Onion Price Hike / ହାଣ୍ଡିଶାଳରୁ ଲୁହ ଗଡ଼ାଉଛି ପିଆଜ, ସପ୍ତାହରେ କିଲୋ ପିଛା ଦର ୩୦ ଟଙ୍କା ବୃଦ୍ଧି

ପିଆଜ ମାରିଛି ଲମ୍ବ ଡିଆଁ । ଖାଉଟିଙ୍କ ଉପରେ ମହଙ୍ଗାମାଡ଼ । ହାଣ୍ଡିଶାଳକୁ ପହଞ୍ଚିବା ବେଳକୁ ପିଆଜ କିଲୋ ୬୦ ଟଙ୍କା ଛୁଇଁଲାଣି । ଘରୋଇ ଉତ୍ପାଦନ କମ୍ ଏବଂ ରାଜ୍ୟ ବାହାରୁ ଆମଦାନୀ ପ୍ରଭାବିତ ହୋଇଥିବାରୁ ପିଆଜ ମୂଲ୍ୟ ଏବେ ଆକାଶଛୁଆଁ ହୋଇଛି ।

ଗୋଟିଏ ସପ୍ତାହରେ ପିଆଜ କିଲୋ ପିଛା ଦର ୩୦ ଟଙ୍କା ବୃଦ୍ଧି ପାଇଛି । ଗତ ସପ୍ତାହରେ ପିଆଜ କିଲୋ ପିଛା ୨୫ ରୁ ୩୦ ଟଙ୍କାରେ ବିକ୍ରି ହେଉଥିବା ବେଳେ ବର୍ତ୍ତମାନ ତାହା ବଢ଼ି ୫୦ ରୁ ୬୦ ଟଙ୍କାରେ ବିକ୍ରି ହେଉଛି ପିଆଜ । ସେହିଭଳି ଖୁଚୁରା ବଜାରରେ ବେପାରୀ ମନଇଛା ଦର କଷି ଚାଲିଛନ୍ତି । ଏହାର ସିଧାସଳଖ ପ୍ରଭାବ ଖାଉଟ ଉପରେ ପଡ଼ିଛି ।

ଅଧିକ ପଢ଼ନ୍ତୁ: ଭାଇ ହାତରେ ରାକ୍ଷୀ କେଉଁ ଦିନ ବାନ୍ଧିବେ ? ଅଗଷ୍ଟ ୨୭ ନା ୨୮...ଦୂର କରନ୍ତୁ ଦ୍ଵନ୍ଦ୍ଵ

ପିଆଜ ଉପରେ ସାଧାରଣତଃ ଓଡ଼ିଶା ଉତ୍ତରପ୍ରଦେଶ, ନାସିକ ଉପରେ ନିର୍ଭର କରେ । ନାସିକରେ ପିଆଜ ବନ୍ୟା ପାଇଁ କ୍ଷତିଗ୍ରସ୍ତ ହୋଇଛି । ଏହାର ପ୍ରଭାବରେ ପିଆଜ ଦର ବୃଦ୍ଧି ପାଇଛି । ବର୍ତ୍ତମାନ ଭୁବନେଶ୍ୱରରେ ପିଆଜର ପାଇକାରୀ ଦର ୩୮ ରୁ ୪୦ ଟଙ୍କା ରହିଛି । କିନ୍ତୁ ଖୁଚୁରା ବେପାରୀ ବାହାରେ ୫୦ ରୁ ୬୦ ଟଙ୍କାରେ ବିକ୍ରି କରୁଛନ୍ତି । ଏପଟେ ଏବେ ପିଆଜ ଦର କମିବ ନାହିଁ ବୋଲି କହିଛନ୍ତି ବ୍ୟବସାୟୀ ସଂଘ ସଭାପତି ।

ରାଜ୍ୟରେ ପନିପରିବାଠାରୁ ଆରମ୍ଭ କରି ରାସନ ସାମଗ୍ରୀ ପର୍ଯ୍ୟନ୍ତ ବିଭିନ୍ନ ଜିନିଷର ଦର ଗତ କିଛି ଦିନ ମଧ୍ୟରେ ଅହେତୁକ ବୃଦ୍ଧି ପାଇଛି । ଏହି ଦର ବୃଦ୍ଧି ଗ୍ରାହକଙ୍କ ପକେଟକୁ ଅଧିକ ବାଧୁଛି ।

ସେପଟେ ପିଆଜର ମୂଲ୍ୟବୃଦ୍ଧିକୁ ଦୃଷ୍ଟିରେ ରଖି ଆକ୍ସନ ମୋଡ୍‌ରେ ଯୋଗାଣ ବିଭାଗ । ଭୁବନେଶ୍ୱର ଆଇଗଣିଆ ଡିପୋରେ ମହଜୁଦ ଥିବା ପିଆଜର ପରିମାଣ ଯାଞ୍ଚ କଲେ ବିଭାଗୀୟ ଟିମ୍ । ଅତିରିକ୍ତ ଯୋଗାଣ ଅଧିକାରୀ ହିମାଂଶୁ ଦତ୍ତଙ୍କ ନେତୃତ୍ୱରେ ଯାଞ୍ଚ କରାଯାଇଛି । ଡିପୋରେ କେତେ ପରିମାଣର ପିଆଜ ମହଜୁଦ ରହିଛି, ତାହାର ଷ୍ଟକ୍ ଯାଞ୍ଚ କରାଯାଇଛି। ପିଆଜ ଦର ବୃଦ୍ଧି ପଛରେ କୃତ୍ରିମ ଅଭାବ କି ସେ ଦିଗରେ ମଧ୍ୟ ବିଭାଗ ନଜର ରଖିଛି ।