ବିଶ୍ୱପ୍ରସିଦ୍ଧ ରଥଯାତ୍ରା ୨୦୨୬ ପାଇଁ ଏବେ ପୁରୀ ଚଳଚଞ୍ଚଳ । ଲକ୍ଷ ଲକ୍ଷ ଭକ୍ତଙ୍କ ସୁରକ୍ଷାକୁ ଦୃଷ୍ଟିରେ ରଖି ଓଡ଼ିଶା ପୋଲିସ ପକ୍ଷରୁ ବଡ଼ଦାଣ୍ଡରେ ଆରମ୍ଭ ହୋଇଛି ‘ଅପରେସନ ଚକ୍ରବ୍ୟୁହ’ । ଶ୍ରୀମନ୍ଦିର ସମ୍ମୁଖରେ କୌଣସି ସମ୍ଭାବ୍ୟ ଆତଙ୍କବାଦୀ ଆକ୍ରମଣ କିମ୍ବା ଜରୁରୀକାଳୀନ ପରିସ୍ଥିତିର ମୁକାବିଲା ପାଇଁ ଏକ ବଡ଼ଧରଣର ମେଗା ମକ୍ ଡ୍ରିଲ୍ କରାଯାଇଛି । ଓଡ଼ିଶା ପୋଲିସର ସ୍ପେଶାଲ ଟାକ୍ଟିକାଲ ୟୁନିଟ୍ ଏବଂ ଏସଓଜି କମାଣ୍ଡୋମାନେ ବଡ଼ଦାଣ୍ଡରେ ନିଜର ଦକ୍ଷତା ପ୍ରଦର୍ଶନ କରିଛନ୍ତି ।

ହଠାତ୍ ରଥଯାତ୍ରା ଗହଳି ଭିତରେ ଦୁଇ ଜଣ ସନ୍ଦିଗ୍ଧ ଆତଙ୍କବାଦୀ ବନ୍ଧୁକ ଧରି ଅତର୍କିତ ଗୁଳିଚାଳନା କରିଥିଲେ । ଏହାପରେ ଅନେକ ଶ୍ରଦ୍ଧାଳୁଙ୍କୁ ପଣବନ୍ଦୀ ବା ହୋଷ୍ଟେଜ୍ କରି ଶ୍ରୀମନ୍ଦିର ସମ୍ମୁଖରେ ଥିବା ସୁଉଚ୍ଚ ବାଗେଡିଆ ବିଲ୍ଡିଙ୍ଗରେ ଆତ୍ମଗୋପନ କରିଥିଲେ । ଏହି ଖବର ପାଇବା ମାତ୍ରେ ପ୍ରଥମେ ଅଗ୍ନିଶମ ବିଭାଗ ପକ୍ଷରୁ ସେଠାରେ ଲାଗିଥିବା ନିଆଁକୁ ଆୟତ୍ତ କରାଯାଇଥିଲା । ଏହା ଏକ ଚ୍ୟାଲେଞ୍ଜିଂ ଅପରେସନ ଥିବାରୁ ଅତି ସତର୍କତାର ସହ ଅଗ୍ନିଶମ ବିଭାଗର ସୁଉଚ୍ଚ ଲ୍ୟାଡର୍ ଯୋଗେ କୋଠାକୁ ପ୍ରବେଶ କରିଥିଲେ STU ର କମାଣ୍ଡୋ ।

ଅଧିକ ପଢ଼ନ୍ତୁ: ଭୁବନେଶ୍ୱରରେ କେନ୍ଦ୍ର ମତ୍ସ୍ୟ ସମ୍ପଦ ବିଭାଗର ଗୁରୁତ୍ୱପୂର୍ଣ୍ଣ ବୈଠକ, ମତ୍ସ୍ୟ ଚାଷକୁ ଆହୁରି ତ୍ୱରାନ୍ୱିତ କରିବାକୁ କେନ୍ଦ୍ରର ବ୍ଲୁ-ପ୍ରିଣ୍ଟ

ପ୍ରଥମେ ପଣବନ୍ଦୀ ଥିବା ଶ୍ରଦ୍ଧାଳୁଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା ଏବଂ ଗୁଳିମାଡ଼ରେ ଆହତ ପୋଲିସ କର୍ମଚାରୀଙ୍କୁ ଆମ୍ବୁଲାନ୍ସ ଯୋଗେ ମେଡିକାଲ ପଠାଯାଇଥିଲା । ଶେଷରେ ‘ଅପରେସନ ଚକ୍ରବ୍ୟୁହ’ ମାଧ୍ୟମରେ ଦୁଇ ଆତଙ୍କବାଦୀଙ୍କୁ ସଫଳତାର ସହ ନିପାତ କରାଯାଇଥିଲା । ରଥଯାତ୍ରା ସମୟରେ ଯଦି କୌଣସି ଅଘଟଣ ଘଟେ, ତେବେ କିଭଳି ‘ରିଅଲ ଟାଇମ୍ ରେସ୍ପଣ୍ଡ’ ମାଧ୍ୟମରେ ରେସ୍କ୍ୟୁ ଅପରେସନ କରାଯିବ, ତାର ଚମତ୍କାର ଟ୍ରିକ୍ ଦେଖାଇଛି ଓଡ଼ିଶା ପୋଲିସ୍ ।

ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ଅଭେଦ୍ୟ ଦୁର୍ଗ ପାଲଟିଛି ଶ୍ରୀକ୍ଷେତ୍ର । ଗତକାଲି ଠାରୁ ହିଁ ପୁରୀର ବିଭିନ୍ନ ସ୍ଥାନରେ ଏହିପରି ମେଗା ମକ୍ ଡ୍ରିଲ୍ କରାଯାଉଛି । ପ୍ରଥମେ ସକାଳେ ଏକ ତାରକା ହୋଟେଲରେ ଏବଂ ପରେ ଶ୍ରୀମନ୍ଦିର ସିଂହଦ୍ଵାର ନିକଟରେ ଏହି ମକ୍ ଡ୍ରିଲ୍ ଅନୁଷ୍ଠିତ ହୋଇଯାଇଛି । ଭକ୍ତ ଓ ପର୍ଯ୍ୟଟକଙ୍କ ପ୍ରବଳ ଭିଡ଼ ଥିବାରୁ ସୁରକ୍ଷା ଦୃଷ୍ଟିରୁ ମକ୍ ଡ୍ରିଲ୍ ହେଉଥିବା ସ୍ଥାନର ଦୁଇ ପାର୍ଶ୍ୱ ରାସ୍ତାକୁ କିଛି ସମୟ ପାଇଁ ବନ୍ଦ କରାଯାଇଥିଲା । ଏହି ରୋମାଞ୍ଚକର ସୁରକ୍ଷା ଅଭ୍ୟାସକୁ ଦେଖିବା ପାଇଁ ସିଂହଦ୍ଵାର ନିକଟରେ ଭକ୍ତଙ୍କ ବେଶ୍ ଭିଡ଼ ଜମିଥିଲା ।