Orangutan Return / ସରିଲା ସମୟ; ଖୁବଶୀଘ୍ର ନିଜ ଦେଶ ଫେରିଯିବେ ଓରାଙ୍ଗଉଟାନ୍‌

ଭୁବନେଶ୍ଵର: ଇଣ୍ଡୋନେସିଆ ଫେରିପାରନ୍ତି ଉଦ୍ଧାର ଶାବକ ଓରାଙ୍ଗଉଟାନ୍ । ଓଡ଼ିଶାରୁ ଉଦ୍ଧାର ୫ ଓରାଙ୍ଗଉଟାନ୍‌ଙ୍କୁ ଫେରାଇନେବାକୁ ଉଦ୍ୟମ କରାଯାଉଛି । ଜାକର୍ତ୍ତା ସ୍ଥିତ ଭାରତୀୟ ଦୂତାବାସ ପକ୍ଷରୁ ଜାରି ସୂଚନାରୁ ସ୍ପଷ୍ଟ ହୋଇଛି । ଆଇନଗତ ପ୍ରକ୍ରିୟା ଓ ନିୟମାବଳୀ ପୂରଣ ପରେ ପଦକ୍ଷେପ ଗ୍ରହଣ କରାଯିବ । ସହଯୋଗ ପାଇଁ ଆସିବେ ଇଣ୍ଡୋନେସିଆ ବନ୍ୟପ୍ରାଣୀ ବିଶେଷଜ୍ଞ । ଏବେ ନନ୍ଦନକାନନରେ ସୁରକ୍ଷିତ ଅଛନ୍ତି ୫ ଓରାଙ୍ଗଉଟାନ୍ ।

ସୋମବାର ଦିନ ଜାରି ହୋଇଥିବା ଏକ ପ୍ରେସ୍ ରିଲିଜ ଅନୁସାରେ, ଜାକର୍ତ୍ତା ସ୍ଥିତ ଭାରତୀୟ ଦୂତାବାସ କହିଛି ଯେ ନଭେମ୍ବର ୨୦୨୬ରେ ଇଣ୍ଡୋନେସିଆର ବନ୍ୟପ୍ରାଣୀ ମନ୍ତ୍ରଣାଳୟର ବନ୍ୟପ୍ରାଣୀ ବିଶେଷଜ୍ଞମାନଙ୍କୁ ଭାରତ ଗସ୍ତ କରାଇବାକୁ ବ୍ୟବସ୍ଥା କରାଯାଉଛି । କିନ୍ତୁ ଏପଟେ ଓଡ଼ିଶାର ପ୍ରମୁଖ ମୁଖ୍ୟ ବନ ସଂରକ୍ଷକ (ବନ୍ୟପ୍ରାଣୀ) ପିକେ ଝା କହିଛନ୍ତି ଯେ ପ୍ରସ୍ତାବିତ ପ୍ରତ୍ୟାବର୍ତ୍ତନ ସମ୍ପର୍କରେ ରାଜ୍ୟକୁ କୌଣସି ସରକାରୀ ସୂଚନା ମିଳିନାହିଁ । ସେ କହିଛନ୍ତି, "ନଭେମ୍ବରରେ ଇଣ୍ଡୋନେସିଆନ୍ ବନ୍ୟପ୍ରାଣୀ ବିଶେଷଜ୍ଞଙ୍କ ସମ୍ଭାବ୍ୟ ଗସ୍ତ ବିଷୟରେ ରାଜ୍ୟ ସରକାରଙ୍କ ପାଖରେ କୌଣସି ସୂଚନା ନାହିଁ ।"

• କେମିତି ଅଛି ଓରାଙ୍ଗଉଟାନଙ୍କ ସ୍ଵାସ୍ଥ୍ୟାବସ୍ଥା ?

ନନ୍ଦନକାନନ ପ୍ରାଣୀ ଉଦ୍ୟାନରେ ଥିବା ୫ଟି ଉଦ୍ଧାର ହୋଇଥିବା ଓରାଙ୍ଗଉଟାନଙ୍କ ସ୍ୱାସ୍ଥ୍ୟାବସ୍ଥା ଭଲ ରହିଛି । ସେମାନଙ୍କ ଓଜନ ଧୀରେ ଧୀରେ ବୃଦ୍ଧି ପାଉଥିବା ବେଳେ ଖାଦ୍ୟ ମଧ୍ୟ ଠିକ୍ ଭାବେ ଗ୍ରହଣ କରୁଛନ୍ତି । ଏଥିସହ ସେମାନଙ୍କ ଗତିବିଧିରେ ମଧ୍ୟ ଉଲ୍ଲେଖନୀୟ ବୃଦ୍ଧି ଦେଖାଦେଇଛି । ଓରାଙ୍ଗଉଟାନ ଛୁଆମାନେ ଏବେ ସାଧାରଣ ବ୍ୟବହାର ପ୍ରଦର୍ଶନ କରୁଛନ୍ତି । ଏପରିକି ସେମାନଙ୍କର ଆକ୍ଟିଭିଟି ମଧ୍ୟ ସାଧାରଣ ରହିଛି । ଅଭିଜ୍ଞ ପ୍ରାଣୀ ଚିକିତ୍ସା ଅଧିକାରୀଙ୍କ ତତ୍ତ୍ୱାବଧାନରେ ସେମାନଙ୍କ ଯତ୍ନ ନିଆଯାଉଥିବା ବେଳେ ବୈଷୟିକ କମିଟିର ସଦସ୍ୟମାନଙ୍କ ପରାମର୍ଶ ମଧ୍ୟ ନିଆଯାଉଛି ।

ପଢନ୍ତୁ ଏହି ଖବର: ନନ୍ଦନକାନନରେ ସୁସ୍ଥ ଅଛନ୍ତି ୫ ଓରାଙ୍ଗଉଟାନ, ଖାଦ୍ୟ ବଢାଇବା ପାଇଁ ପରାମର୍ଶ ଦେଲେ ଟେକନିକାଲ ଟିମ୍

• ଓଡ଼ିଶାକୁ କେଉଁଠୁ ଆସିଥିଲେ ଓରାଙ୍ଗଉଟାନ୍ ?

ଗତ ୮ ସେପ୍ଟେମ୍ବରରେ ଓଡ଼ିଶାର ବାଲେଶ୍ବର ଜିଲ୍ଲା ଉଦୟପୁର-ତାଳସାରି ବନଞ୍ଚଳରୁ (ଭୋଗରାଇ ବ୍ଲକର ରଣକଟା ସଂରକ୍ଷିତ ଜଙ୍ଗଲ ନିକଟରୁ) ୫ଟି ଓରାଙ୍ଗଉଟାନ ଛୁଆଙ୍କୁ ବନ ବିଭାଗ ଦ୍ବାରା ଉଦ୍ଧାର କରିଥିଲା । ବନ ବିଭାଗର ନିୟମିତ ପାଟ୍ରୋଲିଂ ଏବଂ ସ୍ଥାନୀୟ ଲୋକଙ୍କ ସୂଚନା ଆଧାରରେ ୩ଟି ଅଣ୍ଡିରା ଏବଂ ୨ଟି ମାଈ ଓରାଙ୍ଗଉଟାନଙ୍କୁ ଉଦ୍ଧାର କରାଯାଇଥିଲା । ଓରାଙ୍ଗଉଟାନ ଭାରତର ସ୍ଥାନୀୟ ପ୍ରଜାତି ନୁହଁନ୍ତି; ଏମାନେ ମୁଖ୍ୟତଃ ଇଣ୍ଡୋନେସିଆର ବର୍ନିଓ ଏବଂ ସୁମାତ୍ରା ଦ୍ୱୀପପୁଞ୍ଜରେ ଦେଖାଯାଆନ୍ତି । ଏମାନେ କେଉଁଠାରୁ ଏବଂ କିପରି ଓଡ଼ିଶା ଆସିଲେ ତାହା ସମ୍ପୂର୍ଣ୍ଣ ସ୍ପଷ୍ଟ ହୋଇନାହିଁ । ତେବେ ଏହା ଏକ ଆନ୍ତର୍ଜାତିକ ବନ୍ୟପ୍ରାଣୀ ଚୋରାଚାଲାଣ କିମ୍ବା ଚୋରା ପରିବହନ ବେଳେ ଧରାପଡ଼ିବା ଭୟରେ କେହି ଜଙ୍ଗଲରେ ଛାଡ଼ି ଦେଇଥିବା ନେଇ ବନ ବିଭାଗ ଓ ଏସଟିଏଫ୍ (STF) ସନ୍ଦେହ କରୁଛି । ସେନେଇ ତଦନ୍ତ ଜାରି ରହିଛି ।