ଭୁବନେଶ୍ଵର: କାଗଜପତ୍ରରେ ଚାଷୀ ଆମର ‘ଅନ୍ନଦାତା’ । ହେଲେ ବାସ୍ତବରେ ସେ ଆଜି ଅତି ଅସହାୟ । ସରକାରୀ ଖାତାରେ ରବି ଧାନ କିଣା ସରିଛି, ମଣ୍ଡି ମଧ୍ୟ ବନ୍ଦ ହୋଇଯାଇଛି । କିନ୍ତୁ ଗ୍ରାଉଣ୍ଡ ଜିରୋରେ ଚିତ୍ର ସମ୍ପୂର୍ଣ୍ଣ ଓଲଟା । ଖୋଲା ଆକାଶ ତଳେ, ବର୍ଷା ପାଣିରେ ଭିଜି ଏବେ ଗଜା ହେଉଛି ଚାଷୀର ବର୍ଷକର ସୁନା ଫସଲ ।

କେଉଁଠି ପ୍ୟାକ୍ସ, ମିଲର୍ସ ଓ ଏଜେଣ୍ଟଙ୍କ ଚକ୍ରବ୍ୟୁହରେ ଚାଷୀର ଟୋକନ ଲ୍ୟାପ୍ସ ହୋଇଛି, ତ ଆଉ କେଉଁଠି କଟନୀ-ଛଟନୀ ନାଁରେ ମାଲାମାଲ୍ ହେଉଛନ୍ତି ମିଲର୍ସ । ଗଜା ଧାନକୁ ଧରି କାନ୍ଦୁଛନ୍ତି ଚାଷୀ କୂଳ ।

ଧାନ କିଣା ସରିଛି, ମଣ୍ଡି ମଧ୍ୟ ବନ୍ଦ ହୋଇଯାଇଛି । କିନ୍ତୁ ଗ୍ରାଉଣ୍ଡର ଚିତ୍ର ସମ୍ପୂର୍ଣ୍ଣ ଭିନ୍ନ । ଖୋଲା ଆକାଶ ତଳେ, ବର୍ଷା ପାଣିରେ ଭିଜି ଏବେ ଗଜା ହେଉଛି ଚାଷୀର ବର୍ଷକର ସୁନା ଫସଲ। କଳାହାଣ୍ଡି, ଜୁନାଗଡ଼, ବଲାଙ୍ଗୀରରୁ ବରଗଡ଼, ଟିଟିଲାଗଡ଼ ଓ ପଦ୍ମପୁର ସବୁଠି ଚାଷୀଙ୍କ ଆଖିରେ ଲୁହ ।

ଏଥିସହ ପଢ଼ନ୍ତୁ: ସ୍ଵାଭାବିକ ହେବ ରୋଗୀ ସେବା, ଆଜିଠୁ କାର୍ଯ୍ୟରେ ଯୋଗଦେବେ ଡାକ୍ତର 

କଳାହାଣ୍ଡିରେ ଆକାଶରୁ ବର୍ଷୁଛି ବର୍ଷା ପାଣି, ଆଉ ତଳେ କାଦୁଅ ସରସର ହୋଇ ପଡ଼ିରହିଛି କ୍ଵିଣ୍ଟାଲ କ୍ଵିଣ୍ଟାଲ ଧାନ । ସରକାରୀ P-PAS ଡ୍ୟାସବୋର୍ଡ କହୁଛି, କଳାହାଣ୍ଡି ଜିଲ୍ଲାରେ ପ୍ରାୟ ୨ ଲକ୍ଷ ୯୭ ହଜାର କ୍ଵିଣ୍ଟାଲ ଧାନ କ୍ରୟ ସରିଥିଲେ ମଧ୍ୟ ମଣ୍ଡିରୁ ଉଠାଣ ହୋଇନାହିଁ ।

ଜିଲ୍ଲା ଯୋଗାଣ ଅଧିକାରୀ କ୍ରୟ ପ୍ରକ୍ରିୟା ଶେଷ ହୋଇଥିବା ଦାବି କରୁଥିବା ବେଳେ, ଗ୍ରାଉଣ୍ଡରେ କିନ୍ତୁ ହଜାର ହଜାର ଚାଷୀଙ୍କ ଧାନ ବର୍ଷାରେ ଓଦା ହୋଇ ଗଜା ହେବାକୁ ବସିଲାଣି । ଜୁନାଗଡ଼ ବ୍ଲକ ଦାସିଗାଁ ମଣ୍ଡିରେ ୧୫ଟି ମିଲର୍ସ ଟ୍ୟାଗ ହୋଇଥିବା ବେଳେ ୪୨ ହଜାର ୨୦୦ କ୍ଵିଣ୍ଟାଲ ଧାନ କିଣିବା ପାଇଁ ଟାର୍ଗେଟ ଆସିଥିଲା ।

ବର୍ତ୍ତମାନ ୮୧୯ ଜଣ ଚାଷୀଙ୍କ ୪୨ ହଜାର ୧୯୩ କ୍ଵିଣ୍ଟାଲ ୬୧ କେଜି ଧାନ ଉଠାଣ ହୋଇଛି ଓ ପ୍ରାୟ ସମସ୍ତ ମିଲର୍ସଙ୍କ ଟାର୍ଗେଟ୍ ସରିଯାଇଥିବା ନେଇ ପ୍ୟାକ୍ସ ସୂତ୍ରରୁ କୁହାଯାଇଛି । ସବୁଠାରୁ ଦୁଖଃର ବିଷୟ ୨୦ରୁ ଉର୍ଦ୍ଧ୍ବ ଚାଷୀଙ୍କ ଟୋକନ ଲ୍ୟାପ୍ସ ହୋଇଯାଇଛି । ତେଣୁ ଏହି ଚାଷୀ ଏବେ କରିବେ କ'ଣ ସେହି ଚିନ୍ତାରେ ।

ସେପଟେ ବଲାଙ୍ଗିର ଜିଲ୍ଲାର ପୁଇଁତଲା ବ୍ଲକରୁ ଆସିଛି ଆହୁରି ସାଙ୍ଘାତିକ ଅଭିଯୋଗ । ମଲାମୁଣ୍ଡା ମଣ୍ଡିରେ ଧାନ ଉଠାଇବା ପାଇଁ ଟ୍ରାକ୍ଟରର ଲମ୍ବା ଲାଇନ୍ ଲାଗିଛି । ଅଭିଯୋଗ ହେଉଛି ଯେ, ରାଇସ ମିଲରମାନେ ସ୍ଥାନୀୟ ଚାଷୀଙ୍କ ଧାନ ଉଠାଇବାକୁ ଜାଣିଶୁଣି ମନ୍ଥର ଗତି କରୁଛନ୍ତି । କିନ୍ତୁ ପଛପଟେ ଅନ୍ୟ ଜିଲ୍ଲାରୁ ବେଆଇନ ଧାନ ଆଣି ନିଜ ଗୋଦାମ ଭର୍ତ୍ତି କରି ସାରିଲେଣି ।

ଯେଉଁଥିପାଇଁ ଚାଷୀ ବାଧ୍ୟ ହୋଇ ପ୍ରତି କ୍ଵିଣ୍ଟାଲ୍ ପିଛା ୩ରୁ ୫ କେଜି କଟନୀ-ଛଟନୀର ଶିକାର ହେଉଛି । ପ୍ରଶାସନର ଏଭଳି ଅପାରଗତା ବିରୋଧରେ ଟିଟିଲାଗଡ଼ରେ ଚାଷୀମାନେ ପ୍ରବଳ ବର୍ଷାରେ ଭିଜି ଉପଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିବା ସହ 'ଧାନ ନକିଣିଲେ ଆତ୍ମହତ୍ୟା କରିବୁ' ବୋଲି ଚେତାବନୀ ଦେଇଛନ୍ତି ।

ସେହିଭଳି ଓଡ଼ିଶାର ଭାତହାଣ୍ଡି କୁହାଯାଉଥିବା ବରଗଡ଼ ଓ ପଦ୍ମପୁର ଅଞ୍ଚଳରେ ଜୁନ୍ ୩୦ ଓ ପରେ ସରକାର ବଢ଼ାଇଥିବା ଧାନକିଣା ସମୟ ସୀମା ଜୁଲାଇ ୩ରେ ଶେଷ ହୋଇଛି । ହେଲେ ପଦ୍ମପୁର, ଅତାବିରା ଓ ବରଗଡ଼ RMC ଅଞ୍ଚଳରେ ଏବେ ବି ପ୍ରାୟ ୫ ହଜାର ଚାଷୀ ଧାନ ବିକ୍ରି କରିପାରିନାହାନ୍ତି ।

ଏଥିସହ ପଢ଼ନ୍ତୁ: ରଥଯାତ୍ରା ପୂର୍ବରୁ ସରକାରଙ୍କ ବଡ଼ ନିଷ୍ପତ୍ତି, ବଡ଼ଦାଣ୍ଡରେ ବଣ୍ଟାଯିବ ନାହିଁ ରନ୍ଧା ଖାଦ୍ୟ 

ପଦ୍ମପୁର ଆରଏମସି ଅଧୀନରେ ଥିବା ମଣ୍ଡିଗୁଡ଼ିକରେ ପ୍ରାୟ ଅଢ଼େଇ ଲକ୍ଷ ବସ୍ତା ଧାନ ଜମି ରହିଛି । ବରଗଡ଼ ଜିଲ୍ଲା କୃଷକ ସଂଗଠନର ଅଭିଯୋଗ ଅନୁଯାୟୀ, ଯୋଗାଣ ବିଭାଗ ଓ ମିଲର୍ସଙ୍କ ମଧୁଚନ୍ଦ୍ରିକା ଯୋଗୁଁ ପ୍ରାୟ ୫ ଲକ୍ଷ କ୍ୱିଣ୍ଟାଲ ଧାନ ବେଆଇନ ଭାବେ ମିଲର୍ସଙ୍କୁ ଟେକି ଦିଆଯାଇଛି, ଯେଉଁଥିପାଇଁ ପ୍ରକୃତ ଚାଷୀର ଟୋକନ ଥାଇ ମଧ୍ୟ ସେ ଧାନ ବିକିପାରିନାହିଁ ।

ଜୁନାଗଡ଼ ମଣ୍ଡିରେ ଓଦା ହେଉଛି ଚାଷୀର ଝାଳବୁହା ଧନ । ଆଗକୁ ଖରିଫ ଚାଷ ପାଇଁ ସାର ଓ ବିହନ କିଣିବାକୁ ଚାଷୀଙ୍କ ପାଖରେ ଟଙ୍କାଟିଏ ନାହିଁ । ଏବେ ପ୍ରଶ୍ନ ଉଠୁଛି- କାଗଜପତ୍ରରେ ଟାର୍ଗେଟ୍ ପୂରଣ କରି ଖୁସି ହେଉଥିବା ପ୍ରଶାସନ ମଣ୍ଡିରେ ପଡ଼ିଥିବା ଲକ୍ଷ ଲକ୍ଷ ବସ୍ତା ଧାନ କେବେ ଉଠାଇବ ? ଆଉ ନିରୀହ ଚାଷୀଙ୍କୁ କେବେ ମିଳିବ କ୍ଷତିପୂରଣ ?