Odisha Student Elections / ଆଜି କ୍ୟାମ୍ପସ୍ ମହାଲଢ଼େଇ; କଲେଜ ପାଇଁ ନୂଆ ନେତା ବାଛିବେ ଛାତ୍ରଛାତ୍ରୀ

ଭୁବନେଶ୍ଵର: ଦୀର୍ଘ ବର୍ଷର ଅପେକ୍ଷାର ଅନ୍ତ । ରାଜ୍ୟର ୩୪୬ଟି ମହାବିଦ୍ୟାଳୟ ଓ ୧୩ଟି ବିଶ୍ୱବିଦ୍ୟାଳୟରେ ଆରମ୍ଭ ହୋଇଛି ବହୁ ପ୍ରତୀକ୍ଷିତ ଛାତ୍ର ସଂସଦ ନିର୍ବାଚନ । କ୍ୟାମ୍ପସରେ ସକାଳ ୮ଟାରୁ ମତଦାନ ଆରମ୍ଭ ହୋଇଥିବା ବେଳେ ଏହା ଅପରାହ୍ନ ୨ଟା ପର୍ଯ୍ୟନ୍ତ ଚାଲିବ । ଏହାପରେ ଅପରାହ୍ନ ୨ଟାରୁ ଆରମ୍ଭ ହେବ ଭୋଟ ଗଣତି ଏବଂ ସନ୍ଧ୍ୟା ସୁଦ୍ଧା ସାମ୍ନାକୁ ଆସିବ ନିର୍ବାଚନର ଫଳାଫଳ । ନିର୍ବାଚନ ପାଇଁ ବାଲଟ୍ ପେପର ଓ ବାକ୍ସ ପ୍ରସ୍ତୁତ ସରିଛି । ବିଜୟୀ ପ୍ରାର୍ଥୀମାନେ ଆସନ୍ତାକାଲି ଅର୍ଥାତ୍ ୧୬ ତାରିଖରେ ଶପଥ ଗ୍ରହଣ କରିବେ ।

• ଶାନ୍ତିପୂର୍ଣ୍ଣ ମତଦାନକୁ ଗୁରୁତ୍ଵ

ନିର୍ବାଚନକୁ ଶାନ୍ତିପୂର୍ଣ୍ଣ ଓ ଶୃଙ୍ଖଳିତ ଭାବେ ଶେଷ କରିବା ପାଇଁ ସମସ୍ତ କ୍ୟାମ୍ପସରେ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା ଅତ୍ୟନ୍ତ କଡ଼ାକଡ଼ି କରାଯାଇଛି । ବିଶେଷ କରି ଉତ୍କଳ ବିଶ୍ୱବିଦ୍ୟାଳୟ ପରିସରରେ ପୋଲିସ ଛାଉଣି ହୋଇଥିବା ଦେଖିବାକୁ ମିଳିଛି । ଖୋଦ୍ ପୋଲିସ କମିଶନର ଏବଂ ଡିସିପିଙ୍କ ସହ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ସୁରକ୍ଷା ବ୍ୟବସ୍ଥାର ତଦାରଖ କରିଛନ୍ତି । ସମସ୍ତ ୩୪୬ଟି କଲେଜ ଓ ୧୩ଟି ବିଶ୍ୱବିଦ୍ୟାଳୟରେ ଶାନ୍ତିପୂର୍ଣ୍ଣ ମତଦାନ ପାଇଁ ପ୍ରଶାସନିକ ପ୍ରସ୍ତୁତି ଏବେ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି । ଛାତ୍ରଛାତ୍ରୀଙ୍କ ମଧ୍ୟରେ ନିଜ ନେତା ବାଛିବା ପାଇଁ ପ୍ରବଳ ଉତ୍ସାହ ଦେଖିବାକୁ ମିଳୁଛି ।

• ସଭାପତି ପଦ ପାଇଁ ୮୬୬ ପ୍ରାର୍ଥୀ

କ୍ୟାମ୍ପସ ନିର୍ବାଚନ ପାଇଁ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ ହୋଇସାରିଛି । ସଭାପତି ପଦ ପାଇଁ ମଇଦାନରେ ଅଛନ୍ତି ସର୍ବାଧିକ ୮୬୬ ପ୍ରାର୍ଥୀ । କଲେଜରେ ୮୨୮ ଏବଂ ବିଶ୍ଵବିଦ୍ୟାଳୟ ୩୮ ଜଣ । ସେହିପରି ଉପ ସଭାପତି ପଦ ପାଇଁ ମୋଟ ପ୍ରାର୍ଥୀ ଅଛନ୍ତି ୭୧୬ ଜଣ, ଯେଉଁଥିରୁ କଲେଜରେ ୬୭୯ ଏବଂ ବିଶ୍ଵବିଦ୍ୟାଳୟରେ ୩୭ ଜଣ ସାମିଲ । ସାଧାରଣ ସମ୍ପାଦକ ପାଇଁ ମୋଟ ପ୍ରାର୍ଥୀ ୬୧୬ ଜଣ ଥିବାବେଳେ କଲେଜରୁ ୫୯୩ ଜଣ ଏବଂ ବିଶ୍ଵବିଦ୍ୟାଳୟରୁ ୨୩ ଜଣ ଅଛନ୍ତି । ସେପଟେ କ୍ୟାମ୍ପସଗୁଡ଼ିକରେ କଡ଼ା ସୁରକ୍ଷା ବ୍ୟବସ୍ଥା ହୋଇଛି । ହଷ୍ଟେଲ ଓ କଲେଜ ପରିସର ଖାଲି କରିବାକୁ ନିର୍ଦ୍ଦେଶ ଦିଆଯାଇଛି । ସେପଟେ ହଟାଯାଇଛି ବ୍ୟାନର-ପୋଷ୍ଟର । ଆଜି ସକାଳ ୮ଟାରୁ କ୍ୟାମ୍ପସରେ ଭୋଟିଂ । ଅପରାହ୍ନରେ ବାହାରିବ ରେଜଲ୍ଟ ।

ପଢନ୍ତୁ ଏହି ଖବର: ଛାତ୍ର ସଂସଦ ନିର୍ବାଚନ ପୂର୍ବରୁ ଅଶାନ୍ତ କ୍ୟାମ୍ପସ୍‌, ବାଣୀବିହାରରେ ବ୍ୟାପକ ଭଙ୍ଗାରୁଜା...କ୍ୟାମ୍ପସ୍‌ରେ ପୋଲିସ୍‌ ଛାଉଣୀ

• ରାଜ୍ୟରେ ସୁରକ୍ଷା ବ୍ୟବସ୍ଥା କଡ଼କଡ଼ି

ଛାତ୍ର ସଂସଦ ନିର୍ବାଚନ ପାଇଁ ରାଜ୍ୟରେ ସୁରକ୍ଷା ବ୍ୟବସ୍ଥା କଡ଼କଡ଼ି । ଗତକାଲି ଭୁବନେଶ୍ୱରସ୍ଥିତ ଡିଜିପିଙ୍କ କ୍ୟାମ୍ପ କାର୍ଯ୍ୟାଳୟଠାରେ ବିନୟତୋଷ ମିଶ୍ରଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା । ଭିଡିଓ କନ୍‌ଫରେନ୍ସିଂ ଜରିଆରେ ହୋଇଥିବା ବୈଠକରେ ସମସ୍ତ ଜିଲ୍ଲାର ଏସ୍‌ପି ଏବଂ ରେଞ୍ଜ ଆଇଜି/ଡିଆଇଜିମାନେ ଯୋଗଦେଇଥିଲେ। ନିର୍ବାଚନ ସମୟରେ ଏବଂ ପରବର୍ତ୍ତୀ ସମୟରେ କଲେଜ କ୍ୟାମ୍ପସରେ ଯେପରି କୌଣସି ହିଂସାକାଣ୍ଡ ନଘଟେ, ସେଥିପାଇଁ ଆଗୁଆ ସତର୍କତା ଅବଲମ୍ବନ କରିବାକୁ ଡିଜିପି ଗୁରୁତ୍ୱାରୋପ କରିଥିଲେ । କଲେଜ କର୍ତ୍ତୃପକ୍ଷଙ୍କ ସହ ନିୟମିତ ଯୋଗାଯୋଗ ରଖିବା, ସମ୍ବେଦନଶୀଳ ସ୍ଥାନଗୁଡ଼ିକରେ ପର୍ଯ୍ୟାପ୍ତ ପୋଲିସ ଫୋର୍ସ ମୁତୟନ କରିବା ଏବଂ ଗଣ୍ଡଗୋଳର ଆଶଙ୍କା ଥିଲେ ତୁରନ୍ତ ହସ୍ତକ୍ଷେପ କରିବାକୁ ସେ କଡ଼ା ନିର୍ଦ୍ଦେଶ ଦେଇଥିଲେ ।