Maha Ashtami Puja Today / ଶକ୍ତିମୟ ସାରା ଓଡ଼ିଶା; ଆଜି ଶକ୍ତିପୀଠରେ ମହାନବମୀ, ମଣ୍ଡପରେ ମହାଅଷ୍ଟମୀ ପାଇଁ ସ୍ଵତନ୍ତ୍ର ପୂଜା

ଭୁବନେଶ୍ଵର: ଜଗତ ଜନନୀ ମା’ ଦୁର୍ଗାଙ୍କ ପୂଜା ପାଇଁ ଚଳଚଞ୍ଚଳ ସାରା ରାଜ୍ୟ । ଆଜି ଶକ୍ତିପୀଠରେ ମହାନବମୀ ଓ ମଣ୍ଡପରେ ମହାମାୟାଙ୍କ ମହାଅଷ୍ଟମୀ । ବେଦମନ୍ତ୍ର ଓ ଝାଞ୍ଜ-ମୃଦଙ୍ଗ ନାଦରେ ପ୍ରକମ୍ପିତ ହେଉଛି ଚତୁର୍ଦ୍ଦିଗ । ମା’ଙ୍କ ଦର୍ଶନ ପାଇଁ ଜମିଲାଣି ଭକ୍ତଙ୍କ ଭିଡ଼ । ପୀଠରେ ସ୍ୱତନ୍ତ୍ର ନୀତିକାନ୍ତି ଓ ଗୁପ୍ତ ପରମ୍ପରା ଚାଲିଛି । ଗଗନ-ପବନରେ ବି ସ୍ପଷ୍ଟ ବାରି ହୋଇପଡୁଛି ଉତ୍ସବର ମାହୋଲ । ପୂଜା ମଣ୍ଡପଗୁଡ଼ିକରେ ଧୁମ୍‌ଧାମ୍‌ରେ ଚାଲିଛି ଦଶଭୂଜାଙ୍କ ଆରାଧନା ।

ଯାଜପୁରର ଅଧିଷ୍ଠାତ୍ରୀ ଦେବୀ ମା’ ବିରଜା, କାକଟପୁରରେ ମା’ ମଙ୍ଗଳା, ବାଙ୍କୀରେ ମା’ ଚର୍ଚ୍ଚିକା ଏବଂ ଜଗତସିଂହପୁର ଶାରଳା ମନ୍ଦିରରେ ମହାନବମୀ ଅବସରରେ ଚାଲିଛି ସ୍ବତନ୍ତ୍ର ନୀତିକାନ୍ତି । ମହାମାୟାଙ୍କ ଆଗମନରେ ଉତ୍ସବମୁଖର ଗାଁଠୁ ସହର । ରାଜ୍ୟର ପ୍ରମୁଖ ଶକ୍ତିପୀଠ ମାନଙ୍କରେ ଚାଲିଛି ମା’ଙ୍କ ବିଶେଷ ପୂଜାର୍ଚ୍ଚନା । ଷୋଡ଼ଶ ଉପଚାର ରୀତିନୀତି ଅନୁଯାୟୀ ନୀତିକାନ୍ତି ଅନୁଷ୍ଠିତ ହେଉଛି । ଘଣ୍ଟ ଘଣ୍ଟା, କାହାଳି, ହୁଳହୁଳିରେ କମ୍ପୁଛି ପୂରା ପରିବେଶ ।

• ଆକୃଷ୍ଟ କରୁଛି ରାଜଧାନୀର ବିଭିନ୍ନ ଥିମର ତୋରଣ

ରସୁଲଗଡ଼ ଦୁର୍ଗାପୂଜା ମଣ୍ଡପରେ ପ୍ରାୟ ୮୦ ଲକ୍ଷ ଟଙ୍କା ବଜେଟ୍‌ରେ ନିର୍ମାଣ ହୋଇଛି ରୋମର ଭାଟିକାନ୍ ସିଟି। ଯାହାର ଉଚ୍ଚତା ରହିଛି ୮୦ ଫୁଟ ଏବଂ ଚଉଡ଼ା ରହିଛି ୧୪୦ ଫୁଟ । ଦୂରରୁ ଦେଖିଲେ ଯେମିତି ଲାଗିବ ଭୁବନେଶ୍ୱର ନୁହେଁ, ଭାଟିକାନ୍ ସିଟିର କୌଣସି ସ୍ଥାପତ୍ୟ ସାମ୍ନାରେ ଠିଆ ହୋଇଛନ୍ତି ଦର୍ଶକ। ସେହିପରି ସହିଦ ନଗର ଦୁର୍ଗାପୂଜା ସମିତି ପ୍ରାୟ ୪୦ ଲକ୍ଷ ଟଙ୍କା ବଜେଟ୍‌ରେ ନିର୍ମାଣ ହୋଇଛି ତୋରଣ । ଯେଉଁଥିରେ ରହିଛି ଓଡ଼ିଆ ପରମ୍ପରାର ଛାପ । ମୁଖ୍ୟ ଆକର୍ଷଣ ରହିବ ମା'ଙ୍କ ମୁକୁଟ ଓ ଚାନ୍ଦି ମେଢ଼ ସହ ୮୦ ଫୁଟ୍ ଉଚ୍ଚ ଓ ୧୨୦ ଫୁଟ୍ ଚଉଡ଼ା ତୋରଣ ।

ପଢନ୍ତୁ ଏହି ଖବର: ଦଶହରା ବୁଲାକୁ ଫିକା କରୁଛି ରାଜଧାନୀର ଟ୍ରାଫିକ୍‌; ଯାତ୍ରୀଙ୍କଠୁ ବେପାରୀ ସମସ୍ତେ ହନ୍ତସନ୍ତ

ପଳାଶୁଣୀ ଦୁର୍ଗାପୂଜା ସମିତି ପକ୍ଷରୁ ରାଜସ୍ଥାନର ପ୍ରସିଦ୍ଧ ହୱା ମହଲ ଶୈଳୀରେ ନିର୍ମାଣ ହେଉଛି ଭବ୍ୟ ତୋରଣ । ପ୍ରାୟ ୪୦ ଲକ୍ଷ ଟଙ୍କା ବଜେଟ୍‌ରେ ନିର୍ମାଣ ହୋଇଛି ଏହି ତୋରଣ । ସେହିପରି ବମିଖାଲ ଦୁର୍ଗାପୂଜା ସମିତିରେ ପ୍ରାୟ ୭୦ ଲକ୍ଷ ଟଙ୍କା ବଜେଟ୍‌ରେ ନିର୍ମାଣ ହୋଇଛି ଦୁବାଇର ବୁର୍ଜ ଖଲିଫା ଢାଞ୍ଚାର ମଣ୍ଡପ । ମା’ଙ୍କ ଆଗମନରେ ଉତ୍ସବମୁଖର ରାଜଧାନୀ । ଭବ୍ୟ ମଣ୍ଡପ, ଆକର୍ଷଣୀୟ ତୋରଣ ଓ ଆଲୋକସଜ୍ଜା ସାଙ୍ଗକୁ ବଡ଼ ବଜେଟ୍‌ର ପୂଜା ଆୟୋଜନ ଏଥର ଦୁର୍ଗାପୂଜାକୁ ଆହୁରି ଆକର୍ଷଣୀୟ କରିଛି।