Odisha Sand Price / ବାଲି ମାଫିଆଙ୍କୁ ବଡ଼ ଝଟକା ! ୨-୩ ହଜାର ନୁହେଁ...ଏବେ ୬୮୦ ଟଙ୍କାରେ ମିଳିବ ଟ୍ରାକ୍ଟର ବାଲି

ରାଜ୍ୟରେ ବାଲି ଚୋରା କାରବାର ରୋକିବା ଏବଂ ବାଲିର ଅତ୍ୟଧିକ ଦର ବୃଦ୍ଧିକୁ ନିୟନ୍ତ୍ରଣ କରିବା ପାଇଁ ସରକାର ବଡ଼ ପଦକ୍ଷେପ ନେଇଛନ୍ତି । ବାଲି ପାଇଁ ସରକାର ସର୍ବନିମ୍ନ ବିକ୍ରୟ ମୂଲ୍ୟ (MSP) ପ୍ରତି କ୍ୟୁବିକ ମିଟର ୩୪୦ ଟଙ୍କା ଧାର୍ଯ୍ୟ କରିଛନ୍ତି । ଏହି ଦରଠାରୁ ଅଧିକ ମୂଲ୍ୟରେ ବାଲି ବିକ୍ରି କରାଯିବ ନାହିଁ । ଅର୍ଥାତ ଗୋଟିଏ ଟ୍ରାକ୍ଟର ବାଲିର ମୂଲ୍ୟ ପ୍ରାୟ ୬୮୦ ଟଙ୍କା ହେବ ।

ବର୍ତ୍ତମାନ ରାଜ୍ୟର ଅନେକ ସ୍ଥାନରେ ଗୋଟିଏ ଟ୍ରାକ୍ଟର ବାଲି ୨ ହଜାରରୁ ୩ ହଜାର ଟଙ୍କା ପର୍ଯ୍ୟନ୍ତ ବିକ୍ରି ହେଉଥିବାରୁ ସାଧାରଣ ଲୋକ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଏହାକୁ ରୋକିବା ଏବଂ ସାଧାରଣ ଲୋକଙ୍କୁ ଉପଯୁକ୍ତ ଦରରେ ବାଲି ଯୋଗାଇବା ଉଦ୍ଦେଶ୍ୟରେ ସରକାର ଏମଏସପି ବ୍ୟବସ୍ଥା ଲାଗୁ କରିଛନ୍ତି ।

ଅଧିକ ପଢ଼ନ୍ତୁ: ଅତି ପ୍ରବଳ ବର୍ଷା ସମ୍ଭାବନା; ରେଡ୍ ଆଲର୍ଟ ପରେ ସମସ୍ତ ସ୍କୁଲ ଛୁଟି ଘୋଷଣା

ଏହା ସହିତ ପ୍ରଥମ ପର୍ଯ୍ୟାୟରେ ଇ-ଲଟେରୀ ମାଧ୍ୟମରେ ୧୦୦ରୁ ଅଧିକ ବାଲି ଖାଦାନର ନିଲାମ କରାଯିବ । ସ୍ୱଚ୍ଛ ଏବଂ ପାରଦର୍ଶୀ ପ୍ରକ୍ରିୟାରେ ଖାଦାନ ବଣ୍ଟନ କରାଯିବା ଦ୍ୱାରା ବେଆଇନ କାରବାରକୁ ରୋକାଯିବ ବୋଲି ସରକାର ଆଶା କରୁଛନ୍ତି ।

ଅନ୍ୟପଟେ, କିଛି ସ୍ଥାନରେ ଘରୋଇ ନିର୍ମାଣ କାମ ପାଇଁ ଦିଆଯାଉଥିବା ବାଲି ପରମିଟ୍‌ର ଅପବ୍ୟବହାର ହେଉଥିବା ସରକାରଙ୍କ ନଜରକୁ ଆସିଛି । ଏହାକୁ ଗୁରୁତ୍ୱର ସହ ନେଇ ପରମିଟ୍‌ ବ୍ୟବସ୍ଥାକୁ କଡ଼ାକଡ଼ି ଭାବେ କାର୍ଯ୍ୟକାରୀ କରିବାକୁ ନିର୍ଦ୍ଦେଶ ଦିଆଯାଇଛି ।

ଖଣି ମନ୍ତ୍ରୀ ବିଭୂତି ଜେନା କହିଛନ୍ତି, ବାଲି ଚୋରାଚାଲାଣ, କଳାବଜାରୀ ଓ ଅଧିକ ଦରରେ ବିକ୍ରିକୁ ସମ୍ପୂର୍ଣ୍ଣ ରୋକିବା ପାଇଁ ସରକାର କଠୋର ପଦକ୍ଷେପ ନେବେ । ଏହି ନୂତନ ବ୍ୟବସ୍ଥା ଦ୍ୱାରା ସାଧାରଣ ଲୋକ ସୁଲଭ ଦରରେ ବାଲି ପାଇପାରିବେ ଏବଂ ବାଲି ବ୍ୟବସାୟରେ ସ୍ୱଚ୍ଛତା ଆସିବ ବୋଲି ଆଶା କରାଯାଉଛି ।