ଓଡ଼ିଶା ପାଇଁ ଆଉ ଏକ ଗୌରବର ମୁହୂର୍ତ୍ତ । ବନ୍ୟଜନ୍ତୁ ସଂରକ୍ଷଣ ଓ ବୈଜ୍ଞାନିକ ଗବେଷଣା କ୍ଷେତ୍ରରେ ଓଡ଼ିଶା ହାସଲ କରିଛି ଏକ ଐତିହାସିକ ସଫଳତା । ଭୁବନେଶ୍ୱରସ୍ଥିତ ଓୟୁଏଟିରେ ଥିବା ୱାଇଲ୍ଡ ଲାଇଫ୍ ହେଲ୍ଥ ସେଣ୍ଟର ଦେଶର ପ୍ରଥମ NABL-ସ୍ୱୀକୃତ ୱାଇଲ୍ଡଲାଇଫ୍ ଫରେନସିକ୍ ଲ୍ୟାବ୍ ଭାବେ ମାନ୍ୟତା ପାଇଛି । ISO/IEC 17025:2017 ମାନକ ଅନୁଯାୟୀ ମିଳିଥିବା ଏହି ସ୍ୱୀକୃତି କେବଳ ଓଡ଼ିଶା ନୁହେଁ, ସାରା ଦେଶର ବନ୍ୟଜନ୍ତୁ ଫରେନସିକ୍ ବ୍ୟବସ୍ଥା ପାଇଁ ଏକ ନୂଆ ଅଧ୍ୟାୟ ସୃଷ୍ଟି କରିଛି ।

ଅଧିକାରୀମାନଙ୍କ କହିବା ଅନୁସାରେ, ଏହି ସ୍ୱୀକୃତି ଫଳରେ ଓଡ଼ିଶାରେ ବନ୍ୟଜନ୍ତୁଙ୍କ ସ୍ୱାସ୍ଥ୍ୟ ନିରୀକ୍ଷଣ, ରୋଗ ଚିହ୍ନଟ ଓ ବନ୍ୟଜନ୍ତୁ ସମ୍ବନ୍ଧୀୟ ଫରେନସିକ୍ ତଦନ୍ତ ଅଧିକ ସୁଦୃଢ଼ ହେବ । ଲ୍ୟାବ୍‌ରେ ହେଉଥିବା ସମସ୍ତ ପରୀକ୍ଷା ଏବେ ଆନ୍ତର୍ଜାତୀୟ ମାନଦଣ୍ଡ ଅନୁଯାୟୀ ସଠିକ୍, ନିର୍ଭରଯୋଗ୍ୟ ଓ ଉଚ୍ଚ ଗୁଣବତ୍ତାର ହେବ ବୋଲି କୁହାଯାଇଛି ।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଏହାକୁ ଓଡ଼ିଶା ପାଇଁ ଏକ ଐତିହାସିକ ମାଇଲଖୁଣ୍ଟ ବୋଲି କହିଛନ୍ତି । ବୈଜ୍ଞାନିକ ଗବେଷଣାକୁ ପ୍ରୋତ୍ସାହନ ଓ ବନ୍ୟଜନ୍ତୁ ସଂରକ୍ଷଣ ବ୍ୟବସ୍ଥାକୁ ଅଧିକ ଶକ୍ତିଶାଳୀ କରିବାରେ ଓଡ଼ିଶାର ପ୍ରତିବଦ୍ଧତାର ଏହା ଏକ ସ୍ପଷ୍ଟ ପ୍ରମାଣ ବୋଲି CMO ପକ୍ଷରୁ କୁହାଯାଇଛି ।

ଅଧିକ ପଢ଼ନ୍ତୁ: ଜରଡ଼ ଛକ କ୍ରସର ନିକଟ ଗଛରେ ଝୁଲୁଛି କଲରା ପତରିଆ ବାଘ ମୃତଦେହ… ମୃତ୍ୟୁର କାରଣ ଅସ୍ପଷ୍ଟ

ବିଶେଷଜ୍ଞମାନଙ୍କ ମତରେ, ଏହି ସ୍ୱୀକୃତି ଓଡ଼ିଶାକୁ ଦେଶର ବନ୍ୟଜନ୍ତୁ ଫରେନସିକ୍ ଗବେଷଣାର ଏକ ପ୍ରମୁଖ କେନ୍ଦ୍ର ଭାବେ ପ୍ରତିଷ୍ଠିତ କରିବ । ସେହିପରି ସାରା ଦେଶର ବନ୍ୟଜନ୍ତୁ ସମ୍ବନ୍ଧୀୟ ମାମଲାର ତଦନ୍ତକୁ ଅଧିକ ଦ୍ରୁତ, ବୈଜ୍ଞାନିକ ଓ ନିର୍ଭୁଲ କରିବାରେ ଏହି ଲ୍ୟାବ୍ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇବ ।

OUAT ବିଷୟରେ ପଦେ...

ସୂଚନା ଅନୁସାରେ, ୧୯୬୨ ମସିହାରେ ଓଡ଼ିଶା ସରକାରଙ୍କ ଦ୍ୱାରା OUAT ସ୍ଥାପିତ ହୋଇଥିଲା । OUAT ସ୍ଥାପନାର ମୂଳ ଉଦ୍ଦେଶ୍ୟ ଥିଲା କୃଷି, ଉଦ୍ୟାନ କୃଷି, ପଶୁଚିକିତ୍ସା, ମତ୍ସ୍ୟ, ବନବିଜ୍ଞାନ ଓ କୃଷି ପ୍ରଯୁକ୍ତି କ୍ଷେତ୍ରରେ ଉଚ୍ଚଶିକ୍ଷା, ଗବେଷଣା ଏବଂ କୃଷକମାନଙ୍କ ପାଖକୁ ନୂତନ ପ୍ରଯୁକ୍ତି ପହଞ୍ଚାଇବା ।

ଓଡ଼ିଶାରେ ଉନ୍ନତ ଧାନ, ଡାଲି, ତୈଳବୀଜ ଓ ପନିପରିବା ଜାତିର ବିକାଶରେ OUATର ଗୁରୁତ୍ୱପୂର୍ଣ୍ଣ ଅବଦାନ ରହିଛି । କୃଷି ସମ୍ପ୍ରସାରଣ (Extension Education) ମାଧ୍ୟମରେ ଲକ୍ଷାଧିକ କୃଷକଙ୍କୁ ଆଧୁନିକ ଚାଷ ପଦ୍ଧତି ବିଷୟରେ ପ୍ରଶିକ୍ଷଣ ମଧ୍ୟ ଦେଇଆସୁଛି । ବିଶ୍ୱବିଦ୍ୟାଳୟ ଅଧୀନରେ କୃଷି, ପଶୁଚିକିତ୍ସା, କୃଷି ଇଞ୍ଜିନିୟରିଂ, ମତ୍ସ୍ୟ, ବନବିଜ୍ଞାନ, କମ୍ୟୁନିଟି ସାଇନ୍ସ ଓ ଅନ୍ୟାନ୍ୟ ବିଭାଗର କଲେଜ ଏବଂ ଗବେଷଣା କେନ୍ଦ୍ର କାର୍ଯ୍ୟ କରୁଛି ।