Baby Orangutans / କେଉଁ ସ୍ଥାନ ହେବ ଓରାଙ୍ଗଉଟାନଙ୍କ ବାସସ୍ଥଳୀ ? ଓଡ଼ିଶାରେ ରହିବେ ନା ଫେରିଯିବେ

ଭୁବନେଶ୍ଵର: ବାଲେଶ୍ୱର ଜଙ୍ଗଲରୁ ଉଦ୍ଧାର ୫ ଓରାଙ୍ଗଉଟାନ ଏବେ କୁଆଡ଼େ ଯିବେ ? କେଉଁଠି ହେବ ସେମାନଙ୍କ ସ୍ଥାୟୀ ବାସସ୍ଥାନ ? ନନ୍ଦନକାନନରେ ରହିବେ ନା ଇଣ୍ଡୋନେସିଆ ଯିବେ ? ଏହାକୁ ନେଇ ଅନେକ ପ୍ରଶ୍ନ ଉଠିଥିବାବେଳେ ସେପଟେ ଓରାଙ୍ଗଉଟାନଙ୍କୁ ଫେରାଇବାକୁ ଭାରତ ସରକାରଙ୍କୁ ଇଣ୍ଡୋନେସିଆ ସରକାରଙ୍କ ଚିଠି ଆସିଛି । ଏପଟେ କିନ୍ତୁ ନନ୍ଦନକାନନ ପରିବେଶ ସହ ଖାପ ଖୁଆଉଛନ୍ତି ଓରାଙ୍ଗଉଟାନ ।

ନିଜ ଦେଶକୁ ନେବା ପାଇଁ ଏବେ ଆଗକୁ ଆସିଛନ୍ତି ଇଣ୍ଡୋନେସିଆ ସରକାର । ମିଳିଥିବା ସୂଚନା ଅନୁସାରେ ଗତ ସେପ୍ଟେମ୍ବର ୧୦ ତାରିଖରେ ଇଣ୍ଡୋନେସିଆ ବନ ବିଭାଗ ଭାରତର CITES ମ୍ୟାନେଜମେଣ୍ଟ ଅଥୋରିଟିକୁ ଏକ ଚିଠି ଲେଖିଥିଲା । ଯେଉଁଥିରେ ଡିଏମଏ ରିପୋର୍ଟ ଆସିବା ପରେ ୫ ଓରାଙ୍ଗଉଟାନ ଶାବକଙ୍କୁ ଇଣ୍ଡୋନେସିଆ ଫେରାଇବାକୁ କୁହାଯାଇଛି । ଏଥିପାଇଁ ନିଆଯିବାକୁ ଥିବା ସବୁ ପଦକ୍ଷେପରେ ଇଣ୍ଡୋନେସିଆ ସରକାର ସହାୟତା ଯୋଗାଇବେ ।

• କ୍ଷୀର, କଦଳୀ ଖାଉଛନ୍ତି ଶିଶୁ ଓରାଙ୍ଗଉଟାନ୍

ସେପଟେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଓରାଙ୍ଗଉଟାନଙ୍କ ସୁରକ୍ଷାକୁ ଅଧିକ ଗୁରୁତ୍ୱ ଦେଇଛି ବନ ବିଭାଗ । ଏବେ ୫ ଓରାଙ୍ଗଓଟାନ ସମ୍ପୂର୍ଣ୍ଣ ସୁସ୍ଥ ଅଛନ୍ତି । କ୍ଷୀର, କଦଳୀ ଓ ସେଓ ଖାଉଛନ୍ତି । ଦୋଳିରେ ଝୁଲୁଛନ୍ତି । ଖେଳଣା ସହ ଖେଳୁଛନ୍ତି । ଖାଲି ସେତିକି ନୁହେଁ, କ୍ଲାସକାଲ ମ୍ୟୁଜିକ ଜରିଆରେ ମାନସିକ ଚାପ କମାଇବାକୁ ବି ଚାଲିଛି ଚେଷ୍ଟା । ବନ୍ୟପ୍ରାଣୀ ପିସିସିଏଫ କହିଛନ୍ତି ଓରାଙ୍ଗଉଟାନଙ୍କୁ ବଞ୍ଚାଇବାକୁ ପ୍ରାଥମିକତା ଦିଆଯାଉଛି । ସମ୍ପୂର୍ଣ୍ଣ ବିଷାଦ ମୁକ୍ତ ହେବା ପରେ ଡିଏନଏ ଟେଷ୍ଟ ହେବ ।

ବନ୍ୟପ୍ରାଣୀ ଆଇନ ଅନୁସାରେ ଚୋରା ଚାଲାଣ କରାଯାଇଥିବା ଜନ୍ତୁକୁ ମୂଳ ଦେଶକୁ ଫେରାଇବା କଥା । ହେଲେ ଉଦ୍ଧାର ହୋଇଥିବା ଓରାଙ୍ଗଉଟାନ କେଉଁ ପ୍ରଜାତିର ଓ କେଉଁ ଦେଶରୁ ଚୋରା ଚାଲାଣ କରାଯାଇଛି ତାହା ସ୍ପଷ୍ଟ ହୋଇ ନାହିଁ । ଆଗକୁ ଏମାନଙ୍କ ପ୍ରକୃତ ବାସସ୍ଥଳ ଜଣାପଡ଼ିବ ନା ନନ୍ଦନକାନନ ହିଁ ନୂଆ ଠିକଣା ହେବ ତାହା ସମୟ କହିବ ।

ପଢନ୍ତୁ ଏହି ଖବର: ମା’ଠାରୁ ଅଲଗା ହୋଇ ଗଭୀର ଚାପରେ ୫ ଓରାଙ୍ଗଉଟାନ୍, ଦିଆଯିବ ମ୍ୟୁଜିକ୍ ଥେରାପି

• ଓରାଙ୍ଗଉଟାନ୍ ଆଣିଥିବା ମାଫିଆ ଚିହ୍ନଟ

ବିରଳ ଓରାଙ୍ଗଉଟାନ୍ ଉଦ୍ଧାର ଘଟଣାରେ ୭ରୁ ୮ ଜଣ ଆନ୍ତଃରାଜ୍ୟ ବନ୍ୟଜନ୍ତୁ ତସ୍କର ଚିହ୍ନଟ । ଓଡ଼ିଶାକୁ ‘ଟ୍ରାଞ୍ଜିଟ୍ ରୁଟ୍’ କରି ଚାଲାଣ ପାଇଁ ହୋଇଥିଲା ମାଷ୍ଟରପ୍ଲାନ୍ । ସିସିଟିଭିରେ କଏଦ କୋଲକାତା ରେଜିଷ୍ଟ୍ରେସନ କଳା ଥାର୍ ଗାଡ଼ି । ଡିଜିପିଙ୍କ ନିର୍ଦ୍ଦେଶରେ ମାମଲା ହେବାର ୮ ଦିନରେ ପର୍ଦ୍ଦାଫାସ କରିବାକୁ- ବିହାର, ଛତିଶଗଡ଼, ଝାଡ଼ଖଣ୍ଡ ଓ ପଶ୍ଚିମବଙ୍ଗରେ STFର ଖୋଳତାଡ଼ ଜାରି ରହିଛି ।