ଭୁବନେଶ୍ଵର: ଗାଦି ଛାଡ଼, ନହେଲେ ବନ୍ଦ ହେବ ଦରମା । ବଦଳି ଆଦେଶକୁ ମାନୁ ନଥିବା ଅଧିକାରୀଙ୍କ ପାଇଁ ଅର୍ଥ ବିଭାଗ ଦେଇଛି କଡ଼ା ଚେତାବନୀ । ଚାରି ମାସରେ ଚାରି ଥର ବଦଳି ନିର୍ଦ୍ଦେଶକୁ ମାନୁ ନଥିବା ବାବୁଙ୍କ ପାଇଁ ଦରମା ବନ୍ଦ ପରି କଡ଼ା ଆଭିମୁଖ୍ୟ ନେବାକୁ ଯାଉଛି ଅର୍ଥ ବିଭାଗ ।

ଗାଦି ମଡା ବାବୁଙ୍କ ଚଉକି ଲୋଭ । ବଦଳି ପରେ ବି ଯାଉନାହାଁନ୍ତି ନୂଆ ସ୍ଥାନକୁ । ଚାରି ମାସରେ ଚାରି ଚାରି ଥର ଚିଠି ପରେ ଶେଷରେ ଦରମା ବନ୍ଦ ପାଇଁ ନିଷ୍ପତ୍ତି । ଏପ୍ରିଲ ୧୬ରେ ଓଡ଼ିଶା ଅର୍ଥ ସେବା(ଓଏଫଏସ)ର ୯୦ଜଣ ଅଫିସରଙ୍କ ଏକକାଳୀନ ହୋଇଥିଲା ବଦଳି ।

ଏଥିସହ ପଢ଼ନ୍ତୁ: ସମାଜସେବୀ ନା ମହାଠକ ? ମଞ୍ଚରେ ମାରୁଥିଲା ଭାଷଣ, ପଛରେ ରଚୁଥିଲା ଠକେଇର ଜାଲ 

କିନ୍ତୁ କିଛି ଅଧିକାରୀ ଗାଦି ଛାଡିବାକୁ ହେଲେ ଅମଙ୍ଗ । ପରେ ମେ ୧୯ରେ ପ୍ରଥମ ରିମାଇଣ୍ଡର ପଠାଇ, ୨୫ ସୁଦ୍ଧା ନୂଆ ସ୍ଥାନରେ ଯୋଗ ଦେବାକୁ ଦିଆଗଲା ନିର୍ଦ୍ଦେଶ । କିନ୍ତୁ ତାହା ବି ପ୍ରଭାବ ପକାଇ ନଥିଲା । ପୁଣି ଜୁନ୍ ୧୮ ଚିଠିରେ ଅଫିସରମାନେ ବଦଳି ନିର୍ଦ୍ଦେଶ ମାନୁନଥିବାରୁ ତାହା ଓଡ଼ିଶା ସରକାରୀ କର୍ମଚାରୀ ଆଚରଣ ବିଧିର ଖୋଲା ଉଲ୍ଲଘଂନ ଓ ପ୍ରଶାସନିକ ଅନୁଶାସନ ହୀନତା ବୋଲି କହିଥିଲା ଅର୍ଥ ବିଭାଗ ।

ଆଉ ଜୁଲାଇ ୧୭ ତାରିଖରେ ବିଭାଗ ଦେଖାଇଛି କଡ଼ା ଆଭିମୁଖ୍ୟ । ବଦଳି ହୋଇଥିବା ବାବୁମାନେ ଯଦି ନିଜର ନୂଆ ସ୍ଥାନରେ ଜୁଲାଇ ୨୦ତାରିଖ ସୁଦ୍ଧା ଯୋଗ ନଦେବେ । ତା’ହେଲେ ଜୁଲାଇ ୨୧ରୁ ସେମାନଙ୍କର ଦରମା ବନ୍ଦ କରାଯିବ ବୋଲି ଚେତାବନୀ ଦିଆଯାଇଛି ।

ନିକଟରେ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ବି ଏମିତି ନିର୍ଦ୍ଦେଶ ନାମା ଜାରି ହୋଇଥିଲା । ବନ ବିଭାଗର ଅଧିକାରୀ ମାନେ ବଦଳି ନିର୍ଦ୍ଦେଶକୁ ମାନୁ ନଥିବା ନେଇ ଅସନ୍ତୋଷ ପ୍ରକାଶ କରି ସମସ୍ତ ଆରସିସିଏଫ ଏବଂ ଡିଏଫଓଙ୍କୁ ଚିଠି କରିଥିଲେ ପିସିସିଏଫ ।

ଏଥିସହ ପଢ଼ନ୍ତୁ: ପଞ୍ଚାୟତ ନିର୍ବାଚନ ପ୍ରସ୍ତୁତି; ଜିଲ୍ଲାପାଳମାନଙ୍କ ସହ କାଲି ରାଜ୍ୟ ନିର୍ବାଚନ ଆୟୋଗଙ୍କ ବୈଠକ 

ଏଠି ପ୍ରଶ୍ନ ଉଠିଛି କାହିଁକି ବିଭାଗର ବାରମ୍ବାର ନିର୍ଦ୍ଦେଶକୁ ମନୁ ନାହାନ୍ତି ଅଧିକାରୀ । ଏମିତି କି ଅଧିକାରୀ ମାନେ ବାହ୍ୟ ଚାପ ପକାଇ ବଦଳି ନିର୍ଦ୍ଦେଶକୁ ବାତିଲ୍ କରାଇବାକୁ ଚେଷ୍ଟା କରୁଥିବା ଚିଠିରେ ଉଲ୍ଲେଖ କରିଥିଲେ ପିସିସିଏଫ ।

ପ୍ରଶ୍ନ ଉଠିଛି ଏ ବାହ୍ୟ ଚାପ କାହାର ? ରାଜନୈତିକ ଅସ୍ତ୍ରକୁ ବଦଳି ବାତିଲ୍ ପାଇଁ ବ୍ୟବହାର କରୁଛନ୍ତି କି ବାବୁ ? ଏହାକୁ ନେଇ ତେଜିଛି ରାଜନୈତିକ ବୟାନ ବାଜିଛି । ଏବେ ଦେଖିବାର କଥା ହେଉଛି ଦରମା ବନ୍ଦ ନିଷ୍ପତ୍ତି ବାବୁଙ୍କ ମନରେ ଭୟ ପଶାଇ ପାରୁଛି ନା ନାହିଁ ।