ବନ୍ଦ ହେବ ବାଲି ମାଫିଆଙ୍କ ମନମାନୀ । ସାବାଡ଼ ହେବେ ବାଲି ମାଫିଆ । ବେଆଇନ ଭାବେ ବାଲି ଉତ୍ତୋଳନ କରି କେହି ବିକ୍ରି କରିପାରିବେନି । ବାଲି ପାଇଁ MSP ଲାଗୁ କରିବେ ସରକାର । ଆଉ ମନ ଇଚ୍ଛା ଦର ବଢାଇ ପାରିବେନି ଲିଜ ଧାରୀ । ସରକାର ନିର୍ଦ୍ଧାରିତ କରିଥିବା MSP ଦରରେ ହିଁ ବିକ୍ରି କରିବେ ଲିଜ୍ ଧାରୀ । MSPରୁ ଅଧିକ ଦରରେ କେହି ବାଲି ବିକ୍ରି କରିପାରିବେନି । ସାରା ରାଜ୍ୟରେ ଗୋଟିଏ ଦରରେ ବିକ୍ରି ହେବ ବାଲି । ଦର କମିବା ସହ ଲୋକଙ୍କୁ ସୁଲଭ ମୂଲ୍ୟରେ ମିଳିବ ବାଲି ।

ତେବେ ବାଲି ଖଣି ପାଇଁ ଆଉ ଇ-ଅକ୍ସନ ନୁହେଁ ବରଂ ଇ-ଲଟେରୀ ମାଧ୍ୟମରେ ଲିଜ୍ ଦିଆଯିବ । ଏହା ସହ ଏଣିକି ବାଲି ଗଚ୍ଛିତ କରି ରଖିବା ପାଇଁ ଷ୍ଟୋରେଜ ଲାଇସେନ୍ସ ଦେବେ ସରକାର । ବିନା ଷ୍ଟୋରେଜ ଲାଇସେନ୍ସରେ ବାଲି ଓ ଅନ୍ୟ ଲଘୁ ଖଣିଜ ପଦାର୍ଥ କେହି ବେଆଇନ ଗଚ୍ଛିତ କରି ରଖିପାରିବେ ନାହିଁ । ଗତକାଲି କ୍ୟାବିନେଟ ବୈଠକରେ ଓଡ଼ିଶା ଲଘୁ ଖଣିଜ ରିହାତି ନିୟମ ୨୦୧୬ରେ ସଂଶୋଧନ କରୁଛନ୍ତି । କ୍ୟାବିନେଟ ନିଷ୍ପତି ପରେ ଏ ନେଇ ବଡ଼ ସୂଚନା ଦେଇଛନ୍ତି ଖଣି ମନ୍ତ୍ରୀ ବିଭୂତି ଜେନା ।

ଅଧିକ ପଢ଼ନ୍ତୁ: କାହାକୁ ବିଶ୍ୱାସ କରିବା ? ଯିଏ ସାଙ୍ଗ ବୋଲି କହୁଛି ସିଏ ଜୀବନ ବି ନେଉଛି !

ସେପଟେ ଗତ ମଙ୍ଗଳବାର ବାଲି ଓ ମଦ ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ କଡ଼ା ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ ମୋହନ ମାଝୀ । ମଙ୍ଗଳବାର ହୋଇଥିବା ଜିଲ୍ଲାପାଳ ଓ ଏସ୍‌ପି ସମ୍ମିଳନୀରେ ସେ କହିଥିଲେ,'ବାଲି ମାଫିଆଙ୍କୁ ସାବାଡ଼ କର । ଖାଲି ବାଲି ମାଫିଆ ନୁହେଁ ଚୋରା ମଦ କାରବାର କରୁଥିବା ଲୋକଙ୍କୁ ବି ଗୋଡ଼େଇ ଗୋଡ଼େଇ ଧର । କାହାରିକୁ ଛାଡ଼ିବା ଦରକାର ନାହିଁ । ଯିଏ ବି ବେଆଇନ କାମ କରୁଛି, ତାକୁ ତୁରନ୍ତ ଧରନ୍ତୁ । ଦରକାର ପଡିଲେ ଡ୍ରୋନ ଟେକ୍ନୋଲୋଜିର ସାହାଯ୍ୟ ନିଅନ୍ତୁ' ।

ମୁଖ୍ୟମନ୍ତ୍ରୀଙ୍କ ଏଭଳି ବୟାନ ପରେ ଚୋରା ମଦ କାରବାର କରୁଥିବା ମଦ ମାଫିଆ ଓ ବାଲି ମାଫିଆଙ୍କ ମହଲରେ ଚହଳ ପଡ଼ିଯାଇଛି । କାହାର ଆଉ ନିସ୍ତାର ନାହିଁ । ଯିଏ ବି ବେଆଇନ କାରବାରରେ ଲିପ୍ତ ଅଛନ୍ତି ସେମାନେ ଏବେ ବେଡ଼ିଂ ପୁଟୁଳି ବାନ୍ଧିବା କଥା ଚିନ୍ତା କରୁଛନ୍ତି ।

ରାଜ୍ୟରେ ଲଘୁ ଖଣିଜ ଚୋରା ଚାଲାଣ ହେଉଛି । ତେଣୁ ମାଫିଆଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ମୁଖ୍ୟମନ୍ତ୍ରୀ କହିଛନ୍ତି । ଅଧିକାରୀ ମାନଙ୍କୁ ମଧ୍ୟ ସମ୍ପୂର୍ଣ୍ଣ କ୍ଷମତା ଦିଆଯାଇଛି । ଏହାକୁ ସଂଗଠିତ ଅପରାଧ ଶ୍ରେଣୀରେ ବିବେଚନା କରି ଦୃଢ଼ ଆକ୍ସନ ନେବାକୁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । କୌଣସି ରାଜନୈତିକ ଚାପର ବଶବର୍ତ୍ତୀ ହୁଅନ୍ତୁ ନାହିଁ ବୋଲି ମଧ୍ୟ ସେ କହିଥିଲେ ।