ନେପାଳରୁ ୨ ଯୁବତୀଙ୍କୁ ଆଣି ଦେହ ବେପାରରେ ଲିପ୍ତ ବେଳେ ଉଦ୍ଧାର କଲେ ଓଡ଼ିଆ ଯୁବକ । ପୋଲିସ ସହାୟତାରେ ସର୍ଟ ଷ୍ଟେ' ହୋମରେ ଭର୍ତ୍ତି । ପୀଡିତାଙ୍କ ବୟାନ ରେକର୍ଡ କଲା ସିଡବ୍ଲୁସି । ନେପାଳ ଦୂତବାସ ସହ ଆଲୋଚନା କଲା କମିଶନରେଟ ପୋଲିସ । ଯୁବତୀ ଚାଲାଣ ନେଇ ବଢ଼ିଲା ଚିନ୍ତା ।

ଏ ଘଟଣା ଯେତିକି ସଙ୍ଗୀନ, ସେତିକି ସମ୍ବେଦନଶୀଳ । ଚାକିରିର ପ୍ରଲୋଭନ ପାଇ ସୁଦୂର ନେପାଳରୁ ଆସିଥିଲେ ୨ ଯୁବତୀ । ଚାକିରୀ ଦେବା ବଦଳରେ ସେମାନଙ୍କୁ ପଶ୍ଚିମବଙ୍ଗର ସୋନାଗାଛିର ଦେହ ଧନ୍ଦାରେ ଲଗାଇଲେ ଦଲାଲ । କୋଲକତାରେ ଥିବା ଜଣେ ଓଡ଼ିଆ ଯୁବକ ଏକଥା ଜାଣିବା ପରେ କଳେ ବଳେ କୌଶଳେ ସେମାନଙ୍କୁ ଉଦ୍ଧାର କରିଛନ୍ତି । ପୋଲିସ ସହାୟତାରେ ଓଡ଼ିଶା ଆଣିବା ପରେ ସର୍ଟ ଷ୍ଟେ' ହୋମରେ ଛାଡିଛନ୍ତି । ସିଡବ୍ଲୁସି ପକ୍ଷରୁ ପୀଡିତାଙ୍କ ବୟାନ ରେକର୍ଡ ହୋଇଛି । ଏ ସମ୍ପର୍କରେ ନେପାଳ ଦୂତାବାସକୁ ଜଣାଇ ଦିଆଯାଇଛି । ପୋଲିସ ସହାୟତାରେ ସେମାନଙ୍କୁ ନିଜ ଦେଶକୁ ପଠାଯିବାର ବ୍ୟବସ୍ଥା କରାଯାଉଛି ।

ଅଧିକ ପଢ଼ନ୍ତୁ: SCBରୁ କୁଆଡେ ଗଲେ ୧୬ ଜଣ ନବଜାତ ଶିଶୁ ?

ଗତ କିଛିମାସ ତଳେ ସମାନ ଢଙ୍ଗରେ ମଧୁପାଟଣା ଅଞ୍ଚଳରୁ ବାଂଲାଦେଶୀ ନାବାଳିକା ଉଦ୍ଧାର କରାଯାଇ ସେତବେଳେ ସିଡବ୍ଲୁସିକୁ ହସ୍ତାନ୍ତର କରାଯାଇଥିଲା । ରାତିକୁ ୫ ହଜାର ଦେଇ ଦେହ ବେପାର କରିବାକୁ ବାଧ୍ୟ କରୁଥିଲା ଦଲାଲ । ରାଜି ନହେଲେ ଗୃହବନ୍ଦୀ ରଖି ଦିଆଯାଉଥିଲା ଅକଥନୀୟ ନିର୍ଯ୍ୟାତନା । ଏଭଳି ଅଭିଯୋଗ ସାମ୍ନାକୁ ଆସିବା ପରେ ମାରାଥନ ରେଡ୍‌ କରିଥିଲା କମିଶନରେଟ ପୋଲିସ । ପୋକ୍ସ ଆକ୍ଟରେ ମାମଲା ରୁଜୁ କରିବା ପରେ ତଦନ୍ତ ଭାର ନେଇଥିଲା NIA ।

ଏବେ ପ୍ରଶ୍ନ, କିଏ ସେହି ମାଷ୍ଟର ମାଇଣ୍ଡ, ଯିଏ ଦେଶ ବାହାରୁ କରୁଛି ଯୁବତୀ ଚାଲାଣ ? କାହିଁକି ଯୁବତୀମାନଙ୍କୁ ଏ କୁସ୍ଚିତ ପ୍ରଥା ଭିତରକୁ ଟାଣି ନିଆଯାଉଛି ? ଏ ସବୁ ପ୍ରଶ୍ନ ଏବେ ତଦନ୍ତକାରୀ ସଂସ୍ଥା ପାଇଁ ମୁଣ୍ଡବିନ୍ଧାର କାରଣ ହୋଇଛି । ଉଦ୍ଧାର ହୋଇଥିବା ନେପାଳୀ ଯୁବତୀଙ୍କୁ କିଏ ଆଣିଥିଲା? ଯୁବତୀ ଦୁଇଜଣଙ୍କ ପରିବାର ଲୋକେ ଏ ସମ୍ପର୍କରେ ଜାଣିଥିଲେ କି ନାହିଁ ସେନେଇ ଅଧିକ ଖୋଳତାଡ଼ କରୁଛି ପୋଲିସ ।