SIM Box Racket / ଜଗତସିଂହପୁରରୁ ବିହାର; ସିମ୍ ବକ୍ସ ଠକେଇର ଓଡ଼ିଶା ଲିଙ୍କ୍, CBIର ବଡ଼ ପର୍ଦ୍ଦାଫାସ

ଓଡ଼ିଶାରୁ ସିମ୍ କାର୍ଡ ସଂଗ୍ରହ, ବିହାରରେ ସିମ୍ ବକ୍ସ ଅପରେସନ୍, ସାରା ଦେଶରେ ତାଣ୍ଡବ ରଚୁଛନ୍ତି ସାଇବର୍ ଲୁଟେରା । ରାଜ୍ୟ ବାହାରେ ଚାଲିଥିବା ଏକ ଅତି ସାଂଘାତିକ ଏବଂ ବଡ଼ ସାଇବର୍ କ୍ରାଇମ୍ ନେଟୱାର୍କର ପର୍ଦ୍ଦାଫାସ କରିଛି CBI । ଆଉ ଏହି ବିଶାଳ ସାଇବର୍ ରାକେଟର ଖିଅ ଖୋଜୁ ଖୋଜୁ CBI ପହଞ୍ଚିଛି ଓଡ଼ିଶାର ଜଗତସିଂହପୁର ଜିଲ୍ଲାରେ । ଜଗତସିଂହପୁରର ୧୦ଟି ସ୍ଥାନରେ ଘନଘନ ଚଢ଼ାଉ କରିବା ସହ ଜଣେ ମୋବାଇଲ୍ ନେଟୱର୍କ ଏରିଆ ଡିଷ୍ଟ୍ରିବ୍ୟୁଟରଙ୍କୁ ଗିରଫ କରିଛି ସିବିଆଇ । 'ଡିଜିଟାଲ୍ ଆରେଷ୍ଟ'ଠାରୁ ଆରମ୍ଭ କରି ଦେଶସାରା ୭୩ରୁ ଅଧିକ ସାଇବର୍ ଠକେଇ ପଛରେ ରହିଛି ଏହି ସିମ୍ ବକ୍ସ ନେଟୱାର୍କ ।

ଗତବର୍ଷ ବିହାରର ବୈଶାଲୀ ଏବଂ ସୁପୌଲ ଜିଲ୍ଲାରେ ଏକ ବେଆଇନ ସିମ୍ ବକ୍ସ ରାକେଟର ପର୍ଦ୍ଦାଫାସ ହୋଇଥିଲା । ତଦନ୍ତକାରୀ ସଂସ୍ଥା ଯେତେବେଳେ ଏହାର ଗଭୀରକୁ ଗଲା, ସେତେବେଳେ ସାମ୍ନାକୁ ଆସିଥିଲା ଓଡ଼ିଶା ଲିଙ୍କ୍ । ସାଇବର ଠକେଇ ପାଇଁ ବ୍ୟବହାର ହେଉଥିବା ବେଆଇନ ସିମ୍ କାର୍ଡଗୁଡ଼ିକୁ ଜଗତସିଂହପୁରର ଜଣେ ଏରିଆ ଡିଷ୍ଟ୍ରିବ୍ୟୁଟର ସୀମା ପାର୍ ବିହାରୀ ସାଇବର ଲୁଟେରାଙ୍କୁ ଯୋଗାଉଥିଲା । ଏହି ସାଂଘାତିକ ପ୍ରମାଣ ମିଳିବା ପରେ ସିବିଆଇ ତୁରନ୍ତ ଏହି ଡିଷ୍ଟ୍ରିବ୍ୟୁଟରଙ୍କୁ ଗିରଫ କରିବା ସହ ଜଗତସିଂହପୁରର ପାଖାପାଖି ୧୦ଟି ସ୍ଥାନରେ ଏକାସାଙ୍ଗରେ ରେଡ୍ ମାରିଛି । ବିହାରର ବୈଶାଳୀରେ ବସି ସାଇବର ଲୁଟେରାମାନେ ବେଆଇନ ସିମ୍ ବକ୍ସ ଜରିଆରେ ସାରା ଦେଶରେ ରଚୁଥିଲେ ଲୁଟ୍‌ର ମାଷ୍ଟରପ୍ଲାନ୍ ।

• ବିପୁଳ ପରିମାଣର ମୋବାଇଲ ଜବତ

ଜଗତସିଂହପୁରର ୧୦ଟି ସ୍ଥାନରେ ଚଢ଼ାଉ ବେଳେ ସିବିଆଇ ହାତରେ ଲାଗିଛି ବିପୁଳ ପରିମାଣର ମୋବାଇଲ୍ ଫୋନ୍, ଲାପଟପ୍, ଡିଜିଟାଲ୍ ଉପକରଣ ଏବଂ ସିମ୍ କାର୍ଡ । ତଦନ୍ତରୁ ଜଣାପଡ଼ିଛି, ପ୍ରାୟ ୧୩୦୦ରୁ ଅଧିକ ସିମ୍ କାର୍ଡ ସନ୍ଦେହଘେରରେ ରହିଥିବା ବେଳେ, କେବଳ ଓଡ଼ିଶାର ଏହି ଡିଷ୍ଟ୍ରିବ୍ୟୁଟର ଜରିଆରେ ୭୦୦ରୁ ଊର୍ଦ୍ଧ୍ୱ ସିମ୍ ଜାରି କରାଯାଇ ବିହାରର ବୈଶାଳୀକୁ ପଠାଯାଇଥିଲା । ସବୁଠାରୁ ଆଶ୍ଚର୍ଯ୍ୟଜନକ କଥା, ସାଧାରଣ ଲୋକଙ୍କ E-KYC କଲାବେଳେ ସେମାନଙ୍କ ଅଜାଣତରେ ବାୟୋମେଟ୍ରିକ୍ ତଥ୍ୟକୁ ଜାଲିଆତି କରି ଏହି ସିମ୍‌ଗୁଡ଼ିକୁ ସକ୍ରିୟ କରାଯାଉଥିଲା ।

ପଢନ୍ତୁ ଏହି ଖବର: ଗୁରୁ ନାଁରେ କଳଙ୍କ; ଟ୍ୟୁସନ ବାହାନାରେ ହୋଟେଲରେ ରଖି ଛାତ୍ରଙ୍କୁ ଯୌନ ନିର୍ଯାତନା

• ଗ୍ରାହକଙ୍କ ଅଜାଣତରେ ଠକେଇ

ଗ୍ରାହକ ଜାଣିନାହାନ୍ତି ଯେ ତାଙ୍କ ନାଁରେ ସିମ୍ ଉଠି ସାଇବର ଅପରାଧରେ ବ୍ୟବହାର ହେଉଛି । ଏହି ବେଆଇନ ସିମ୍ ବକ୍ସ ନେଟୱର୍କ ଜରିଆରେ ଦେଶସାରା ଅତିକମରେ ୭୩ଟି ବଡ଼ ବଡ଼ ସାଇବର ଅପରାଧ ଘଟାଯାଇଛି, ଯେଉଁଥିରେ ସାଂଘାତିକ 'ଡିଜିଟାଲ୍ ଆରେଷ୍ଟ' ମାମଲା ମଧ୍ୟ ସାମିଲ ରହିଛି । ଓଡ଼ିଶାରୁ ସିମ୍ ସଂଗ୍ରହ, ବିହାରରେ ସିମ୍ ବକ୍ସ ପ୍ରସାର, ଆଉ ଦେଶବ୍ୟାପୀ ସାଇବର ଲୁଟ୍ । ଏହି ଆନ୍ତଃରାଜ୍ୟ ନେଟୱର୍କ ପଛରେ ଆଉ କେଉଁ କେଉଁ ବଡ଼ ମୁଣ୍ଡ ରହିଛନ୍ତି, ତାହାରି ଖୋଳତାଡ଼ ଜାରି ରଖିଛି ସିବିଆଇ ।