଙ୍କୁ କୌଣସି ଅସୁବିଧା ହେବନି । କନିକାଲ ଷ୍ଟଡି ପାଠ୍ୟକ୍ରମ ପାଇଁ ଫି' ଦେବାକୁ ପଡ଼ିବ । ଟଙ୍କା ଅଭାବରୁ କେହି ପାଠ ପଢାରୁ ବାଦ୍‌ ପଡ଼ିବେନି । ଏହା ସହ ଶିକ୍ଷାନୁଷ୍ଠାନ ଗୁଡ଼ିକ ନିଜ ଇଚ୍ଛାରେ ଫି' ବଢ଼ାଇ ପାରିବେନି । ଫି' ବାବଦରେ ସରକାର ହିଁ ଚୁଡାନ୍ତ ନିଷ୍ପତ୍ତି ନେବେ । ଏଥିପାଇଁ ରାଜ୍ୟସ୍ତରରେ ଫି' ନିୟନ୍ତ୍ରଣ କମିଟି କରାଯାଉଛି । ପରୀକ୍ଷା ଫି' କୁ ଏଥିରେ ବାଦ୍‌ କରାଯାଇଛି ବୋଲି ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୁରଜ କହିଛନ୍ତି ।

ଅଧିକ ପଢ଼ନ୍ତୁ: ରାଜ୍ୟ କ୍ୟାବିନେଟର ବଡ଼ ନିଷ୍ପତ୍ତି, କେଜିରୁ ପିଜି ସମସ୍ତଙ୍କୁ ମାଗଣା ଶିକ୍ଷା...୫ ବର୍ଷରେ ଖର୍ଚ୍ଚ ହେବ ୫୪୬୭ କୋଟି

ସୂଚନା ଅନୁସାରେ, 'ଜ୍ଞାନୋଦୟ – ଶିକ୍ଷାରୁ ସମୃଦ୍ଧି" ଯୋଜନା ଅଧୀନରେ ରାଜ୍ୟର ଯୋଗ୍ୟ ସରକାରୀ ଏବଂ ବେସରକାରୀ ଅନୁଦାନପ୍ରାପ୍ତ ଶିକ୍ଷାନୁଷ୍ଠାନଗୁଡ଼ିକରେ ପଢ଼ୁଥିବା ଛାତ୍ରଛାତ୍ରୀମାନଙ୍କ ପାଇଁ କେ.ଜି. ରୁ ପି.ଜି. ପର୍ଯ୍ୟନ୍ତ ଶିକ୍ଷାକୁ ଅଧ‌ିକ ସୁଲଭ ଓ ସରଳ କରିବା ଉଦ୍ଦେଶ୍ୟରେ ଏହି ପଦକ୍ଷେପ ଗ୍ରହଣ କରାଯାଇଛି ।

ଏହି ଯୋଜନା ଅନୁଯାୟୀ ୨୦୨୬–୨୭ ଶିକ୍ଷାବର୍ଷରୁ ସରକାରୀ ଓ ଅନୁଦାନପ୍ରାପ୍ତ ବିଦ୍ୟାଳୟର ନବମରୁ ଦ୍ବାଦଶ ଶ୍ରେଣୀ ଏବଂ ରାଜ୍ୟ ସରକାରୀ ବିଶ୍ବବିଦ୍ୟାଳୟ, ସରକାରୀ ଓ ଅନୁଦାନପ୍ରାପ୍ତ ମହାବିଦ୍ୟାଳୟର ନିୟମିତ ସ୍ନାତକ (UG) ଓ ସ୍ନାତକୋତ୍ତର (PG) ପାଠ୍ୟକ୍ରମରେ ପଢ଼ୁଥିବା ଛାତ୍ରଛାତ୍ରୀଙ୍କର ନାମଲେଖା ଶୁଳ୍କ ସମ୍ପୂର୍ଣ ଛାଡ଼ କରାଯିବ । କେ.ଜି. ରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଶିକ୍ଷା ପୂର୍ବରୁ ନିଶୁଳ୍କ ଥିବାବେଳେ, ଏହି ନିଷ୍ପତ୍ତି ମାଧ୍ୟମରେ ରାଜ୍ୟରେ କେ.ଜି. ରୁ ପି.ଜି. ପର୍ଯ୍ୟନ୍ତ ନିଶୁଳ୍କ ଶିକ୍ଷାର ଏକ ସଶକ୍ତ ବ୍ୟବସ୍ଥା ସ୍ଥାପନ ହେବ ।