ଭୁବନେଶ୍ଵର: ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ କ୍ଷେତ୍ର ଅଧିକ ଘନୀଭୂତ ହୋଇ ବର୍ତ୍ତମାନ କେନ୍ଦ୍ରୀୟ ବଙ୍ଗୋପସାଗରରେ 'ସ୍ପଷ୍ଟ ଚିହ୍ନିତ ଲଘୁଚାପ'ରେ ପରିଣତ ହୋଇଛି । ଆଗାମୀ ୨୪ ଘଣ୍ଟାରେ ଏହା ଅବପାତ ଏବଂ ପରବର୍ତ୍ତୀ ସମୟରେ ଗଭୀର ଅବପାତର ରୂପ ନେଇ ୨୩ ତାରିଖ ସକାଳ ସୁଦ୍ଧା ଉତ୍ତର-ଆନ୍ଧ୍ରପ୍ରଦେଶ ଓ ଦକ୍ଷିଣ-ଓଡ଼ିଶା ଉପକୂଳରେ ପହଞ୍ଚିବ । ତେବେ ଓଡ଼ିଶାବାସୀଙ୍କ ପାଇଁ ବଡ଼ ଆଶ୍ୱସ୍ତିର ଖବର ହେଉଛି ଏହା ବାତ୍ୟାର ରୂପ ନେବାର କୌଣସି ସମ୍ଭାବନା ନାହିଁ ବୋଲି ଭାରତୀୟ ପାଣିପାଗ ବିଭାଗ (IMD)ର ମହାନିର୍ଦ୍ଦେଶକ ଡକ୍ଟର ମୃତ୍ୟୁଞ୍ଜୟ ମହାପାତ୍ର ସ୍ପଷ୍ଟ କରିଛନ୍ତି । ତେବେ ଅଧିକାଂଶ ଜିଲ୍ଲାରେ ପ୍ରବଳ ଓ କେତେକ ଜିଲ୍ଲାରେ ଅତିପ୍ରବଳ ବର୍ଷାର ଆଶଙ୍କା ରହିଛି । ତେଣୁ ପାହାଡ଼ିଆ ଅଞ୍ଚଳରେ ଭୂ-ସ୍ଖଳନ ଏବଂ ତଳିଆ ଅଞ୍ଚଳ ଜଳମଗ୍ନ ହେବା ଆଶଙ୍କା ରହିଛି ।
ଓଡ଼ିଶାର ଅଧିକାଂଶ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସହ ପବନର ବେଗ ମଧ୍ୟ ବଢ଼ିବା ଆଶଙ୍କା ରହିଛି । ସମୁଦ୍ର ଓ ଉପକୂଳ ନିକଟରେ ଘଣ୍ଟାପ୍ରତି ପ୍ରାୟ ୫୫ରୁ ୬୫ କିଲୋମିଟର ବେଗର ପବନ ବହିପାରେ । ଅଧିକ ବର୍ଷା ଯୋଗୁଁ ନିମ୍ନାଞ୍ଚଳ ଓ ସହରାଞ୍ଚଳରେ ଜଳବନ୍ଦୀ ସମସ୍ୟା ସୃଷ୍ଟି ହୋଇପାରେ । ସେହିପରି ପାହାଡ଼ିଆ ଅଞ୍ଚଳରେ ଭୂ-ସ୍ଖଳନର ଆଶଙ୍କା ମଧ୍ୟ ରହିଛି । ବିଶେଷକରି କୋରାପୁଟ, ରାୟଗଡ଼ା, କଳାହାଣ୍ଡି, ମାଲକାନଗିରି ଭଳି ପାହାଡ଼ିଆ ଜିଲ୍ଲାରେ ସତର୍କତା ଜରୁରୀ ବୋଲି IMD ପକ୍ଷରୁ କୁହାଯାଇଛି । ତେଣୁ ମତ୍ସ୍ୟଜୀବୀମାନେ ୨୪ ତାରିଖ ପର୍ଯ୍ୟନ୍ତ ସମୁଦ୍ରକୁ ନଯିବା ସହ ପାଣିପାଗ ବିଭାଗର ସତର୍କ ସୂଚନାକୁ ମାନିବା ଜରୁରୀ । ଜୁଲାଇ, ଅଗଷ୍ଟରେ ଅସ୍ବାଭାବିକ ବର୍ଷା ବାରମ୍ବାର ବନ୍ୟା ପରିସ୍ଥିତି ସୃଷ୍ଟି କରିଥିଲା । ଏବେ ପୁଣି ବଡ଼ ବର୍ଷା ଆସୁଥିବାରୁ ଛନକା ପଶିଛି ।
- ଖୋଲିବ ୨୪ ଘଣ୍ଟିଆ କଣ୍ଟ୍ରୋଲ ରୁମ୍
୨୨ ତାରିଖଠାରୁ ବର୍ଷା ଆରମ୍ଭ ହୋଇ ୨୩ ଓ ୨୪ ତାରିଖରେ ପ୍ରବଳ ବର୍ଷିବ । ୧୧ଟି ଜିଲ୍ଲା ଉପରେ ପଡ଼ିବ ପ୍ରଭାବ । ସ୍ଥିତିର ମୁକାବିଲା ପାଇଁ ବଡ଼ ପ୍ରସ୍ତୁତି କରିଛନ୍ତି ରାଜ୍ୟ ସରକାର । ଉପକୂଳ ଓ ଦକ୍ଷିଣ ଓଡ଼ିଶା ଜିଲ୍ଲାର ଜିଲ୍ଲାପାଳଙ୍କୁ ଆଲର୍ଟ ରହିବାକୁ ନିର୍ଦ୍ଦେଶ ଦିଆଯାଇଛି । ସବୁ ଜିଲ୍ଲାରେ ଖୋଲିବ କଣ୍ଟ୍ରୋଲ ରୁମ୍ । ଏସଆରସି ଅଫିସରେ ଆଜିଠୁ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ପରିଚାଳନା ଆରମ୍ଭ ହୋଇଛି । ଡ୍ୟାମ୍ ଗୁଡିକରେ କ୍ଷମତା ସମୀକ୍ଷା କରି ଇନ୍ଦ୍ରାବତୀ ଓ ତେଲିଙ୍ଗିରି ଡ୍ୟାମରେ ପାଣି କମାଇବାକୁ ନିର୍ଦ୍ଦେଶ ଦିଆଯାଇଛି । ବାଲିମେଳା, କୋଲାବରେ ସେତେ ପାଣି ନାହିଁ । ପାଣି ଜମୁଥିବା ସ୍ଥାନ ଗୁଡିକରୁ ନିଷ୍କାସନ ବ୍ୟବସ୍ଥାର ପ୍ରସ୍ତୁତି ରଖିବାକୁ କୁହାଯାଇଛି । ବାତ୍ୟା, ବନ୍ୟା ଆଶ୍ରୟସ୍ଥଳୀ ପ୍ରସ୍ତୁତ ରଖିବା ସହ ଗର୍ଭବତୀ ମହିଳାଙ୍କୁ ସ୍ଥାନାନ୍ତରିତ ପାଇଁ ନିର୍ଦ୍ଦେଶ ଦିଆଯାଇଛି । ଆଜିଠାରୁ ମତ୍ସ୍ୟଜୀଵୀଙ୍କୁ ସମୁଦ୍ର ମନା । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବାତ୍ୟା ସମୀକ୍ଷା ବୈଠକରେ ଏସଆରସି, ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶିକା, ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ, ଅଗ୍ନିଶମ ଡିଜି, ଆଇନଶୃଙ୍ଖଳା ଏଡିଜି ଉପସ୍ଥିତ ଥିଲେ ।
ପଢନ୍ତୁ ଏହି ଖବର: ପ୍ରବଳ ବର୍ଷା ସହିତ ଘଡ଼ଘଡ଼ି ସମ୍ଭାବନା; ଏହି ଜିଲ୍ଲାରେ ସବୁ ସ୍କୁଲ କଲେଜ ବନ୍ଦ - ଗଞ୍ଜାମ ଜିଲ୍ଲା ପ୍ରଶାସନର ଆଗୁଆ ପ୍ରସ୍ତୁତି
ବର୍ଷା ଜନିତ ସ୍ଥିତିର ମୁକାବିଲା ପାଇଁ ଆଗୁଆ ପ୍ରସ୍ତୁତି ଓ ସତର୍କତାମୂଳକ ପଦକ୍ଷେପ ଗ୍ରହଣ କରିଛି ଗଞ୍ଜାମ ପ୍ରଶାସନ । ଜିଲ୍ଲାପାଳ ଭି. କୀର୍ତ୍ତି ଭାସନ ଗତକାଲି ପ୍ରସ୍ତୁତି ବୈଠକ କରିଥିବାବେଳେ ଆଜି ଅଧିକାରୀମାନଙ୍କୁ ନେଇ ଗୋପାଳପୁର ବାତ୍ୟା ଆଶ୍ରୟସ୍ଥଳୀରେ ପହଞ୍ଚିଥିଲେ । ସେଠାରେ ଆସ୍କା ଲାଇଟ, ସହ ଓଡ୍ରାଫ ଟିମ୍ ମୁତୟନ ଅଛନ୍ତି । ଏଥିସହ ଆଜିଠାରୁ ୨୫ ତାରିଖ ଯାଏଁ ଜିଲ୍ଲାସ୍ତରୀୟ ଅଧିକାରୀ ସଦର ମହକୁମା ଛାଡ଼ିପାରିବେ ନାହିଁ । ବର୍ଷା, ପବନ, ଜଳବନ୍ଦୀ ଓ ଭୂସ୍ଖଳନ ପରିସ୍ଥିତିର ମୁକାବିଲା ପାଇଁ ଉଦ୍ଧାରକାରୀ ଯନ୍ତ୍ରପାତି, ଔଷଧ, ଆବଶ୍ୟକ ସାମଗ୍ରୀ ଓ ମାନବ ସମ୍ବଳ ପ୍ରସ୍ତୁତ ରଖିବାକୁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ ।
- ଏହି ଘାଟିରେ ଭାରିଯାନ ଚଳାଚଳ ବନ୍ଦ
ସେପଟେ ଗଞ୍ଜାମ ସୀମାନ୍ତ କଳିଙ୍ଗା ଓ ଦାରିଙ୍ଗିବାଡ଼ି ଘାଟିରେ ୨୩, ୨୪ ତାରିଖରେ ଭାରି ଯାନ ଚଳାଚଳ ବନ୍ଦ ରହିବ । ଘାଟିରେ ମୁତୟନ ରହିବେ ଓଡ୍ରାଫ ଓ ଅଗ୍ନିଶମ ବିଭାଗର ଟିମ୍ । ଗଜପତି ଜିଲ୍ଲାପାଳଙ୍କ ଅଧ୍ୟକ୍ଷତାରେ ପ୍ରସ୍ତୁତି ବୈଠକରେ ବାତ୍ୟା ଆଶ୍ରୟସ୍ଥଳୀ ସହ ଜିଲ୍ଲାର ପାହାଡ଼ିଆ ଅଞ୍ଚଳ ପାତ୍ରପୁର ବ୍ଲକ୍ ଉପରେ ସ୍ୱତନ୍ତ୍ର ନଜର ରଖିବାକୁ କୁହାଯାଇଛି ।
ରାଜ୍ୟର କେତେକ ଜିଲ୍ଲାରେ ଏବେଠାରୁ ଦେଖାଗଲାଣି ପ୍ରଭାବ । ପୁରୀରେ ଜିଲ୍ଲାରେ ଆଜି ସୁଦ୍ଧା ୧୭୮ ମିଲିମିଟର ବର୍ଷା ରେକର୍ଡ କରାଯାଇଛି । ସେପଟେ ବାଲେଶ୍ବର ଜିଲ୍ଲାର ଉଦୟପୁର, ତାଳସାରୀ, ରଣସିଂହପୁର, କୀର୍ତ୍ତିନିଆରେ ବର୍ଷା ଓ ପବନ ଘଡ଼ଘଡି ପାଇଁ ସତର୍କତା ଜାରି କରାଯାଇଛି । ସମୁଦ୍ର ଅଶାନ୍ତ ରହିବ । ଏଣୁ ୨୩ ତାରିଖ ଯାଏଁ ସମୁଦ୍ର ନଯିବାକୁ ମାଇକ୍ ଯୋଗେ ପ୍ରଚାର କରିଛି ଚନ୍ଦନେଶ୍ୱର ମତ୍ସ୍ୟବିଭାଗ । ମାଛ ଧରା ଜାଲ ଓ ସମସ୍ତ ସାମଗ୍ରୀ ଡ଼ଙ୍ଗା ସୁରକ୍ଷିତ ସ୍ଥାନକୁ ନେବାକୁ କୁହାଯାଇଛି ।
