Odisha SIR / SIR ଚିଠା ତାଲିକାରେ ଆପଣଙ୍କ ନାଁ ଅଛି ତ ? ୱେବସାଇଟରୁ କିପରି ଜାଣିବେ ?

ଭୁବନେଶ୍ଵର: ରାଜ୍ୟ ଭୋଟର ତାଲିକାରେ ହୋଇଛି ବଡ଼ଧରଣର ସଂଶୋଧନ । ରାଜ୍ୟରେ SIRର ପ୍ରଥମ ପର୍ଯ୍ୟାୟ ସରିବା ପରେ ୨୦ ଲକ୍ଷ ୧୪ ହଜାର ଭୋଟର ବାଦ ପଡ଼ିଛନ୍ତି । ତେବେ ଏସ ଆଇ ଆର ଚିଠା ତାଲିକାରେ ଆପଣଙ୍କ ନାଁ ଅଛି ତ ? ୱେବସାଇଟରୁ କିପରି ଜାଣିବେ ? ଏସ ଆଇ ଆରରେ ନାଁ କଟିଥିଲେ କିପରି ଯୋଡ଼ିବେ ନିଜ ନାଁ ? ଏହାକୁ ସରଳ ଭାବେ ବୁଝାଇଛନ୍ତି ଅତିରିକ୍ତ ନିର୍ବାଚନ ଅଧିକାରୀ ସୁଶାନ୍ତ କୁମାର ମିଶ୍ର ।

• ୱେବସାଇଟରୁ କିପରି ଜାଣିବେ ?

ପ୍ରଥମେ ନିର୍ବାଚନ ଆୟୋଗଙ୍କ ୱେବ ସାଇଟକୁ ଯାଇ 'Search your name in the voter' ଲିଷ୍ଟରେ କ୍ଲିକ କରନ୍ତୁ । ପରେ ନିଜ ରାଜ୍ୟରେ କ୍ଲିକ କରି ନାମ, ଜନ୍ମ ତାରିଖ ସହ ନିର୍ବାଚନମଣ୍ଡଳୀ ତଥ୍ୟ ଦେଇ ଯାଞ୍ଚ କରି ପାରିବେ । ଗ୍ରାମାଞ୍ଚଳରେ ଅଧିକ ପାଠ ନ ପଢିଥିବା ବ୍ୟକ୍ତି ବିଏଲଓ ବା ରାଜନୈତିକ ଦଳ ଗୁଡିକ ଦେଇଥିବା ଏଜେଣ୍ଟଙ୍କୁ ଯୋଗାଯୋଗ କରି ମଧ୍ୟ ଜାଣି ପାରିବେ ।

• ଗଞ୍ଜାମ ଜିଲ୍ଲାରୁ କଟିଲେ ଅଧିକ ଭୋଟର

ଏସଆଇଆର ପ୍ରକ୍ରିୟାରେ ସବୁଠୁ ଅଧିକ ଗଞ୍ଜାମ ଜିଲ୍ଲାରେ ୨ ଲକ୍ଷ ୭ ହଜାର ୬୨୪ ନାଁ କଟିଛି । ସେହିପରି କଟକରେ ୧ ଲକ୍ଷ ୫୫ ହଜାର ୧୬୪, ମୟୁରଭଞ୍ଜରେ ୧ ଲକ୍ଷ ୧୧ ହଜାର ୨୬୭ ଓ ଯାଜପୁରରେ ୧ ଲକ୍ଷ ୫ ହଜାର ୧୪ ଜଣଙ୍କ ନା କଟିଛି । ଗଞ୍ଜାମରେ ସବୁଠୁ ଅଧିକ ୯୪ ହଜାର ୭୩୪ ମୃତ ଭୋଟରଙ୍କ ନାଁ କଟିଥିବା ବେଳେ, ସ୍ଥାନାନ୍ତରିତ ଭୋଟର ଭାବେ କଟକରେ ୭୪ ହଜାର ୯୪୦ ଜଣଙ୍କ ନାଁ କଟିଛି । ମୋଟ ଉପରେ ୧ ଲକ୍ଷ ୯୯ ହଜାର ୨୫୧ ଜଣଙ୍କ ପତ୍ତା ମିଳୁନଥିବା ନିର୍ବାଚନ କମିଶନଙ୍କ ତଥ୍ୟରୁ ଜଣାପଡିଛି ।

• ରାଜ୍ୟରେ କେବଳ ୮ଲକ୍ଷ ଭୂତ ଭୋଟର

ସବୁଠାରୁ ବଡ଼ କଥା ହେଉଛି, ଏହି ବାଦ୍ ପଡ଼ିଥିବା ଭୋଟରଙ୍କ ମଧ୍ୟରେ କେବଳ ମୃତ ବ୍ୟକ୍ତି ବା 'ଭୂତ ଭୋଟର'ଙ୍କ ସଂଖ୍ୟା ହିଁ ରହିଛି ପ୍ରାୟ ୮ ଲକ୍ଷ ୩୨ ହଜାର । ରାଜ୍ୟରେ ୩ କୋଟି ୩୩ ଲକ୍ଷ ୯୯ ହଜାର ୫୯୧ ଭୋଟର ଥିଲେ । ଏଥିରୁ ୩ କୋଟି ୧୩ ଲକ୍ଷ ୮୭ ହଜାର ୩୪ ଭୋଟର ସେମାନଙ୍କ ଫର୍ମ ଦାଖଲ କରିଛନ୍ତି । ଭୋଟର ତାଲିକାରେ ଏକାଧିକ ସ୍ଥାନରେ ପଞ୍ଜିକରଣ ପାଇଁ ୧ ଲକ୍ଷ ୫୮ ହଜାର, ଅନ୍ୟ କାରଣ ପାଇଁ ୧୪ ହଜାର ଭୋଟରଙ୍କ ନାଁ କାଟିଛି ।

ପଢନ୍ତୁ ଏହି ଖବର: ଭୋଟର ତାଲିକାରେ ବଡ଼ଧରଣର ସଂଶୋଧନ; ବାଦ୍ ପଡ଼ିଲେ ୨୦ ଲକ୍ଷ ୧୪ ହଜାର ଭୋଟର

ତେବେ ନାଁ କଟିଥିବା ବ୍ୟକ୍ତି ଫର୍ମ ୬ ଜରିଆରେ ଆବେଦନ କରି ଗୋଟିଏ ମାସ ସମୟ ଭିତରେ ନିଜ ନାଁ ଯୋଡ଼ିପାରିବେ। ଅଗଷ୍ଟ ୫ ସୁଦ୍ଧା ଆପତ୍ତି ଜଣାଇଲେ ERO ଓ AERO ମାନଙ୍କ ଦ୍ୱାରା ଯାଞ୍ଚ ହୋଇ ସେପ୍ଟମ୍ବରରେ ଚୂଡାନ୍ତ ତାଲିକା ପ୍ରକାଶ ପାଇବ । ନୂଆ ଭୋଟର ପାଇଁ ଆବେଦନ ଫର୍ମ ୬, ବିଦେଶରେ ବସବାସ କରୁଥିଲେ ଭୋଟର ତାଲିକାରେ ନାଁ ଯୋଡିବା ପାଇଁ ଫର୍ମ ୬ କ, ନୂଆ ଭୋଟର ତାଲିକାରେ ନାଁ ଯୋଡିବା କିମ୍ବା ନାଁ କାଟିଥିଲେ ଆପତ୍ତି ପାଇଁ ଫର୍ମ ୭ କିମ୍ବା ବାସସ୍ଥାନ ପରିବର୍ତ୍ତନ କରିଥିଲେ ଭୋଟର ତାଲିକାରେ ନାଁ ସଂଶୋଧନ ପାଇଁ ଫର୍ମ ୮ରେ ଆବେଦନ କରି ବିଏଲଓ ଙ୍କ ନିକଟରେ ଦାଖଲ କରିବେ । ସେପ୍ଟେମ୍ବର ୨ ତାରିଖ ସୁଦ୍ଧା ମାମଲା ଗୁଡିକର ଯାଞ୍ଚ ସାରି ୬ ସେପ୍ଟେମ୍ବରରେ ନୂତନ ତାଲିକା ପ୍ରକାଶ ପାଇବ।