Orangutan Health Update / କେମିତି ଅଛନ୍ତି ୫ ଓରାଙ୍ଗଉଟାନ ? ବଡ଼ ଅପଡେଟ୍ ଦେଲେ ନନ୍ଦନକାନନ ଉପନିର୍ଦ୍ଦେଶକ

ଭୁବନେଶ୍ଵର: ନନ୍ଦନକାନନ ପ୍ରାଣୀ ଉଦ୍ୟାନରେ ଥିବା ୫ଟି ଉଦ୍ଧାର ହୋଇଥିବା ଓରାଙ୍ଗଉଟାନଙ୍କ ସ୍ୱାସ୍ଥ୍ୟାବସ୍ଥା ଭଲ ରହିଛି । ସେମାନଙ୍କ ଓଜନ ଧୀରେ ଧୀରେ ବୃଦ୍ଧି ପାଉଥିବା ବେଳେ ଖାଦ୍ୟ ମଧ୍ୟ ଠିକ୍ ଭାବେ ଗ୍ରହଣ କରୁଛନ୍ତି । ଏଥିସହ ସେମାନଙ୍କ ଗତିବିଧିରେ ମଧ୍ୟ ଉଲ୍ଲେଖନୀୟ ବୃଦ୍ଧି ଦେଖାଦେଇଛି । ନନ୍ଦନକାନନର ଉପନିର୍ଦ୍ଦେଶକ ପ୍ରଦୀପ ମିରାସେ ଏହି ସୂଚନା ଦେଇଛନ୍ତି ।

ତାଙ୍କ ସୂଚନା ଅନୁଯାୟୀ, ୫ଟି ଯାକ ଓରାଙ୍ଗଉଟାନଙ୍କ ସ୍ୱାସ୍ଥ୍ୟ ଉପରେ ନିୟମିତ ନଜର ରଖାଯାଉଛି । ଓରାଙ୍ଗଉଟାନ ଛୁଆମାନେ ଏବେ ସାଧାରଣ ବ୍ୟବହାର ପ୍ରଦର୍ଶନ କରୁଛନ୍ତି । ଏପରିକି ସେମାନଙ୍କର ଆକ୍ଟିଭିଟି ମଧ୍ୟ ସାଧାରଣ ରହିଛି । ଅଭିଜ୍ଞ ପ୍ରାଣୀ ଚିକିତ୍ସା ଅଧିକାରୀଙ୍କ ତତ୍ତ୍ୱାବଧାନରେ ସେମାନଙ୍କ ଯତ୍ନ ନିଆଯାଉଥିବା ବେଳେ ବୈଷୟିକ କମିଟିର ସଦସ୍ୟମାନଙ୍କ ପରାମର୍ଶ ମଧ୍ୟ ନିଆଯାଉଛି ।

• ଚାଲିଛି STFର ତଦନ୍ତ

ଅନ୍ୟପଟେ, ଓରାଙ୍ଗଉଟାନଙ୍କ ଉଦ୍ଧାର ଘଟଣା ସହ ଜଡ଼ିତ ବନ୍ୟପ୍ରାଣୀ ଚାଲାଣ ଅଭିଯୋଗର ତଦନ୍ତ ସ୍ପେଶାଲ ଟାସ୍କ ଫୋର୍ସ (STF) କରୁଛି । ତେବେ ତଦନ୍ତର ଅଗ୍ରଗତି ସମ୍ପର୍କରେ ନନ୍ଦନକାନନ କର୍ତ୍ତୃପକ୍ଷଙ୍କ ପାଖରେ କୌଣସି ସୂଚନା ନାହିଁ ବୋଲି ଉପନିର୍ଦ୍ଦେଶକ କହିଛନ୍ତି । ଏହି ୫ଟି ଓରାଙ୍ଗଉଟାନଙ୍କୁ ଇଣ୍ଡୋନେସିଆ ଫେରାଇ ନେବା ସମ୍ପର୍କରେ ମଧ୍ୟ ତାଙ୍କ କାର୍ଯ୍ୟାଳୟ ପାଖରେ କୌଣସି ସୂଚନା ନାହିଁ । ବର୍ତ୍ତମାନ ସେମାନେ ନନ୍ଦନକାନନରେ ରହିଥିବା ବେଳେ ସେମାନଙ୍କ ସ୍ୱାସ୍ଥ୍ୟର ଉନ୍ନତି ଓ ଉପଯୁକ୍ତ ଯତ୍ନ ଉପରେ ଅଧିକ ଗୁରୁତ୍ୱ ଦିଆଯାଉଛି ।

ପଢନ୍ତୁ ଏହି ଖବର: ନନ୍ଦନକାନନର ଖୁଆଡ଼କୁ ଆସିବେ ୫ ଓରାଙ୍ଗଉଟାନ; ପର୍ଯ୍ୟଟକଙ୍କ ପାଇଁ କ'ଣ ରହିବ କଟକଣା ?

• ଓଡ଼ିଶାକୁ କେଉଁଠୁ ଆସିଥିଲେ ଓରାଙ୍ଗଉଟାନ୍ ?

ଗତ ୮ ସେପ୍ଟେମ୍ବର୉ରେ ଓଡ଼ିଶାର ବାଲେଶ୍ବର ଜିଲ୍ଲା ଉଦୟପୁର-ତାଳସାରି ବନଞ୍ଚଳରୁ (ଭୋଗରାଇ ବ୍ଲକର ରଣକଟା ସଂରକ୍ଷିତ ଜଙ୍ଗଲ ନିକଟରୁ) ୫ଟି ଓରାଙ୍ଗଉଟାନ ଛୁଆଙ୍କୁ ବନ ବିଭାଗ ଦ୍ବାରା ଉଦ୍ଧାର କରିଥିଲା । ବନ ବିଭାଗର ନିୟମିତ ପାଟ୍ରୋଲିଂ ଏବଂ ସ୍ଥାନୀୟ ଲୋକଙ୍କ ସୂଚନା ଆଧାରରେ ୩ଟି ଅଣ୍ଡିରା ଏବଂ ୨ଟି ମାଈ ଓରାଙ୍ଗଉଟାନଙ୍କୁ ଉଦ୍ଧାର କରାଯାଇଥିଲା । ଓରାଙ୍ଗଉଟାନ ଭାରତର ସ୍ଥାନୀୟ ପ୍ରଜାତି ନୁହଁନ୍ତି; ଏମାନେ ମୁଖ୍ୟତଃ ଇଣ୍ଡୋନେସିଆର ବର୍ନିଓ ଏବଂ ସୁମାତ୍ରା ଦ୍ୱୀପପୁଞ୍ଜରେ ଦେଖାଯାଆନ୍ତି । ଏମାନେ କେଉଁଠାରୁ ଏବଂ କିପରି ଓଡ଼ିଶା ଆସିଲେ ତାହା ସମ୍ପୂର୍ଣ୍ଣ ସ୍ପଷ୍ଟ ହୋଇନାହିଁ । ତେବେ ଏହା ଏକ ଆନ୍ତର୍ଜାତିକ ବନ୍ୟପ୍ରାଣୀ ଚୋରାଚାଲାଣ କିମ୍ବା ଚୋରା ପରିବହନ ବେଳେ ଧରାପଡ଼ିବା ଭୟରେ କେହି ଜଙ୍ଗଲରେ ଛାଡ଼ି ଦେଇଥିବା ନେଇ ବନ ବିଭାଗ ଓ ଏସଟିଏଫ୍ (STF) ସନ୍ଦେହ କରୁଛି । ସେନେଇ ତଦନ୍ତ ଜାରି ରହିଛି।