Rituparna Panda / ଚମକିଲେ ଓଡ଼ିଆ ଝିଅ ଋତୁପର୍ଣ୍ଣା ପଣ୍ଡା; ଅନ୍ତର୍ଜାତୀୟ ବ୍ୟାଡମିଣ୍ଟନ ପ୍ରତିଯୋଗିତାରେ ବ୍ୟାକ୍-ଟୁ-ବ୍ୟାକ୍ ପଦକ

ହାଇଦ୍ରାବାଦ: ଖେଳ ପଡ଼ିଆରେ ଓଡ଼ିଶା ଝିଅଙ୍କ କମାଲ । ବ୍ୟାଡମିଣ୍ଟନ କୋର୍ଟରୁ ଓଡ଼ିଶା ପାଇଁ ଆସିଛି ଏକ ବଡ଼ ଖୁସି ଖବର । ଅନ୍ତର୍ଜାତୀୟ ସ୍ତରରେ ପୁଣି ଚମକିଛନ୍ତି ଓଡ଼ିଶାର ଷ୍ଟାର୍ ସଟଲର୍ ଋତୁପର୍ଣ୍ଣା ପଣ୍ଡା । ଗୋଟିଏ କି ଦୁଇଟି ନୁହେଁ, ବ୍ୟାକ୍-ଟୁ-ବ୍ୟାକ୍ ଦୁଇ ଦୁଇଟି ପ୍ରତିଯୋଗିତାରେ ବ୍ରୋଞ୍ଜ ପଦକ ଜିତି ରାଜ୍ୟ ତଥା ଦେଶ ପାଇଁ ଗୌରବ ଆଣିଛନ୍ତି ଋତୁପର୍ଣ୍ଣା । ସାଥୀ ଖେଳାଳି ବିରାଜ କୁଭାଲେଙ୍କ ସହ ମିକ୍ସଡ୍ ଡବଲ୍ସ ଇଭେଣ୍ଟରେ ସେ ଏହି ସଫଳତା ହାସଲ କରିଛନ୍ତି ।

ଅନ୍ତର୍ଜାତୀୟ ବ୍ୟାଡମିଣ୍ଟନ ସର୍କିଟ୍‌ରେ ଜାରି ରହିଛି ଓଡ଼ିଶା ସଟଲର୍ ଋତୁପର୍ଣ୍ଣା ପଣ୍ଡାଙ୍କ ଜବରଦସ୍ତ ପ୍ରଦର୍ଶନ। ନିକଟରେ ଶେଷ ହୋଇଥିବା ଦୁଇଟି ବଡ଼ ଅନ୍ତର୍ଜାତୀୟ ପ୍ରତିଯୋଗିତାରେ କ୍ରମାଗତ ଦୁଇଟି ବ୍ରୋଞ୍ଜ ପଦକ ଜିତିଛନ୍ତି ଋତୁପର୍ଣ୍ଣା । ଅକ୍ଟୋବର ୨୭ରୁ ନଭେମ୍ବର ୧ ପର୍ଯ୍ୟନ୍ତ ଚାଲିଥିବା ପ୍ରସିଦ୍ଧ 'କେବିଏ ଡାଇମଣ୍ଡ ଜୁବିଲି ଇଣ୍ଡିଆ ଇଣ୍ଟରନ୍ୟାସନାଲ ଚ୍ୟାଲେଞ୍ଜ'ରେ ପ୍ରଥମେ ବ୍ରୋଞ୍ଜ ପଦକ କବଜା କରିଥିଲା ଏହି ଯୋଡ଼ି । ଏହାର ତୁରନ୍ତ ପରେ ଚଳିତ ନଭେମ୍ବର ୩ରୁ ୮ ତାରିଖ ପର୍ଯ୍ୟନ୍ତ ଅନୁଷ୍ଠିତ 'ତେଲେଙ୍ଗାନା ଇଣ୍ଡିଆ ଇଣ୍ଟରନ୍ୟାସନାଲ ଚ୍ୟାଲେଞ୍ଜ'ରେ ମଧ୍ୟ ନିଜର ଶ୍ରେଷ୍ଠ ଫର୍ମ ବଜାୟ ରଖି ଦ୍ୱିତୀୟ ବ୍ରୋଞ୍ଜ ପଦକ ହାସଲ କରିଛନ୍ତି ।

• ବ୍ୟାକ୍-ଟୁ-ବ୍ୟାକ୍ ମେଡାଲ୍

ପ୍ରଥମ ବ୍ରୋଞ୍ଜ ପଦକର ମ୍ୟାଚ୍: ବେଙ୍ଗାଲୁରୁ ଟୁର୍ଣ୍ଣାମେଣ୍ଟର ମିକ୍ସଡ୍ ଡବଲ୍ସ ସେମିଫାଇନାଲ୍‌ରେ ଋତୁପର୍ଣ୍ଣା ଓ ବିରାଜଙ୍କ ଯୋଡ଼ି ସି. ଲାଲରାମସାଙ୍ଗା ଓ ଆଞ୍ଜେଲ୍ ପୁନେରାଙ୍କ ଠାରୁ ୧୧-୨୧, ୯-୨୧ରେ ପରାସ୍ତ ହୋଇଥିଲେ ।

ଦ୍ୱିତୀୟ ବ୍ରୋଞ୍ଜ ପଦକର ମ୍ୟାଚ୍: ହାଇଦ୍ରାବାଦରେ ନଭେମ୍ବର ୭ରେ ଖେଳାଯାଇଥିବା ସେମିଫାଇନାଲ୍‌ରେ ଋତୁପର୍ଣ୍ଣା ଓ ବିରାଜଙ୍କୁ ଋଷିଆର ରୋଡିଅନ୍ ଅଲିମୋବ୍ ଓ ଅଲିନା ଡାଭଲେଟୋଭାଙ୍କ ଯୋଡ଼ି ୧୬-୨୧, ୧୬-୨୧ରେ ପରାସ୍ତ କରିଥିଲେ । ଉଭୟ ପ୍ରତିଯୋଗିତାରେ ସେମିଫାଇନାଲ୍ ପର୍ଯ୍ୟନ୍ତ ପହଞ୍ଚିବା ଫଳରେ ଏହି ଯୋଡ଼ି ଦୁଇଟି ବ୍ରୋଞ୍ଜ ପଦକ ହାସଲ କରିଛନ୍ତି ।

ପଢନ୍ତୁ ଏହି ଖବର: ମାତ୍ର ୭ ରନ୍ କରି ବି ଇତିହାସ ରଚିଲେ ବିରାଟ କୋହଲି, ଭାଙ୍ଗିଲେ ପଣ୍ଟିଂଙ୍କ ରେକର୍ଡ

• ଓଡ଼ିଶା ବ୍ୟାଡମିଣ୍ଟନ ଜଗତ ପାଇଁ ଖୁସି ଖବର

ଋତୁପର୍ଣ୍ଣାଙ୍କ ଏହି ସଫଳତାର ସବୁଠୁ ବଡ଼ କଥା ହେଉଛି, ମାତ୍ର କିଛି ଦିନର ବ୍ୟବଧାନରେ ଦୁଇଟି ଭିନ୍ନ ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟରେ ନିଜର ଦକ୍ଷତା ପ୍ରମାଣିତ କରିଛନ୍ତି ସେ । ବେଙ୍ଗାଲୁରୁରେ ପ୍ରଥମ ବ୍ରୋଞ୍ଜ ଜିତିବା ପରେ ହାଇଦ୍ରାବାଦରେ ମଧ୍ୟ ସେହି ସଫଳତାକୁ ଦୋହରାଇଛନ୍ତି । ମିକ୍ସଡ୍ ଡବଲ୍ସରେ ବିରାଜ କୁଭାଲେଙ୍କ ସହ ତାଙ୍କର ଏହି ଲଗାତାର ପ୍ରଦର୍ଶନ ଓଡ଼ିଶା ବ୍ୟାଡମିଣ୍ଟନ ଜଗତ ପାଇଁ ନିଶ୍ଚିତ ଏକ ଉତ୍ସାହଜନକ ଖବର ।