SIR ନେଇ ମ୍ୟାପିଂ ବଡ଼ ସୂଚନା ଦେଇଛନ୍ତି ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ । SIR ମ୍ୟାପିଂ ନ କଲେ ଭୋଟର ତାଲିକାରୁ ନାଁ କଟିଯିବ । ଏଥିପାଇଁ ଭୋଟର ନିଜେ ଘରେ ବସି ମ୍ୟାପିଂ କରିପାରିବେ । ଆବଶ୍ୟକ ପ୍ରମାଣ ଦେଇ SIR ପ୍ରକ୍ରିୟାରେ ସାମିଲ ହୋଇପାରିବେ ।

ଓଡ଼ିଶାରେ ସ୍ପେଶାଲ ଇନଟେନସିଭ ରିଭିଜନ୍- SIR କେବେଠାରୁ ଆରମ୍ଭ ହେବ ତା'ର ତାରିଖ ଘୋଷଣା ହୋଇନାହିଁ । କେନ୍ଦ୍ରୀୟ ନିର୍ବାଚନ ଆୟୋଗ ଏ ସଂପର୍କରେ ତାରିଖ ଘୋଷଣା କରିବେ । କିନ୍ତୁ ଏହାର ବହୁ ପୂର୍ବରୁ ଆରମ୍ଭ ହୋଇସାରିଛି SIR ମ୍ୟାପିଂ ପ୍ରକ୍ରିୟା । ରାଜ୍ୟରେ ଶେଷଥର ପାଇଁ ୨୦୦୨ରେ SIR ହୋଇଥିଲା । ସେହି ତାଲିକାକୁ ୨୦୨୫ରେ ହୋଇଥିବା ଚୂଡ଼ାନ୍ତ ଭୋଟର ତାଲିକା ସହ ମେଳ କରାଯାଉଛି । ୨୦୦୨ରେ ଯେଉଁମାନଙ୍କର ନାଁ SIR ତାଲିକାରେ ଥିଲା ସେମାନେ ଆପେ ଆପେ ନୂଆ SIR ତାଲିକାରେ ସ୍ଥାନ ପାଇବେ । ଏପରିକି ବାପା, ଜେଜେବାପା କିମ୍ବା ଅନ୍ୟ ବରିଷ୍ଠ ସଂପର୍କୀୟଙ୍କ ନାଁ ଥିଲେ ଓ ସେମାନଙ୍କ ପରବର୍ତ୍ତୀ ପିଢ଼ିଙ୍କ ନାଁ ଭୋଟର ତାଲିକାରେ ନଥିଲେ ବି ବୁଥସ୍ତରୀୟ ଅଧିକାରୀ ବା BLOଙ୍କ ନିକଟରେ ନିଜର ନାଁକୁ ଚଢ଼ାଇ ପାରିବେ ।

ରାଜ୍ୟରେ ଦୀର୍ଘ ୫ ମାସ ଧରି ଏହି SIR ମ୍ୟାପିଂ ପ୍ରକ୍ରିୟା ଜାରି ରହିଥିବା ବେଳେ ଏବେ ବିଭିନ୍ନ ଖବରକାଗଜରେ ବିଜ୍ଞପ୍ତି ପ୍ରକାଶ ପାଇଛି । ଏଥିରେ ଭୋଟର ନିଜେ ଘରେ ବସି ମଧ୍ୟ କିପରି SIR ମ୍ୟାପିଂ କରିପାରିବେ ସେନେଇ କେତେକ ସହଜ ଉପାୟ ସଂପର୍କରେ ସୂଚନା ଦିଆଯାଇଛି । ୨୦୦୨ ଭୋଟର ତାଲିକା ବା SIR ମ୍ୟାପିଂ ତାଲିକାରୁ ନିଜ ନାଁକୁ ଯାଞ୍ଚ କରି ପରବର୍ତ୍ତୀ SIRରେ ନିଜକୁ ସାମିଲ କରିବା ପାଇଁ ଏହି ସରଳ ପ୍ରକ୍ରିୟା ବାବଦରେ ଦିଆଯାଇଛି ସୂଚନା ।

ସେପଟେ ସ୍ପେଶାଲ ଇଣ୍ଚେନସିଭ୍ ରିଭିଜନ୍ ବା SIR ଅନ୍ତର୍ଗତ ଓଡ଼ିଶାରେ କଟିପାରନ୍ତି ୧୭ ଲକ୍ଷ ଭୋଟର । ଅର୍ଗସକୁ ଏକ୍ସକ୍ଲୁସିଭ୍ ସାକ୍ଷାତକାର ଦେଇ ଏହା କହିଛନ୍ତି ଓଡ଼ିଶା ମୁଖ୍ୟ ନିର୍ବାଚନ ଅଧିକାରୀ ଆର.ଏସ୍. ଗୋପାଳନ । ବର୍ତ୍ତମାନ ସୁଦ୍ଧା ପ୍ରାୟ ୭୫ ପ୍ରତିଶତ ଭୋଟରଙ୍କର ମ୍ୟାପିଂ ଶେଷ ହେଲାଣି । ରାଜ୍ୟର ପ୍ରାୟ ୯୫ ପ୍ରତିଶତ ଭୋଟର SIRରେ ଯୋଗ୍ୟ ବିବେଚିତ ହେବାର ସମ୍ଭାବନା ରହିଛି । ବାକି ଯେଉଁ ୫ ପ୍ରତିଶତ ରହିଲେ ସେମାନଙ୍କୁ ଭୋଟର ଲିଷ୍ଟରେ ନିଜ ନାମ ରଖିବା ପାଇଁ ଆବଶ୍ୟକ ପ୍ରମାଣପତ୍ର ଦେବାକୁ ପଡ଼ିବ । ଯଦି ପ୍ରମାଣପତ୍ର ଦେଇନପାରିଲେ ସେମାନଙ୍କ ନାଁ ଭୋଟର ତାଲିକାରୁ କାଟି ଦିଆଯିବ । ଯାହର ସଂଖ୍ୟା ପ୍ରାୟ ୧୭ ଲକ୍ଷ ବୋଲି କହିଥିଲେ ମୁଖ୍ୟ ନିର୍ବାଚନ ଅଧିକାରୀ । ତେଣୁ କିଭଳି ଆପଣଙ୍କ ନାଁ ଭୋଟର ତାଲିକାରୁ ନ କଟିବ, ସେଥିପାଇଁ ବୁଥସ୍ତରୀୟ ଅଧିକାରୀଙ୍କୁ ସହଯୋଗ କରିବାକୁ କୁହାଯାଇଛି ।
SIR ପାଇଁ ପ୍ରସ୍ତୁତି ପ୍ରକ୍ରିୟା ଜାରି ରହିଥିବା ନିର୍ବାଚନ କମିଶନ କେବେ ତାରିଖ ଘୋଷଣା କରିବେ ତାକୁ ସମସ୍ତେ ଅପେକ୍ଷା କରିଛନ୍ତି । 

ଏଥିସହ ପଢ଼ନ୍ତୁ: ବିଡିଓଙ୍କ ବଦଳି ଦାବିରେ ଜନପ୍ରତିନିଧିଙ୍କ ଅନିର୍ଦ୍ଦିଷ୍ଟ କାଳ ପାଇଁ ଧାରଣା