ଭୁବନେଶ୍ଵର: ସମଗ୍ର ରାଜ୍ୟକୁ ମୌସୁମୀ ଛୁଇଁଥିଲେ ମଧ୍ୟ ଓଡ଼ିଶାରେ ଏପର୍ଯ୍ୟନ୍ତ ଚାଷ ଉପଯୋଗୀ ବର୍ଷା ହୋଇନାହିଁ । ଏଲ୍-ନିନୋ ପ୍ରଭାବ ଏବଂ ମୌସୁମୀ ଟ୍ରଫ୍ ଦୁର୍ବଳ ଥିବାରୁ ବର୍ଷା ଅଭାବ ଦେଖାଦେଇଛି । ଅକ୍ଷୟ ତୃତୀୟା ଓ ରଜ ସରିଥିଲେ ବି ଜମି ଶୁଖିଲା ପଡ଼ିଛି ।

ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକଙ୍କ ଅନୁସାରେ, ବର୍ଷା ଲାଗି ରହିବା ଭଳି ସ୍ଥିତି ଏବେ ନାହିଁ । ତେଣୁ ଚାଷୀମାନେ ବୁଣାବୁଣି ପାଇଁ ତରବରିଆ ନିଷ୍ପତ୍ତି ନେବା ଉଚିତ୍ ହେବ ନାହିଁ ।

ଏଥିସହ ପଢ଼ନ୍ତୁ: ସାଙ୍ଗମାନଙ୍କ ସହ ଖେଳୁଥିଲେ କ୍ରିକେଟ୍; ବଜ୍ରପାତରେ ଚାଲିଗଲା ୨ ନାବାଳକଙ୍କ ଜୀବନ 

ରାଜ୍ୟରେ ମୌସୁମୀର ଲୁଚକାଳି । କମ୍ ବର୍ଷା ଯୋଗୁଁ ଚିନ୍ତାରେ ଚାଷୀ । ସମଗ୍ର ରାଜ୍ୟକୁ ମୌସୁମୀ ଛୁଇଁଥିଲେ ମଧ୍ୟ ଓଡ଼ିଶାରେ ଏପର୍ଯ୍ୟନ୍ତ ଚାଷ ଉପଯୋଗୀ ବର୍ଷା ହୋଇନାହିଁ । ଏଲ ନିନୋ ପ୍ରଭାବ ଏବଂ ମୌସୁମୀ ଟ୍ରଫ୍ ଦୁର୍ବଳ ଥିବାରୁ ବର୍ଷା ଅଭାବ ଦେଖାଦେଇଛି ।

ମୟୂରଭଞ୍ଜ ଜିଲ୍ଲାର ଅଧିକାଂଶ ଚାଷୀ ବର୍ଷା ଉପରେ ନିର୍ଭରଶୀଳ । କିନ୍ତୁ ଏଯାଏ ଜମି ଶୁଖିଲା ପଡ଼ିଛି । ମୟୂରଭଞ୍ଜରେ ଚଳିତ ବର୍ଷ ପ୍ରାୟ ୪ ଲକ୍ଷ ୨୨ ହଜାର ହେକ୍ଟର ଜମିରେ ଖରିଫ ଚାଷ ପାଇଁ ଲକ୍ଷ୍ୟ ରଖାଯାଇଛି । ତେବେ ଆଗାମୀ ସପ୍ତାହରେ ବର୍ଷା ନହେଲେ ମରୁଡ଼ି ଆଶଙ୍କା କରିଛନ୍ତି ଚାଷୀ ।

ଭଦ୍ରକ ଜିଲ୍ଲାରେ ମଧ୍ୟ ସମାନ ସ୍ଥିତି । ବର୍ଷା ନଥିବାରୁ ଜମିରେ ଗୋରୁ ଚରୁଛନ୍ତି । ଏଥର ୧ ଲକ୍ଷ ୩୭ ହଜାର ହେକ୍ଟରରେ ଚାଷ ପାଇଁ ଟାର୍ଗେଟ୍ ଥିବାବେଳେ କାମ ଆରମ୍ଭ ହୋଇ ପାରୁନି ।

କେନ୍ଦ୍ରାପଡ଼ା ଆଳି ଅଞ୍ଚଳରେ ଚାଷୀମାନେ ବିହନ ଗଜା କରିସାରିଥିଲେ ମଧ୍ୟ ବର୍ଷା ଅଭାବରୁ ତାହା ଶୁଖିବାକୁ ବସିଲାଣି । କେତେକ ସ୍ଥାନରେ ମୋଟର ସାହାଯ୍ୟରେ ପାଣି ମଡ଼ା ଯାଉଥିଲେ ବି ସବୁ ଜମି ପାଇଁ ଏହି ସୁବିଧା ନାହିଁ । ଫଳରେ ଗଜା ମରୁଡ଼ି ଆଶଙ୍କାରେ ଚାଷୀକୂଳ ହତାଶ ହୋଇ ପଡ଼ିଛନ୍ତି ।

ଏଥିସହ ପଢ଼ନ୍ତୁ: ବଙ୍ଗୋପସାଗରରେ ଆସିପାରେ ଲଘୁଚାପ, ରାଜ୍ୟରେ ପ୍ରବଳ ବର୍ଷା ନେଇ ପାଣିପାଗ ବିଭାଗର ଆଲର୍ଟ 

ଢେଙ୍କାନାଳ ଭୁବନ ଅଞ୍ଚଳରେ ଆଷାଢ଼ ମାସରେ ପାଣି ବଦଳରେ ଆକାଶରୁ ନିଆଁ ବର୍ଷୁଛି । କେନାଲ ସୁବିଧା ନଥିବାରୁ ଚାଷୀମାନେ ନାଳ ଓ ପୋଖରୀରୁ ପାଣି ବୋହି ତଳି ବଞ୍ଚାଇବାକୁ ଚେଷ୍ଟା କରୁଛନ୍ତି । ଜମି ଫାଟି ଆଁ କଲାଣି । ପାଣିପାଗ ବିଶେଷଜ୍ଞଙ୍କ କହିବା ଅନୁସାରେ ଏବେ ବର୍ଷା ଲାଗି ରହିବା ଭଳି ସ୍ଥିତି ନାହିଁ, ତେଣୁ ଚାଷୀମାନେ ବୁଣାବୁଣି ପାଇଁ ତରବରିଆ ନିଷ୍ପତ୍ତି ନେବା ଉଚିତ୍ ହେବ ନାହିଁ ।