EV Charging at Police Stations / ପୋଲିସ୍‌ ବାବୁଙ୍କ ପାଇଁ କଡ଼ା ନିର୍ଦ୍ଦେଶ, ଥାନାରେ EV ଚାର୍ଜିଂ ମନା...ନମାନିଲେ ହେବ ଆକ୍ସନ

ପୋଲିସ ବାବୁଙ୍କ ପାଇଁ କଡା ନିର୍ଦ୍ଦେଶ । ଥାନାରେ ଇଭି ଗାଡି ଚାର୍ଜିଂ ମନା । କ୍ୱାର୍ଟରକୁ ବେଆଇନ ସଂଯୋଗ ଉପରେ ବି କଟକଣା । ଉଲ୍ଲଂଘନକାରୀଙ୍କ ବିରୋଧରେ ହେବ କାର୍ଯ୍ୟାନୁଷ୍ଠାନ । ଓଡ଼ିଶଶ ପୋଲିସ ପକ୍ଷରୁ କଡ଼ା ନିର୍ଦ୍ଦେଶ ଜାରି କରାଯାଇଛି ।

ଓଡ଼ିଶା ପୋଲିସ ପକ୍ଷରୁ ଅଫିସ୍ ପରିସରରେ ବିଦ୍ୟୁତ ବ୍ୟବହାରକୁ ନେଇ କଡ଼ା ନିର୍ଦ୍ଦେଶ ଜାରି କରାଯାଇଛି । ରାଜ୍ୟର ସମସ୍ତ ପୋଲିସ ଜିଲ୍ଲା, ରେଞ୍ଜ, ପ୍ରତିଷ୍ଠାନ ଏବଂ ବାଟାଲିୟନ ମୁଖ୍ୟଙ୍କୁ ପଠାଯାଇଥିବା ଚିଠିରେ ଅଫିସ୍ ବିଦ୍ୟୁତର ଦୁରୁପଯୋଗ ଉପରେ ସମ୍ପୂର୍ଣ୍ଣ ରୋକ୍ ଲଗାଇବାକୁ କୁହାଯାଇଛି । ବିଶେଷକରି ଥାନା କିମ୍ବା ଅଫିସ୍ ପରିସରରେ ବ୍ୟକ୍ତିଗତ ଇଲେକ୍ଟ୍ରିକ୍ ଗାଡ଼ି ଚାର୍ଜ କରିବା ଏବଂ ଅଫିସ୍‌ରୁ କ୍ୱାର୍ଟର କିମ୍ବା ବାରାକକୁ ବେଆଇନ ବିଦ୍ୟୁତ ସଂଯୋଗ ଦେବାକୁ ସଂପୂର୍ଣ୍ଣ ବାରଣ କରାଯାଇଛି ।

ପୋଲିସ ମୁଖ୍ୟାଳୟ ପକ୍ଷରୁ କରାଯାଇଥିବା ଚିଠିରେ କୁହାଯାଇଛି ଯେ, କେତେକ ପୋଲିସ ପ୍ରତିଷ୍ଠାନରେ ମୁଖ୍ୟ ଅଫିସ୍ ବିଦ୍ୟୁତ ଲାଇନରୁ କ୍ୱାର୍ଟର ଓ ବାରାକକୁ ବେଆଇନ ଭାବେ ସଂଯୋଗ ଦିଆଯାଉଥିବା ନଜରକୁ ଆସିଛି । ସେହିପରି କିଛି କର୍ମଚାରୀ ସରକାରୀ ବିଦ୍ୟୁତ ବ୍ୟବହାର କରି ନିଜସ୍ୱ ଇଭି ଗାଡ଼ି ଚାର୍ଜ କରୁଥିବାରୁ ସରକାରଙ୍କ ଉପରେ ଅନାବଶ୍ୟକ ଆର୍ଥିକ ବୋଝ ପଡ଼ୁଛି ।

ଅଧିକ ପଢ଼ନ୍ତୁ: ତପ୍ତପାଣିରେ ପହଞ୍ଚିଲେ ରାଷ୍ଟ୍ରପତି; ଅପରାହ୍ଣରେ କରିବେ ମା' କନ୍ଧୁଣୀ ଦେବୀଙ୍କ ଦର୍ଶନ

ଏହାଛଡ଼ା ବାରାକରେ ରୋଷେଇ ପାଇଁ ଇଲେକ୍ଟ୍ରିକ୍ ହିଟର ବ୍ୟବହାର ଯୋଗୁଁ ଅଧିକ ବିଦ୍ୟୁତ ଖର୍ଚ୍ଚ ହେବା ସହ ଅଗ୍ନିକାଣ୍ଡ ଭଳି ସୁରକ୍ଷାଜନିତ ବିପଦ ମଧ୍ୟ ସୃଷ୍ଟି ହେଉଥିବା ଚିଠିରେ ଉଲ୍ଲେଖ କରାଯାଇଛି ।

ଏହି ପରିସ୍ଥିତିରେ ସମସ୍ତ ପୋଲିସ ପ୍ରତିଷ୍ଠାନ ମୁଖ୍ୟଙ୍କୁ ତୁରନ୍ତ ନିଜ ଅଧୀନସ୍ଥ କାର୍ଯ୍ୟାଳୟଗୁଡ଼ିକରେ ଯାଞ୍ଚ କରି ବେଆଇନ ବିଦ୍ୟୁତ ସଂଯୋଗ ବିଚ୍ଛିନ୍ନ କରିବା ଏବଂ ଅଫିସ୍ ବିଦ୍ୟୁତର ଅନୁମତି ବିନା ବ୍ୟବହାରକୁ ବନ୍ଦ କରାଇବାକୁ ନିର୍ଦ୍ଦେଶ ଦିଆଯାଇଛି । ନିର୍ଦ୍ଦେଶ ଉଲ୍ଲଂଘନ କରୁଥିବା କର୍ମଚାରୀଙ୍କ ବିରୋଧରେ ପ୍ରଚଳିତ ନିୟମ ଅନୁଯାୟୀ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଓଡ଼ିଶା ପୋଲିସ ସ୍ପଷ୍ଟ କରିଛି ।